Read Batak Karo KEJADIN 15 Bible Online

KEJADIN 15 - Batak Karo bible

KEJADIN 15

¹Kenca kejadin si ndai kerina, i bas sada pengenehenen, reh kata TUHAN man Abram nina, “Ola kam mbiar Abram. Aku ngampang-ampangi kam, janah mbelin kal upahndu Kubereken.”

²Tapi erjabap Abram nina, “TUHAN si Mada Kuasa, kai gunana upah si iberekenNdu ateNdu man bangku e, adi labo lit anakku? Si Elieser kalak Damaskus e ngenca si ngalo tading-tadingenku!

³La lit iberekenNdu anak kupupus, janah erkiteken si e, sekalak i bas budakku me enggo jadi si ngalo tading-tadingenku!”

⁴Jenari reh ka kata TUHAN man bana nina, “Labo Elieser si ngalo tading-tadingenndu, tapi anak ipupusndu sendiri nge.”

⁵Ibabai TUHAN Abram ndarat janah nina, “Tarelah ku langit, cubaken beligai bintang-bintang ah; bagi buena bintang-bintang e, bage me pagi teremna sinursurndu.” [39†]

⁶Tek Abram man TUHAN, janah erkiteken kinitekenna e ialoken TUHAN ia selaku kalak benar. [40†]

⁷Jenari nina ka TUHAN, “Aku me TUHAN, si mabai kam ndarat i Ur-Babilon nari, gelah Kubereken taneh enda jadi sikerajangenndu.”

⁸Tapi nungkun Abram, “TUHAN si Mada Kuasa, kuga pemetehku maka taneh enda si kerajangenku denggo?”

⁹Nina TUHAN, “Baba man bangku sada lembu beru-beru, sada kambing beru-beru, sada biri-biri beruna, kerina umur telu tahun, bage pe sada ndukur, ras sada nderapati si nguda denga.”

¹⁰Ibaba Abram rubia-rubia ndai man TUHAN. Kenca ikeret-duakenna, itamakenna petingtang keret-keret rubia-rubia ndai i bas dua baris. Tapi ndukur ras nderapati la ikeret-duakenna.

¹¹Perik-perik si man daging cinep i babo bangke rubia-rubia e, tapi igurba Abram.

¹²Sanga matawari nandangi sundut, tertunduh me Abram janah badeh kal pertunduhna; kenca bage gelap si mehantu reh man bana. [41†]

¹³Nina TUHAN man Abram, “Sinursurndu jadi perlajang denggo i negeri kalak; jadi budak pagi ia i je, janah mesui kal atena ibahan kalak 400 tahun dekahna. [42†]

¹⁴Tapi Kuukum pagi bangsa si mperbudaksa janah asum ia ndarat i bas negeri kalak e nari, melala mekelek ibabana kebayaken. [43†]

¹⁵Kerna dirindu sendiri, cawir metua me kam pagi, mate alu dame jenari ikuburken.

¹⁶Kenca empat kesusuren pagi maka sinursurndu mulih ku jenda, sabap langa pagi kupelawes kalak Amori adi langa kin seh jahatna janah patut iukum.”

¹⁷Kenca enggo sundut matawari, wari pe enggo gelap, teridah me cimber tempa i bas dapur nari, bage pe tendang gara mentas arah kelang-kelang tektek daging rubia-rubia ndai.

¹⁸I bas ingan e me TUHAN erbahan perpadanen ras Abram nina, “Erpadan Aku mereken taneh enda kerina man sinursurndu mulai i bas perbalengen Mesir nari seh ku Lau Eprat, [44†]

¹⁹termasuk kerina taneh kalak Keni, Kenas, Katmon,

²⁰Heti, Peris, Repaim,

²¹Amori, Kanaan, Girgasi bage pe taneh kalak Jebusi.”