Read Batak Dairi 1 Samuel 3 Bible Online

1 Samuel 3 - Batak Dairi bible

1 Samuel 3

¹Tikala bagidi, si Samuel anak-anak i dèng dak tong ngo mengkebasi JAHOWA ibas penjamotien si Eli. Sinderrangna i jarang kalohon ngo roh tennah bak alaten bai JAHOWA nai.

²Tikan sada berngin sidang meddem si Eli sienggo tua-tua kalohon i i bilikna,

³janah si Samuel meddem ngo i gembar Pèti Perpadanen JAHOWA i bages Undung-undung Simbadia. Tikan madèng mbincar mataniari janah lakat dèng togok,

⁴idilo JAHOWA mo si Samuel nai ialoi si Samuel mo, “Kadè alè Pa!”

⁵Nai lojang mo ia mendahi si Eli ninganna mendokken, “Kadè pana alè Pa? Kasa idilo kono aku?” Tapi ialoi si Eli mo, “Oda kudilo ko, meddem mo ko.” Nai laus mo si Samuel mengolihi meddem.

⁶Kessa i idilo JAHOWA nola ma mo si Samuel, tapi oda ngo ibettoh si Samuel JAHOWA ngo simendiloisa i, kerna oda dèng nung mengerana JAHOWA dekketsa. Kerna i kèkè mo ia mendahi si Eli janah mengkuso, “Kadè pana alè Pa? Kasa mendilo ko Pa?” Ialoi si Eli mo, “Oda lot kudilo ko alè pa; lako mo balik meddem.”

⁸Idilo JAHOWA nola mo si Samuel petellu kaliken; nai kèkè mo si Samuel mendahi si Eli ninganna idoken, “Kadè pana alè Pa? Kasa mendilo ko, pa?” Gabè satdar mo si Eli, JAHOWA ngo mendiloi anak i.

⁹Kumarna i idokken si Eli mo taba si Samuel, “Olihi mo meddem janah mula idiloi nola ko dokken mo, ‘Mengerana mo ko alè JAHOWA, mendengkohken ngo naposomèn.’ ” Nai laus nola mo si Samuel mi pedemenna.

¹⁰Nai roh mo JAHOWA cènder i bekkas i janah mendilo dèng ma, “Samuel, Samuel!” Mèter ialoi si Samuel mo, “Mengerana mo ko alè JAHOWA, mendengkohken ngo naposomèn.”

¹¹Nai nina JAHOWA mo mbangsa, “Naing lot bakinenKu mahantu taba kalak Israel, janah gabè lengang ngo barang isè mendengkohsa.

¹²Tikan ari i saut mo Kubaing karina sienggo Kuasupken i taba si Eli, i bennana nai soh mi puncana.

¹³Enggo Kubagahken bana, kennah Kuhukum pemparenna kumernaken pengelèai dukak-dukakna taba Aku. Ibettoh si Eli ngo dosa kalak idi, tapi oda ngo ilagai ukum kalak i.

¹⁴Kumarna i Kusumpahken mo tersèngèt pemparen si Eli, magahken dosa kalak i simbelgah i oda tersasa pèlèen tah persembahen barang kadè sambing pè i soh mi amman sumendah.”

¹⁵Enggo kessa i meddem nola mo si Samuel, janah ceggenna nola kèkè mo ia ibukai mo pèntu bages JAHOWA. Mbiar ngo ia magahken alaten i taba si Eli,

¹⁶tapi idilo si Eli mo ia, nina mo, “O Samuel anakku.” Ialoi si Samuel mo, “Uè alè Pa.”

¹⁷Ikusoi si Eli mo, “Kadè ngo ibagahken JAHOWA bamu? Sukutken mo bangku karina. Mula lot barang kadè irusiaken kono, kennah ihukum Dèbata ngo kono.”

¹⁸Nai ibagahken si Samuel mo karinana i taba si Eli. Singkebabah poda lot irusiaken ia. Enggo kessa i idokken si Eli mo, “JAHOWA ngo Ia, ilaluken mo kadè dok atèNa mendè.”

¹⁹Makin mbelgah mo si Samuel. Idengani JAHOWA ngo ia janah saut ngo masa karinana bagè sinidokken si Samuel i.

²⁰Kernana i ngo asa karina kalak Israel i suberri aur menuhu-nuhui, ukum si Samuel tuhu ngo nabi JAHOWA. Gennep mengerana si Samuel, idengkohken karina bangsa Israel ngo ia. Dak tong ngo ipacidah JAHOWA dirina i Silo, imo perlebbè ipacidah diriNa taba si Samuel janah mengeranai dekketsa.