Read Batak Karo KEJADIN 13 Bible Online

KEJADIN 13 - Batak Karo bible

KEJADIN 13

¹Abram nadingken Mesir; lawes ku Utara, nuju kempak Selatan Kanaan radu ras ndeharana ras kerina erta-ertana. Lut pe ikut.

²Abram bayak namura; melala biri-birina, kambingna, lembuna, pirakna bage pe emasna.

³Kenca bage itadingkenna ingan e, lawes ia i bas sada ingan ku ingan si deban, nuju kempak Betel. Seh ia ku daerah kelang-kelang Betel ras Ai, inganna erkemah mbarenda.

⁴I je ipajekkenna sada batar-batar ingan ersembah man TUHAN.

⁵Lut pe lit keluargana, suruh-suruhenna, biri-birina, kambingna ras lembuna.

⁶Erkiteken si e lanai cukup mbalmbal man bana duana, perban buena asuh-asuhenna.

⁷E maka rubati permakan Abram ras permakan Lut. (Tupung e kalak Kanaan ras Peris denga ngiani negeri e.)

⁸Nina Abram man Lut, “Setangke denga kap kita, la mehuli adi rubati suruh-suruhenku ras suruh-suruhenndu.

⁹Si mehulina siranglah kita. Pilih mbalmbal si arah apai kin atendu. Adi kam kempak kawes aku kempak kemuhen. Adi kam kempak kemuhen aku kempak kawes ”

¹⁰Itatap Lut kelewet, janah iidahna maka kerina Baluren Lau Jordan seh kempak kuta Soar melala launa, bali ras peken TUHAN ntah pe taneh Mesir. Si enda ope denga TUHAN ngkernepken kuta Sodom ras Gomora. [36†]

¹¹E maka ipilih Lut kerina Baluren Lau Jordan jadi sikerajangenna jenari lawes ia kempak Timur. Bagenda me persirang-sirangen kalak enda duana.

¹²Abram ringan i negeri Kanaan, Lut erkemah i kuta-kuta baluren deher Sodom.

¹³Kalak Sodom jahat dingen erdosa man TUHAN.

¹⁴Kenca lawes Lut nina TUHAN man Abram, “I bas inganndu tedis enda nari tataplah kelewet.

¹⁵Kubereken ateKu man bandu ras man sinursurndu kerina taneh si idahndu e jadi sikerajangenndu seh rasa lalap. [37†]

¹⁶Kubereken me man bandu kesusuren si seh kal teremna, seh maka ise pe la ngasup meligaisa. Bagi gebuk taneh la terbeligai, bage me pe kesusurenndu la terbeligai.

¹⁷Genduari, siarilah kerina negeri e, sabap Kubereken me e kerina man bandu.”

¹⁸E maka ipiser Abram kemahna dingen ringan deher Kayu Kramat Mamre i Hebron. I je ipajekkenna batar-batar man TUHAN.