Read Batak Karo KEJADIN 12 Bible Online

KEJADIN 12 - Batak Karo bible

KEJADIN 12

¹Nina TUHAN man Abram, “Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi. [32†]

²Nterem Kubahan sinursurndu, janah e me pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu.

³Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa.” [33†]

⁴Kenca umur Abram 75 tahun, berkat me ia i Haran nari bagi si isuruh TUHAN. Si Lut pe berkat ras ia.

⁵Abram maba ndeharana Sarai, Lut anak seninana, kerina erta-ertana, ras budak-budakna si idatsa sanga ia i Haran, jenari berkat ia ku Kanaan. Kenca seh i Kanaan,

⁶isiar-siarna kerina daerah e, janah dungna seh ia ku batang kayu Moreh, e me ingan ersembah i Sikem. (Paksa e kalak Kanaan ngianisa taneh e.)

⁷Icidahken TUHAN baNa man Abram, janah nina, “Enda me negeri si Kubereken man si nursurndu pagi.” Jenari, ibahan Abram sada batar-batar ingan persembahen man TUHAN si enggo teridah bana. [34†]

⁸Kenca bage miser Abram ku Selatan, ku taneh uruk-uruk si lit arah Timur Betel, janah ipajekken Abram kemahna kelang-kelang Betel ras Ai. Betel arah matawari ben, Ai arah matawari pultak. I je pe ibahanna ka batar-batar ingan persembahen, janah isembahna TUHAN.

⁹Jenari pindah-pindah ka ia i bas sada ingan ku ingan si deban. Kenca si e lawes ia ku taneh Kanaan bagin Selatan.

¹⁰Tapi jadi me kelihen si mesangat i taneh Kanaan, janah erkiteken si e erdauhna Abram lawes ku Selatan, ku negeri Mesir, guna ringan i je kentisik.

¹¹Nandangi seh i Mesir nina Abram man ndeharana Sarai, “Situhuna seh kal kam jilena.

¹²Adi iidah kalak Mesir kam, tentu ikatakenna kam ndeharangku; erkiteken si e ibunuhna aku tapi kam ipelepasna nggeluh.

¹³E maka katakenlah man kalak Mesir, maka turangku nge kam, gelah erkiteken kam, la ibunuhna aku, tapi mehuli perbahanna man bangku.” [35†]

¹⁴Kenca Abram seh i Mesir iidah kalak Mesir maka ndehara Abram seh kal jilena.

¹⁵Piga-piga kalak si ngidahsa e, e me pegawai istana; e maka ituriken pegawai ndai man raja kuga jilena rupa Sarai. Erkiteken si e Sarai ibaba ku istana raja.

¹⁶Erkiteken Sarai, maka mehuli kal perbahanen raja man Abram, seh maka iberekenna man Abram melala biri-biri, kambing, lembu, kelede, suruh-suruhen, ras unta.

¹⁷Tapi erkiteken ibuat raja si Sarai iukum TUHAN ia ras kalak si ringan i bas istanana alu penakit si ngeri.

¹⁸E maka idilo raja si Abram, isungkunna ia, “Uga kin perbahanenndu e! Engkai maka la ikatakenndu maka ndeharandu nge si Sarai?

¹⁹Engkai maka ikatakenndu ia turangndu janah ipelepasndu ia kubuat jadi ndeharangku? Enda ndeharandu ndai, baba, lawes kam jenda nari!”

²⁰E maka isuruh raja piga-piga kalak pegawaina, jenari ipelawesna Abram ras ndeharana ras kerina sikerajangenna i bas negeri e nari.