Read Batak Dairi 1 Samuel 4 Bible Online

1 Samuel 4 - Batak Dairi bible

1 Samuel 4

¹Tikala i ipedempu kalak Palistin mo karina soridaduna lako geraha taba kalak Israel. Kumerna i, soridadu kalak Israel pè tumpu mo lako mergeraha. Mermarkas mo kalak i i gembar Eben-Haezer, tapi ukum soridadu kalak Palistin mermarkas i Afek ngo.

²Ijuhap soridadu kalak Palistin mo soridadu kalak Israel. Enggo kessa purpar geraha i, talu mo kalak Israel janah matè mo empat ribu kalak tikan geraha i.

³Balik kessa mo soridadu sitalu i mi markasna, nina pengulu kalak Israel mo, “Kasa ndia cubelli JAHOWA, gabè italuken kalak Palistin kita ari èn? Aci mo sialengi Pèti Perpadanen JAHOWA i Silo nai. Siembah mo mi sèn asa uè JAHOWA me- ngurupi kita janah paluahken kita i musuhta nai.”

⁴Nai ipasulak kalak i mo mi Silo lako mengaleng Pèti Perpadanen JAHOWA, sibagè tahta JAHOWA Pergegoh Sisotercodi. Anak si Eli sidua i, imo si Hofni dekket si Pinehas dekket ngo mengarak Pèti Perpadanen i.

⁵Soh kessa mi markas Pèti Perpadanen i, mersurak nggang kalohon mo kalak Israel sanga bagè mbungkar tanoh èn.

⁶Idengkoh kalak Palistin ma ngo sora surak i, nai nina kalak i mo, “Kasa mersurak-surak kalak Heber i?” Tapi ibettoh kalak i kessa mo enggo soh keppè Pèti Perpadanen JAHOWA mi perundung-undungen kalak Heber,

⁷gabè buradan mo kalak i janah nina mo samahsa, “Lot ngo sembahen roh mi markas kalak i. Cilaka mo kita. Oda nung dèng sirasai bagidi.

⁸Tuhu ngo cilaka. Isè mo ndorok roh lako paluahken kita bai Dèbata sembahen simergegoh i nai? Otang Dèbata sembahen i ma ngo simemunuh kalak Mesir i Padang gurun arnia?

⁹Petegguh mo ukurmu alè kalak Palistin. Geraha mo kènè bagè daholi. Ukum oda, gabè hamba kalak Heber i mo kènè, tosè bagè kalak i iperhamba kènè arnia. Kumarna i mertuhu-tuhu mo geraha.”

¹⁰Nai juhap mo kalak i, italuken kalak Palistin mo soridadu kalak Israel. Mperrus mo kalak Israel mi markasna gennep. Ketaluen mbellen ngo i, ai sanga 30.000 soridadu kalak Israel matè.

¹¹Irampasi musuh kalak Israel mo Pèti Perpadanen Dèbata, janah matè mo duana anak si Eli imo si Hofni dekket si Pinehas

¹²Lot mo sada kalak marga Benjamin mperrus i pergerahaen i nai janah laus mi Silo. Soh ngo ia sidarinkenna i. Sikira tanda bonek enggo iribaki olesna janah ibaing tanoh mi babon takalna.

¹³Ukum si Eli kundul ngo ipas karosi i biding dalan ninganna bonek memikirken Pèti Perpadanen JAHOWA. Isukutken jelma simperrus i kessa mo enggo talu kalak Israel, mèter derru-derru mo karina pengisi kuta i.

¹⁴Mendengkoh derru-derru i, mengkuso mo si Eli, “Sora kadè ngo simèngèr i?” Ningan bagi lojang mo simperrus i ndai mendahi si Eli. Soh kessa mo ia, ibagahken mo berita mara i.

¹⁵Ukum si Eli enggo mo merumur sibahpuluh ualuh tahun janah enggo ramben penengenna.

¹⁶Nina kalak i mo taba si Eli, “Mperrus ngo aku i perjuhapen nai ari èn janah i dèng mo soh mi sèn.” Ikusoi si Eli mo ia, “Bakunè ngo berita tersèngèt anakku?”

¹⁷Ialoi simerembah berita i mo, “Enggo mperrus kalak Israel i perjuhapen dekket kalak Palistin nai. Ketaluen mbellen ngo sempa taba kita. Mèduk ngo jelma enggo matè bagi ma ngo dekket dukakmu sidua kalak i alè Pa, imo si Hofni dekket si Pinehas. Pèti Perpadanen JAHOWA i pè irampasi musuh ngo.”

¹⁸Ibagahken kessa mo tersèngèt Pèti Perpadanen i, mèter runggang mo si Eli i karosina nai kan pèntu pengkeruhen. Kumarna enggo tua-tua kalohon ia janah kalak nggomok, gabè ntalpek mo kerahongna janah matè mo ia. Sanga ngo iuluken ia kalak Israel empatpuluh tahun dekkahna.

¹⁹Ibas katika i, ukum purmaèn si Eli imo sinibages si Pinehas mendè ngo dagingna janah enggo ndessing katikana lako ketaring. Idengkoh kessa mo enggo irampasi dèba Pèti Perpadanen Dèbata janah simatuana bak sinibalèna pè enggo matè, sintempu mèter rabisen mo ia. Nai mèter ketaring mo ia.

²⁰Tikan naing-naing matè ia, idokken daberru-daberru simengurupisa i mo tabasa, “Sobar mo ko! Daholi ngo dukakmu èn.” Tapi oda ngo ialoi nè janah oda iperatè-atèken nè kalak i.

²¹Ibaing mo gerar si dukak i si Ikabod, ai nina, “Enggo itadingken Dèbata simermulia i kalak Israel.” — Ukum maksudna imo irampasi dèba Pèti Perpadanen janah simatuana bak sinibalèna pè enggo matè. Kumarna i idokken mo, “Enggo itadingken Dèbata simermulia i kalak Israel, kerna irampasi dèba Pèti Perpadanen Dèbata.”