Read Batak Karo KEJADIN 16 Bible Online

KEJADIN 16 - Batak Karo bible

KEJADIN 16

¹Sarai, ndehara Abram, la lit anak ipupusna. Tapi lit sekalak singuda-nguda budak Sarai, Hagar gelarna, ia kalak Mesir.

²E maka nina Sarai man Abram, “Ietehndu maka la ibereken TUHAN aku mupus; dage medemlah kam ras budakku ah, ntah mawen banci ipupusna man bangku sada anak.” Payo iakap Abram kai si ikataken Sarai ndeharana.

³Jenari iberekenna Hagar man Abram. (Kejadin enda terjadi kenca Abram enggo 10 tahun ringan i Kanaan.)

⁴E maka ersada kula me Abram ras Hagar, kenca bage mehuli kula Hagar. Tapi kenca enggo ieteh Hagar maka enggo mehuli kulana, jadi sombong ia, lanai iergakenna Sarai.

⁵Erkiteken si e nina Sarai man Abram, “Kam nge si salah maka Hagar megombang man bangku. Kubereken ia man bandu, tapi kenca itehna maka mehuli kulana lanai iergaina aku. TUHAN lah si jadi hakim i bas kita, ntah ise kita ersalah.”

⁶Erjabap Abram nina, “Budakndu kap ia. Kam erkuasa man bana e maka kuga akapndu mehuli bage ban.” Jenari tuhu-tuhu mesui kal ate Hagar ibahan Sarai, seh maka kiam ia i bas Sarai nari.

⁷Ijumpai malekat TUHAN si Hagar deher sada ulu lau i padang pasir dalan ku Sur,

⁸janah nina, “Hagar, budak Sarai, i janari kam e ndai, janah ku ja atendu?” Erjabap Hagar nina, “Aku kiam nadingken tuanku Sarai.”

⁹Nina malekat ndai, “Mulihlah man bana, janah tetaplah kam jadi budakna.

¹⁰Nterem pagi kubahan sinursurndu, seh maka la lit kalak si ngasup meligaisa.

¹¹Ipupusndu pagi sada anak dilaki, bahan denggo gelarna Ismael, erkiteken enggo ibegiken TUHAN pingko-pingkondu ras kiniseranndu.

¹²Tapi anakndu e denggo bali ras kelede si meliar; kerina kalak ilawanna janah kerina kalak ngelawan ia. Ia serap nggeluh i bas kerina kade-kadena nari.”

¹³Nina Hagar i bas ukurna, “Tuhu-tuhu kin enggo kuidah Dibata, si mperdiateken aku?” E maka igelarina Dibata ndai “El Roi, Dibata si mperdiateken aku”.

¹⁴Erkiteken si enda me maka igelari kalak sumur ndai, “Sumur Dibata Si Nggeluh si enggo mperdiateken aku.” Inganna kelang-kelang Kades ras Beret.

¹⁵E maka ipupus si Hagar sekalak anak dilaki. Bapa anak ndai e me Abram, janah ibahanna gelar anakna e Ismael. [45†]

¹⁶Tupung si e umur Abram 86 tahun.