Read Batak Dairi 1 Samuel 31 Bible Online

1 Samuel 31 - Batak Dairi bible

1 Samuel 31

¹Sinderrangna i mergeraha ngo kalak Palistin mengalo kalak Israel i delleng Gilboa. Mèduk ngo matè kalak Israel i sidi, sidèbanna i mperrus ngo bagi ma bak si Saul dekket anakna.

²Tapi ijalang kalak Palistin ngo kalak i. Tellu kalak anak si Saul matè ibunuh, imo si Jonatan, si Abinadab dekket si Malkisua.

³Makin sebbuna ngo geraha i i gembar si Saul, janah ia pè kenna mo ipanah musuh, mparah ngo ugahna i.

⁴Nai idokken si Saul mo taba simerembah sinjatana, “Sintak mo peddangmu janah bunuh mo aku, asa ulang irèhè-rèhèi bak ibunuh kalak siso menandai JAHOWA aku.” Tapi oda ngo uè naposo i menikamsa, kumarna merkebiaren ngo ia bana. Nai gabè, iberkat si Saul mo peddangna sendiri, idabuhken mo bana mi mata peddangna i.

⁵Idah naposo i kessa mo enggo kumellip si Saul i, ijembaken ma mo bana mi mata peddangna nai matè ma mo ia i gembar si Saul.

⁶Bagi mo permatè si Saul rebbak dekket anakna sitellu i bak karina parangenna i matè ibagasen sidari.

⁷Idengkoh kalak Israel simerian i napa Jizreel dekket kan kebincaren Laè Jordan kessa mo enggo mperrus bala pergunggung Israel, dekket bagi ma si Saul bak dukak-dukakna pè enggo matè, gabè mperrus ma mo kalak i i kuta i nai. Nai ikunduli kalak Palistin mo karina kuta i.

⁸Sibarembenkenna tikan roh kalak Palistin lako mupusi barang ipas bangkè-bangkè i nai, idah kalak i mo bangkè si Saul dekket bangkè anakna sitellu i i delleng Gilboa.

⁹Igettap kalak i mo kerahong si Saul, ibuat ma mo baju perangna. Nai iutus kalak Palistin mo pasulakkenna meningtingken mi suberri nagerri Palistin, asa karina kalak bettoh-bettohen i bagi ma dekket sembahen kalak i.

¹⁰Nai ipennep kalak i mo baju perang si Saul i mi bages sembahen Asytoret, janah ilabangken badanna mi dingding kuta Bet-Sean.

¹¹Tapi idengkoh pengisi kuta Jabes i Gilead ngo pemaing kalak Palistin taba si Saul i,

¹²nai berkat mo kalak i siberranina i sidi nai janah merdalan mo kalak i suntuk bernginkenna i mi Bet-Sean. Ipesampur kalak i mo bangkè si Saul dekket bangkè anakna sitellu i i dingding rkuta i nai, iembah mi Jabes, janah itutung.

¹³Ipepulung mo karina tulan-tulanna, ikuburken mo i terruh kayu tamariska i kuta i, nai puasa mo kalak i pitu ari dekkahna.