Read Batak Dairi 1 Samuel 30 Bible Online

1 Samuel 30 - Batak Dairi bible

1 Samuel 30

¹Dua ari nai nola, molih mo si Daud dekket parangenna mi kuta Ziklag. Soh kessa kalak i idapet mo enggo ijuhap kalak Amalek kan jèhè nagerri Juda janah enggo ijuhap kuta Ziklag. Sada kalak pè oda nemmu lot ibunuh kalak i. Tapi ilekkup kalak i ngo kuta i kerri, janah iembah kalak i ngo daberru-daberru, anak-anak dekket kalak sidèbanna simerian i kuta i. Itaban kalak i ma ngo bak kadè-kadè si Daud bang dukak-dukak parangenna pè, dekket ngo sinibages si Daud, imo si Ahinoam dekket si Abigail. Soh mo marsakna atè si Daud, dekket parangenna, gabè oda meradi-adi kalak i mertangisen sanga ledja.

⁶Susah kalohon ngo iakap parangen si Daud kumarnaken kembalangen dukak-dukak bak sinibagesna. Jadi naing mo ibentiri kalak i si Daud dekket batu. Nai tersessak kalohon mo iakap si Daud, tapi ipetegguh JAHOWA Dèbata ngo ukurna.

⁷Nai idokken si Daud mo taba Imam Abyatar anak si Ahimelekh, “Embahken mo misèn èfod idi!” Nai itaruhken si Abyatar mo èfod i tabasa.

⁸Nai ikusoi si Daud mo JAHOWA, “Kennah kujalang ngo nuhnuhen penjuhap i? Dapet dèng ngo ia kuayaki?” Ialoi JAHOWA mo, “Uè, ayaki mo; dapet dèng ngo kalak i, janah paluah mo karina sitertaban i.”

⁹Nai rebbakken mo berkat si Daud dekket parangenna si ennem ratus kalak i. Soh kessa kalak i mi Laè Besor, iterrusken si Daud mo merdalan rebbak dekket empat ratus kalak; tading ngo ukum sidua ratus kalak nai i sidi, kumarna enggo ledjasu kalak i gabè maknè tersuberangisa laè Besor i.

¹¹Tikan merdalan i, pesimbak mo parangen si Daud i dekket sada kalak daholi anak Mesir i jampalen, nai iarahken kalak i mo ia taba si Daud. Nai iberrè kalak i mo ia mangan bak mènum,

¹²bagi ma kuè buah kayu ara dekket dua tangkè buah anggur nipeperra. Enggo kessa ia pul mangan, mengolihi nola mo gegohna; keppèken enggo tellu ari ia oda mangan oda mènum.

¹³Nai ikusoi si Daud mo ia, “Isè ngo indukmu janah i dikè nai ngo kono?” Ialoi mo, “Kalak Mesir ngo aku, hamba ni sada kalak Amalek. Itadingken indukku ngo aku tellu ari sienggo laus i, kumarna sakiten aku.

¹⁴Mulak menjuhap nagerri kalak Kreti kan jèhè Juda nai ngo kami dekket ladang marga Kaleb. Janah enggo kerri kuta Ziklag kulekkup kami.”

¹⁵Nai ikusoi si Daud nola mo ia, “Nggèut ngo ko mabai aku mi bekkas penamun i?” Ialoi mo, “Uè ngo aku, asal ijandiken Rajai bangku, merkitè gerar Dèbata, oda ibunuh kono aku barang pè ipesakat kono bai indukku kin.”

¹⁶Nai ibabai mo kalak i mi bekkas penamun i. Tikanna i mèrap ngo penamun i mi suberri bekkas nisidi, ninganna mangan, mènum janah meroang-oang kumarna buèna harta taban-tabanen niembah kalak i i tanoh Palistin dekket i tanoh Juda nai.

¹⁷Langat kessa mo ari sibarembenkenna, ijuhap si Daud mo kalak i, gabè soh berngin cibonna i terrus geraha i. Pellin empat ratus kalak matah dèng dagingna mo kessa maluah kumarna mperrus kalak i masang unta.

¹⁸Nai ipaluah si Daud mo karinana sienggo irampasi kalak Amalek i dekket sinibagesna sidua kalak i.

¹⁹Kadè poda lot mbalang. Karinana daholi bang daberru dekket harta taban-tabanen kalak Amalek i, itaban si Daud nola ngo.

²⁰Laènkenna i, itaban si Daud dèng ma ngo karina biri-biri dekket pinakan. Iarak parangen si Daud mo karina pinakan i kan lebbè, jaè ipas harta tabanen sidèbanna nai, janah nina kalak i, “Milik si Daud ngo karina èn!”

²¹Enggo kessa i balik mo si Daud mendapetken sidua ratus kalak siledjasu mengèkutkensa, nitadingkenna i biding Laè Besor. Isimbaki kalak i mo si Daud dekket parangenna i, nai ijolmiti si Daud mo kalak i karina lako menalami.

²²Lot mo parangen si Daud sidekket mengèkutkensa i kalak jahat bana nahaka. Nina mo, “Kalak èn oda ngo dekket; jadi oda terolih ia ipas harta taban-tabanen i nai. Pellin dukak bak sinibagesna i mo kessa bagianna, janah laus mo kalak i.”

²³Tapi ialoi si Daud mo, “Kènè alè de- nganku, ulang mo bagidi ibaing kènè tersèngèt kadè sienggo iberèken JAHOWA banta. Otang enggo iondingi kita janah mennang kita ibaing mengalo nuhnuhen penamun i?

²⁴Isè poda ndorok menuhu-nuhui pendokken bagidi. Karina kennah terolih janah dos buèna; kalak sitading menjaga barang, kennah terolih janah dos bagè kalak silaus mergeraha.”

²⁵Nai gabè sada hatoren mo i ibaing si Daud, janah iulaken kalak Israel ngo bagidi soh bagèndari.

²⁶Balik kessa mo si Daud mi Ziklag, itengesken mo dèba harta taban-tabanen i taba pengulu-pengulu kuta Juda, sienggo mengurupisa, ninganna idokken, “En mo luahku bamu ipas harta taban-tabanen nai sikutaban kami bai musuh JAHOWA nai.”

²⁷Kuta siterolih i imo: Betel bak Rama kan jèhè Juda, kuta Jatir, Aroër, Sifmot, Estemoa, Rakhal, bagi ma bang kuta kalak Jerahmeel, kuta kalak Keni, Horma, Bor-Asan, Atakh dekket Hebron. Bagi ma ngo karina kuta sipernah bekkas si Daud kadap rebbak dekket parangenna, itengesken ma ngo luahna.