Read Batak Dairi 1 Samuel 27 Bible Online

1 Samuel 27 - Batak Dairi bible

1 Samuel 27

¹Nai mersura-sura mo si Daud, “Barang bakunè pè, naing bunuhen si Saul ngo aku. Jadi oda lot dalan sidèban bangku, lotien mo mperrus aku mi nagerri kalak Palistin. Merkitè bagidi oda nè mo iletlet si Saul aku i Israel, nai mènak mo aku.”

²Nai kebbas mo si Daud dekket parangenna siennem ratus kalak laus mendahi si Akhis anak si Moah, raja i kuta Gat.

³Nai merian i Gat mo ia bak parangenna rebbak dekket karina simpangansa gennep. Iarahken si Daud ngo duana sinibagesna, imo si Ahinoam berru si Jizreel dekket si Abigail sinibages si Nabal arnia berru si Karmel.

⁴Idengkoh si Saul kessa mo beritana enggo mperrus si Daud mi Gad, gabè oda nè mo ipikiri lako menangkupsa.

⁵Nai ipidoken si Daud mo taba si Akhis, “Mula toko ngo atè Rajai midah aku, berrèken mo sada perkutaenku kètèk-kètèk asa ulang dak mendampin aku rebbak Rajai i kuta sabungen èn.”

⁶Nai iberèken si Akhis mo bai si Daud kuta Ziklag, janah kumarnaken i ngo asa kuta raja-raja Juda kuta Ziklag soh bagèndari.

⁷Merian i nagerri Palistin ngo si Daud setahun empat bulan dakkahna.

⁸Sidekkah i ngkatep ngo ijuhap si Daud bak parangenna kalak Gesur imo kalak Girzi bak kalak Amalek pè; ukum kalak i enggo mo ndekkah merian i aur i. Ijuhap ngo soh mi tanoh Sur, soh mi tanoh Mesir.

⁹Ibunuh ngo karina anak laki bang daberru pè nai ilaum mo biri-biri, lembu, kalodè, unta, bak gedda pè. Nai balik mo ia janah ihadep mo si Akhis.

¹⁰Mula ikusoken si Akhis bana, “Mikè kènè menjuhap sapatna èn?” Nai ialoi si Daud mo laus mi jèhèen Juda ngo kalak i mi kuta kalak Jerahmeel barang mi aur bekkas kalak Keni.

¹¹Sada kalak poda ibelli nggelluh pengisi kuta sinijuhapna i, asa ulang lot i kuta i laus mi Gat memagahken kadè situhuna sienggo ibahanken si Daud bak parangenna i. Bagi mo ibaing si Daud sidekkah merian i nagerri kalak Palistin ia.

¹²Tapi tok ngo si Akhis taba si Daud ai dok atèna, “Soh mo nggodona atè bangsana midahsa, terpaksa ngo ia gabè naposongku sidekkah nggelluhna.”