Read Batak Karo KEJADIN 11 Bible Online

KEJADIN 11 - Batak Karo bible

KEJADIN 11

¹Mula-mula nai sada nge cakap ras kata si ipake manusia i belang-belang doni enda.

²Berkat manusia e kempak matawari pultak, e maka seh ia i bas sada taneh kendit i Babilon. I je me ia ringan.

³Nina sapih-sapih ia, “Mari! Sibahanlah batu bata, kenca bage situtung gelah piher.” E maka enggo lit i bas ia batu bata jadi bahan bangunen, ras ter guna bahan perekatna.

⁴Nina ka kalak enda, “Sibahanlah sada kuta ras menara, tampukna seh ku langit, gelah arah e terberita gelarta, janah la kita merap i babo doni enda.”

⁵E maka nusur TUHAN ngenen kuta ras menara si enggo ipajekken kalak enda.

⁶Nina TUHAN, “Genduari kalak enda sada bangsa ras sada cakap; enda me bena-bena i bas kerina pendahinna. Lanai ndekahsa kuga pe beluh ia erbahan kai pe atena!

⁷Ota nusur Kita, sipecah cakapna jadi melala gelah lanai ia siangkan sapih-sapih ia.”

⁸E maka ikerapken TUHAN kalak ndai ku belang-belang doni enda. Kenca bage lanai iteruskenna majekken kuta e.

⁹E me sabapna maka kuta ndai igelari Babil, erkiteken TUHAN enggo nggawer cakap manusia, janah i jenari me TUHAN ngkerapken manusia ku belang-belang doni enda.

¹⁰Enda me sinursur Sem. Dua tahun kenca banjir e, tupung umur Sem 100 tahun, ipupusna sada anak dilaki, Arpaksat gelarna.

¹¹Kenca si e lit ia nggeluh 500 tahun nari, janah ipupusna denga anak-anakna tole.

¹²Kenca umur Arpaksat 35 tahun lit ka anakna dilaki Selah gelarna.

¹³Kenca si e lit 403 tahun nari ia nggeluh janah ipupusna denga anak-anakna tole.

¹⁴Kenca umur Selah 30 tahun lit anakna dilaki Eber gelarna.

¹⁵Kenca si e lit 403 tahun nari ia nggeluh janah ipupusna denga anak-anakna tole.

¹⁶Kenca umur Eber 34 tahun lit anakna dilaki Peleg gelarna.

¹⁷Kenca si e lit 430 tahun nari ia nggeluh janah ipupusna denga anak-anakna tole.

¹⁸Kenca umur Peleg 30 tahun lit anakna dilaki, Rehu gelarna.

¹⁹Kenca si e lit 209 tahun nari ia nggeluh janah ipupusna denga anak-anakna tole.

²⁰Kenca Rehu 32 tahun tubuh anakna dilaki Seruh gelarna.

²¹Kenca si e 207 tahun nari ia nggeluh, janah ipupusna denga anak-anakna tole.

²²Kenca umur Seruh 30 tahun, tubuh anakna dilaki, Nahor gelarna.

²³Kenca si e 200 tahun nari ia nggeluh janah ipupusna denga anak-anakna tole.

²⁴Kenca umur Nahor 29 tahun, tubuh anakna dilaki, Terah gelarna.

²⁵Kenca si e 119 tahun nari Nahor nggeluh, janah ipupusna denga anak-anakna tole.

²⁶Kenca umur Terah 70 tahun, tubuh telu anakna dilaki e me: Abram, Nahor, ras Haran.

²⁷Enda me sinursur Terah, bapa Abram, Nahor, ras Haran. Haran e me kap bapa Lut.

²⁸Haran mate i bas kutana jine i Ur Babilon, asum bapana nggeluh denga.

²⁹Abram ngempoi Sarai, Nahor ngempoi Milka. Milka ras Jiska duana anak Haran.

³⁰Sarai la banci mupus.

³¹Terah berkat i kuta Ur, i Babilon nari ku negeri Kanaan. Seh i Haran i je ia erkuta. Si ikut berkat ras ia e me kap anakna Abram, kempuna Lut ras permainna Sarai.

³²I Haran me Terah mate i bas umur 205 tahun.