Read Batak Dairi 1 Samuel 5 Bible Online

1 Samuel 5 - Batak Dairi bible

1 Samuel 5

¹Enggo kessa irampasi kalak Palistin Pèti Perpadanen Dèbata, iarak kalak i mo i Eben-Haezer nai mi kuta Asdod.

²Iembah kalak i mo Pèti i masuk mi bages sembahen kalak i mergerar Dagon. Igamparken mo i gembar gana-gana sembahen i.

³Roh kessa mo kalak Asdod njengkas siberembenkenna mi sembahen i, idah kalak i mo enggo tangkep mi tanoh gana-gana Dagon i i hadeppen Pèti Perpadanen JAHOWA. Ipekèkè kalak i mo gana-gana i janah iulakken mi bekkasna kin.

⁴Tapi ceggen siberembenkenna i, idah kalak i ma mo enggo tangkep gana-gana i i hadeppen Pèti Perpadanen i. Ukum sikali i ntalpek ngo takal bak duana tangan gana-gana i janah gampar i lebbè pèntu; pellin badan gana-gana idi nai ngo kessa mbèntur.

⁵(Ingo sebabna, asa soh sidari èn ilangkahi imam Dagon dekket kalak simenembahsa i Asdod ngo pèntu sapo Dagon i, oda nè mendedoh.)

⁶Nai ihukum JAHOWA mo pengisi Asdod dekket kuta sikulilingna merkitè mer-mbutulen daging kalak i.

⁷Idah kalak i kessa mo simasa bai kalak idi, nina kalak idi mo, “Dèbata kalak Israel i ngo menghukum kita bak sembahen Dagon i. Ulang mo sibelli Pèti Perpadanen i tading ndekkah i sènda.”

⁸Kerna i idilo kalak i mo raja Palistin silima i, lako tumpu, ninganna mengkusoken, “Bakunè ngo sibaing Pèti Perpadanen Dèbata kalak Israel i?” Ialoi raja-raja i mo, “Ompat kènè mo mi kuta Gat.” Nai iompat kalak i mo Pèti i mi kuta Gat, imo sada laènken kuta kalak Palistin.

⁹Tapi soh kessa mo Pèti i mi kuta i, ihukum JAHOWA ma mo kuta i, janah gontar kalohon mo kalak i. Karina pengisi kuta i anak-anak barang simbelgah pè ihukum ngo merkitè mer-mbutulen daging kalak i.

¹⁰Itaruhken mo Pèti Perpadanen i mi kuta Ekron, imo laèn kuta kalak Palistin i dèng ma. Soh kessa mo Pèti idi mi sidi, mèter isurakken pengisi kuta i mo, “Iembah ngo Pèti Perpadanen Dèbata kalak Israel mi sèn lako mengeripasken kita karina.”

¹¹Kumernaken i idilo kalak i mo mertumpu karina raja kalak Palistin, nai idokken mo, “Balikken mo Pèti Perpadanen Dèbata kalak Israel i mi bekkasna kin asa ulang ibunuh kita bang dukak-dukakta pè.” Gontar mo suberri kuta i, kumerna toko ngo berratna hukum Dèbata mi pengisina.

¹²Kalak siso matè, ihukum merkitè mbessar baroh-barohen, gabè dilo-dilo mo kalak i taba sembahen kalak i, lako mido pengurupien.