Read Batak Karo KEJADIN 17 Bible Online

KEJADIN 17 - Batak Karo bible

KEJADIN 17

¹Sanga umur Abram 99 tahun, icidahken TUHAN baNa man Abram, janah nina, “Aku kap Dibata si Mada Kuasa. Erkemalangenlah man bangKu, janah bahanlah lalap rikutken ateKu ngena.

²Kubahan perpadanen ras kam, janah Kubereken man bandu kesusuren si lanai lang-lang teremna.”

³Nembah mungkuk Abram, ayona seh ku taneh, janah nina Dibata,

⁴“Kupadanken bandu: maka kam jadi nini nterem bangsa-bangsa.

⁵Gelarndu lanai Abram tapi Abraham, sabap Kubahan kam jadi nini melala bangsa. [46†]

⁶Nterem kubahan sinursurndu, janah lit i bas sinursurndu e nari jadi raja. Perban teremna denggo sinursurndu, dungna jadi piga-piga bangsa ia.

⁷Aku tetap nginget padanKu man bandu ras man kerina kesusurenndu ersundut-sundut janah perpadanen e tetap rasa lalap. Aku jadi Dibatandu ras jadi Dibata sinursurndu. [47†]

⁸Kubereken man bandu ras man sinursurndu taneh enda, aminna genduari jadi kalak pertandang gia kam i je. Kerina taneh Kanaan jadi sikerajangen sinursurndu rasa lalap, janah aku jadi Dibatana.” [48†]

⁹Nina Dibata kempak Abraham, “Kam pe arus erpadan, matuhi perpadanen enda, subuk kam, bage pe sinursurndu ersundut-sundut.

¹⁰Kam ras kerina kesusurenndu arus isunatken. [49†]

¹¹[11-12] Mulai genduari nari, la banci lang isunatkenndu kerina anak dilaki si umurna enggo waluh wari, subuk anak budak si tubuh i bas rumahndu, bage pe anak budak si itukurndu i bas kalak si deban nari. Sunat e me tandana maka lit perpadanenKu ras kam.

¹³Tep-tep kalak arus isunatken, janah enda me tanda si teridah i bas kulandu si encidahken maka perpadanenKu ras kam tetap rasa lalap.

¹⁴Kerina dilaki si la isunat, la ikira jadi bangsangKu, erkiteken la icikepna perpadanen e.”

¹⁵Nina Dibata man Abraham, “Olanai Sarai ban gelar ndeharandu tapi menaken genduari Sara gelarna.

¹⁶Kupasu-pasu ia, Kubereken ia mupus anak dilaki man bandu; ia jadi nande bangsa-bangsa janah i bas sinursurna nari lit pagi si jadi raja.”

¹⁷Abraham nembah janah ayona seh ku taneh, tapi tawa ia sanga ia rukur, “Banci kin kalak si umurna enggo 100 tahun dat anak denga? Banci kin Sara mupus denga adi umurna enggo 90 tahun?”

¹⁸E maka isungkunna Dibata, “Uga maka la Ismael saja jadi si ngalo tading-tadingenku?”

¹⁹Nina Dibata, “Lang! Ndeharandu Sara nge pagi mupus anak dilaki, janah ibanndulah gelarna Isak. Aku tetap nginget perpadanenKu ras kam bage pe ras sinursurna seh rasa lalap.

²⁰Enggo Kubegi pemindonndu kerna Ismael. Dage Kupasu-pasu ia, Kubereken man bana melala anak ras kempu. Ia jadi bapa sepuluh dua raja, janah Kubahan sada bangsa si mbelin arah ia.

²¹Tapi perpadanenKu Kubahan ras Isak, anak si ipupus Sara i bas tahun si reh, bagi paksa si genduari ka.”

²²Kenca Dibata enggo dung ngerana man Abraham lawes Dibata nadingken ia.

²³I bas wari si e minter ipatuhi Abraham kai si ikataken Dibata. E maka isunatkenna anakna Ismael ras kerina dilaki si lit i bas rumahna subuk anak budak si tubuh i bas rumahna bage pe si itukurna i bas kalak si deban nari.

²⁴Enggo 99 tahun umur Abraham asum ia isunatken,

²⁵janah umur anakna Ismael 13 tahun.

²⁶Duana ia isunatken i bas sada wari,

²⁷ikut pe ras kerina budak-budakna.