Read Batak Dairi 1 Samuel 28 Bible Online

1 Samuel 28 - Batak Dairi bible

1 Samuel 28

¹Daoh-daoh arien ipepulung kalak Palistin mo tenterrana lako mengkubu kalak Israel, nai idokken si Akhis mo taba si Daud, “Tentu iarusi kono ngo kennah menumpak kami ngo kono dekket parangenmu tupung geraha èn.”

²Ialoi si Daud mo, “Bagidi ngo, asa idah Rajai nahan bakunè sindorok ibahanken naposo raja i.” Nai idokken si Akhis mo, “Selloh mo i! Kupebangkit mo ko gabè pengabalku.”

³Kum si Samuel enggo mo matè janah ita- ngisi karina kalak Israel ngo ia janah ikubur i Rama, i kutana. Tikala i enggo kin ngo ipelaus si Saul karina tukkang ramal dek- ket nangguru pendiloi sumangan i Israel nai.

⁴Nai tikan enggo merpulung tenterra Palistin janah merundung-undung i gembar kuta Sunem, ipepulung si Saul ma mo kalak Israel mertumpu i delleng Gilboa.

⁵Idah si Saul kessa mo tenterra kalak Palistin i, gabè buradan mo ia.

⁶Nai ipido mo peddah bai JAHOWA nai, tapi oda ialoi JAHOWA ia, merkitè nipi barang merkitè Urim bak Tumim bang pè merkitè nabi.

⁷Kumarna i nina si Saul mo taba pengabalna, “Tulusi mo sada kalak sibaso daberru penenggoi sumangan asa kudahi ia lako mido peddah.” Ialoi kalak i mo, “Lot ngo sibaso sibagidi i En-Dor.”

⁸Nai pekellih rupa mo si Saul asa ulang itandai dèba ia. Idengani dua kalak daholi berkat mo ia, jadi soh mo kalak i mi bages sibaso i tupung enggo gellap ari. Nai nina si Saul mo, “Diloi mo lebbè tendi sinaing kubagahken gerarna, janah kusoken tabasa asa ibagahken kadè sinaing masa.”

⁹Ialoi daberru i mo, “Tentu ibettoh kènè ma ngo sendah enggo ipelaus si Saul karina tukkang ramal dekket nangguru pendiloi sumangan i suberri Israel nai. Kasa icuba-cuba kènè nola maing asa cilaka aku asa ibunuh aku katè ndènè?”

¹⁰Nai mersumpah mo si Saul, nina mo, “Merkitè JAHOWA singgelluh i, kujandiken bamu, oda kenna hukum ko kumernaken mahanken èn.”

¹¹Ikuso daberru i mo, “Sumangan isè sinaing diloenku dok atèmu?” Ialoi si Saul mo, “Sumangan si Samuel ngo.”

¹²Idah daberru i kessa mo si Samuel, mèter ipegang mo sorana mendokken taba si Saul, “Kasa ikilang kènè aku? Kènè ngo keppèken Raja Saul!”

¹³Ialoi raja i mo, “Ulang kono mbiar! Bagahken sambing mo kadè idah kono.” Ialoi daberru i mo, “Kuidah ngo roh tendi i tanoh i nai.”

¹⁴Ikuso si Saul mo, “Bakunè rupana?” Ialoi mo, “Sada kalak daholi enggo tua-tua, roh ia memakè jubah.” Nai ibettoh si Saul mo si Samuel ngo i, gabè mersembah mo ia.

¹⁵Enggo kessa bagi nina si Samuel mo taba si Saul, “Kasa iganggu kènè aku? Kasa idiloi kènè dèng aku?” Ialoi si Saul mo, “Posek ngo kuakap ukurku kumarna ijuhap kalak Palistin. Keppèken ukum JAHOWA enggo itadingken aku. Oda nèngè ialoi aku merkitè nabi barang merkitè nipi pè. Kumarna i kuèlèk-èlèk mo kono asa bagahken bangku kadè patut ulaenken- ku.”

¹⁶Nai nina si Samuel mo, “Salang JAHOWA enggo itadingken kono janah enggo gabè musuhmu, nai kadè mo gunana idilo ko aku?

¹⁷Enggo ipesaut JAHOWA bagè sienggo nidokkenNa bamu merkitè aku tikala i. Enggo mo iompat JAHOWA kerajaen Israel bamu nai janah iberèken bai si Daud.

¹⁸Ialo kono ngo perèntah JAHOWA janah oda uè kono mengeripasken kalak Amalek dekket karina harta milik kalak i. Kumarnaken i ngo asa bagi ibaing JAHOWA taba ko.

¹⁹Kono bak kalak Israel ipesakat mo taba kalak Palistin. Baremben mo pulung kono bak dukak-dukakmu dekket aku; lebbihna i dèng karina tenterra Israel pè ipesakat JAHOWA mo taba kalak Palistin.”

²⁰Gejapkenna i mèter geppah mo si Saul mi tanoh bagè icalit perkas, kumernaken tersenggetna mendengkoh rana si Samuel i. Bagi dèng kumarna oda mangan ia sanga sidari sada berngin dekkahna, ndotè kalohon mo ia.

²¹Ijolmiti nangguru ino si Saul, janah itengen mo ia bage cara ndongo-ndongo, kerna ni nina daberru i mo tabasa, “Tuan nami, enggo mo kupeleken diringku lako mengulaken kadè sinipidoken Tuan i.

²²Kumarna i, naing ma mo iuèi Rajai pengidoenku; ipangan Rajai mo giam cituk pangaen sinaing kupehantar asa ndorok iterrusken Rajai perdalanenna.”

²³Ijua si Saul ngo janah idokken oda uè ia mangan. Tapi igegohi pugabèna kessa ma mo gabè iuèi mo. Kèkè mo ia i tanoh i nai, kundul mo ia mi pentas-pentas.

²⁴Isudu daberru i mo menembellih anak lembuna singgomokna, ibuat ma mo topong mahan roti siso meragi.

²⁵Enggo kessa ntasak, ihidangken mo panganen i bai si Saul dekket denganna i, nai mangan mo kalak i. Kessa pul i, berkat mo kalak i bernginkenna i ma.