Read Batak Dairi 1 Samuel 26 Bible Online

1 Samuel 26 - Batak Dairi bible

1 Samuel 26

¹Tikan sidari roh mo kalak Zif mendahi si Saul mi Gibea, memagahken tabasa, i delleng Hakila i biding gurun Judea ngo ciboni si Daud.

²Nai mèter berkat mo si Saul rebbak dekket tellu ribu soridadu simahantuna i Israel nai, lako mi gurun Zif menulusi si Daud.

³Merundung-undung ngo si Saul i biding dalan ndessing i delleng Hakila i nai. Idengkoh si Daud simerian i gurun i mo, ièkutken si Saul ngo ia soh mi gurun kelongoen i.

⁴Nai iutus ma mo mata- matana, gabè ibettoh mo tuhu ngo i sidi si Saul.

⁵Isudu si Daud mo laus mi perundung-undungen si Saul, idapet mo meddem si Saul i gembar si Abner anak si Ner i perundung-undungen i, ikulilingi undung-undung balapergunggungna.

⁶Nai ikusoi si Daud mo si Ahimelekh kalak Het i, dekket si Abisai anggi si Joab (inang kalak èn sidua imo si Zeruya), “Isè kènè pang denganku mendahi undung-undung si Saul?” Ialoi si Abisai mo, “Aku.”

⁷Nai bernginna i, mendirip ndirip mo si Daud dekket si Abisai mi bagasen perundung-undungen i nai idah kalak i mo si Saul terpeddem i tengah-tengah undung-undung i. Kujurna pasek i gembar takalna. Si Abner dekket parangenna pè meddem ma ngo sikuliling si Saul.

⁸Nai idokken si Abisai mo taba si Daud, “Berngin èn enggo ipesakat Dèbata musuhmu taba kono. Paduè mo asa kupantemken kujurna i sendiri mi dagingna i leppas mi tanoh, asa kubunuh ia pellin sikali tikam, oda pella dua kali.”

⁹Tapi nina si Daud mo, “Ulang ikekadè ko ia. Ai ihukum JAHOWA ngo kalak simemaing jahat taba raja sinipilihNa.

¹⁰Kubettoh ngo merkitè gerar JAHOWA singgelluh i. JAHOWA sendiri ngo munuh si Saul podin èn, dapet kessa ajalna, barang pè tah matè mergeraha ia.

¹¹Katerra pè ulang mo ipaduè JAHOWA aku memunuh raja nipilihNa i. Pellin kujurna bak perènumenna i mo ukum sibuat, asa laus kita.”

¹²Nai ibuat si Daud mo kujur bak perènumen si Saul i, nai laus mo kalak i. Sada kalak poda idah-idahen i barang memettoh kadè masa, barang pè ndungo, ai JAHOWA ngo maing lènek kalak i karinana.

¹³Nai iturèpari si Daud mo lembeng i, soh mo ia mi pucuk delleng, ndaoh i perundung-undungen si Saul i nai.

¹⁴Nai pingko-pingko mo si Daud taba si Abner bak taba soridadu si Saul, nina mo, “O Abner! Idengkoh kono ngo sorangku?” Nai nggang mo ialoi si Abner, “Isè ngo ko sipingko-pingko i?”

¹⁵Ialoi si Daud mo, “Nong alè Abner, otang kono ngo jelma simahantuna i Israel? Kasa oda ijaga ko rajamu? Idèng lot kalak masuk mi perundung-undungenmi lako naing memunuh raja i.

¹⁶Oda kuidah terulaken kono bahanmu alè Abner. Situhuna patut ngo kènè matè, kumarna oda ijaga kènè raja i, sinipilih JAHOWA. Tengen mo! Idikè ngo kujur raja i? Idikè ngo perènumenna silot kan takal raja i?”

¹⁷Itandai si Saul ngo sora si Daud i nai ikusoi mo, “Kono ngo i alè Daud, Kelangku?” Ialoi si Daud mo, “Uè alè Raja nami.”

¹⁸Nai idokken dèng ma, “Kasa dakdak iletlet Rajai dèng aku? Kadè pana kesalahenku?

¹⁹Alè Raja nami, dengkohken mo ranangku èn. Ukum JAHOWA ngo pasulakken Rajai lako mengalo aku, iberèken sambing pè pèlèen mènak ngo lagaNa taba aku. Tapi mula jelma ngo pasulakken Rajai, kenna sumbiah JAHOWA mo ia, kemulihken pemaing kalak idi bagidi, ai gabè ipelaus aku mi tanoh sidèban menguèi dèbata sidèban.

²⁰Ulang ibelli kono aku matè i tanoh sidèban, ndaoh bai JAHOWA nai. Kadè mo gunana roh raja Israel lako munuh sada kutu bagè aku èn? Kadè gunana ia mengeletlet aku bagè mengeletlet manuk rambah?”

²¹Nai ialoi si Saul mo, “Enggo salah ulah-ulahku. Molih mo kènè Daud, Kelangku. Oda nèngè salah kubaing bai ndènè, kumarna enggo ikellini kènè aku berngin ndaboi, asa tong nggelluh aku. Kemotoen ngo sikubaing i. Tuhu-tuhu ngo aku enggo keliru.”

²²Tapi ialoi si Daud mo, “I sèn ngo kujur Rajai, pasulak mo sada kalak soridadumu mengalengi.

²³Dak ipasu-pasu JAHOWA ngo gennep kalak setma bak bujur. Kerna tukasi pè enggo ipesakat JAHOWA Rajai ari èn taba aku, tapi oda uè aku memaing jahat meradepken Rajai, sinipilih JAHOWA.

²⁴Asa bagè Rajai sienggo kukelini sidari èn asa tong nggelluh, bagi ma mo nemmu aku iondingi JAHOWA janah ipaluah ibas karina permaraen nai.”

²⁵Nai idokken si Saul mo taba si Daud, “Dak ipasu-pasu JAHOWA mo kènè alè kèla. Saut janah menjadi ngo karina sura-sura bak ulaen ndènè.” Nai iterrusken si Daud mo dalanna, janah si Saul pè balik mo mi bagesna.