Read Batak Karo KEJADIN 14 Bible Online

KEJADIN 14 - Batak Karo bible

KEJADIN 14

¹Lit me empat kalak raja, e me Amrapel raja Babilon, Ariuk raja Elasar, Kedorlaomer raja Elam, Tidal raja Goyim.

²Empatna raja enda erperang ngelawan lima raja si deban e me: Bera raja Sodom, Birsa raja Gomora, Sinah raja Adma, Semeber raja Seboim ras raja Bela (tah Soar).

³Limana raja-raja enda ipersadana arihna ras gegehna i Baluren Sidim, e me Lawit Mate si genduari.

⁴Enggo sepuluh dua tahun raja-raja enda ndai limana lit i teruh kuasa Kedorlaomer, tapi i bas tahun si pesepuluh teluken ngelawan ia kerina.

⁵I bas tahun si pesepuluh empatken, Raja Kedorlaomer ras teman-temanna reh ras tenterana janah italukenna kalak Repaim i Asterot Karnaim, kalak Susim i Ham, kalak Emim i kendit Kiryataim,

⁶ras kalak Hori i deleng Edom, janah iayakna kalak enda ndai seh ku Elparan, i tepi gurun pasir.

⁷Kenca mulihken ia, seh ia i Kades (sanga si e igelari Enmispat). Ikuasaina kerina taneh kalak Amalek ras italukenna kalak Amori si ringan i Hasason Tamar.

⁸Kenca bage raja Sodom, Gomora, Adma, Seboim, ras Bela ipepulungna tenterana guna erperang i Baluren Sidim, jenari erperang ia

⁹ngelawan raja Elam, Goyim, Babilon ras Elasar, empat raja ngelawan lima raja.

¹⁰I bas Baluren Sidim, melala kal lubang-lubang si isin ter. E maka sanga raja Sodom ras Gomora kiam atena i bas peperangen e nari ndabuh ia ku bas lubang-lubang ndai. Tapi telu raja si deban sempat selamat kiam ku deleng-deleng.

¹¹Empat raja si menang ndai muat kai si banci ibuatna i Sodom ras Gomora, termasuk pe barang si banci ipan, jenari lawes ia.

¹²Lut, anak senina Abram ringan i Sodom, e maka ia pe ras barangna ikut ibaba kalak enda.

¹³Tapi lit sekalak si la ikut tertangkap. E maka iturikenna kejadin e man Abram, kalak Heber e. Tupung si e Abram sangana ringan deher sada batang kayu sikerajangen Mamre, kalak Amori. Mamre ras senina-seninana, e me kap Eskol ras Aner, duana teman Abram.

¹⁴Kenca enggo ieteh Abram maka anak seninana tertaban, iaturkenna anak buahna si beluh erperang, 318 kalak teremna. Iayakina raja-raja si empat ndai terus ku Dan.

¹⁵I je ibagi Abram kalak enda jadi piga-piga terpuk, e maka sanga berngi, iserangna musuh e. Italukenna kerina. Iayak-ayakna seh ku Hobah arah Utara Damaskus.

¹⁶Kerina barang rampasen e idatsa mulihken. Lut, anak seninana bage pe erta-ertana ras kerina diberu-diberu ras tabanen si deban ibaba Abram mulihken.

¹⁷Sanga Abram mulih i bas naluken Raja Kedorlaomer ras raja-raja si deban, ndarat raja Sodom ngalo-ngalo ia ku berneh Sawe (si igelari Baluren Raja).

¹⁸Bage pe, Malkisedek raja Salem, imam Dibata si Meganjangna, maba roti ras anggur man Abram. [38†]

¹⁹Ipasu-pasuna Abram janah nina, “Dibata si Meganjangna, si enggo njadiken langit ras doni masu-masu Abram!

²⁰Terpujilah Dibata si Meganjangna si enggo mereken kemenangen man bandu naluken musuh-musuhndu!” E maka ibereken Abram sepersepuluh i bas kerina barang-barang rampasen si idatsa ndai man Malkisedek.

²¹Nina raja Sodom kempak Abram, “Man bandulah kerina barang-barang rampasen e, tapi iulihken min bangku rayatku.”

²²Nina Abram ngaloi, “Ersumpah aku i lebe-lebe TUHAN Dibata si Meganjangna, si njadiken langit ras doni,

²³maka la kai pe ateku bangku i bas sikerajangenndu e, selambar benang ntah sada nali sepatu pe lang, gelah ola pagi ikatakenndu maka perbanndu maka aku bayak.

²⁴Sada pe la ateku kubuat jadi sikerajangenku, seakatan si enggo ipake anak buahku. Tapi berekenlah temanku Aner, Eskol, Mamre, muat baginna.”