Read Batak Dairi 1 Samuel 29 Bible Online

1 Samuel 29 - Batak Dairi bible

1 Samuel 29

¹Ipepulung kalak Palistin mo bala pergunggungna i Afek, ukum kalak Israel i gembar takal laè i lembeng Jizreel ngo.

²Silima raja kalak Palistin merbaris mersiaraken bak nuhnuhen-nuhnuhen ibas seratus bak siseribu kalak; si Daud bak parangenna merbaris ma mo tan podi rebbak dekket raja Akhis.

³Idah pakalima kalak Palistin kessa mo kalak i, ikusoken mo, “Merkadè kalak Heber i i sèn?” Ialoi si Akhis mo, “Si Daud ngo èn, naposo Raja Saul kalak Israel i kin. Enggo mo narih ndekkah kalak i merian rebbak aku. Kessa nai roh ia mendahi aku, soh bagèndari mak dèng nung ia kuidah mersalah.”

⁴Tapi melaga mo pakalima kalak Palistin i taba si Akhis, nina mo mbangsa, “Pasulak mo ia molih mi kutana sienggo niberèkenmu bana i. Oda ndorok ia rebbak dekket kita mergeraha, oda nibettoh-bettoh tah gabè menghianat nola ia banta tikan geraha. Otang sada ketika selloh ngo bana èn, lako muat ukur rajana dekket dalan memunuh parangenta?

⁵Otang si Daud ngo ia? Lako bana ngo tikala i tumataki janah merendè daberru-daberru bagèen nina, ‘Enggo ibunuh si Saul musuh i meribu-ribu, tapi ukum si Daud merpuluh-puluh ribu.’ ”

⁶Nai idilo si Akhis mo si Daud, nina mo mbangsa, “Merkitè gerar JAHOWA singgelluh i, tok ngo aku bamu, setia ngo ko bangku. Kerna kessa nai roh ko mendahi aku soh bagèndari, oda lot kuidah salahmu. Tapi ukum raja-raja sidèbankenna i, oda selloh iakap midah ko.

⁷Kumarna i njuah-njuah mo kono molih, janah ulang baing barang kadè mendungkul laga kalak i.”

⁸Ialoi si Daud mo, “Kadè pana salah sikubahan alè Raja nami? Mula bagè pendokken Rajai, oda nung idah Rajai salah aku kessa nai gabè naposo Rajai aku soh bagèndari, kasa oda ipadiat aku mergeraha mengalo musuh Rajai?”

⁹Ialoi si Akhis mo, “Ibettoh kono ngo, ukum aku kuètong ngo kono setia bagè malaèkat Dèbata. Tapi enggo iputusken pakalima-pakalima i, ukum kono oda ndorok dekket mergeraha rebbak dekket kami.

¹⁰Kumernaken i alè Daud, njengkas baremben kennah kèkè mo ko dekket karina sienggo menadingken si Saul, molih mo kènè mbincar kessa mataniari.”

¹¹Kumarna i, njengkas sibarembenkenna, berkat mo si Daud dekket parangenna molih mi nagerri kalak Palistin, tapi ukum balapergunggung kalak Palistin berkat ngo mi Jizreel.