Read Batak Karo KEJADIN 18 Bible Online

KEJADIN 18 - Batak Karo bible

KEJADIN 18

¹Ibas sada wari TUHAN encidahken baNa man Abraham deher sada batang-batang kayu si galang i Mamre. Sanga e wari seh kal lasna, janah Abraham sangana kundul i lebe pintun kemahna.

²Tupung ia jurgak idahna telu kalak tedis i lebena. Minter kenca iidah Abraham kalak ndai, kiam ia ngalo-ngalosa. Janahna erjimpuh, ayona seh ku taneh nina, [50†]

³“O Tuan mari ngadi lebe janah singgah ku rumahku. Berelah maka aku ngidangi kam.

⁴Banci kulegiken lau man pemurihi nahendu. I teruh batang kayu enda kam lebe ngadi-ngadi.

⁵Kusikapken lebe pangan man bandu, gelah banci nambahi gegehndu guna nerusken perdalanenndu. Sabap enggo kam reh ku inganku enda, e sada kehamaten man bangku, e maka kuelai ateku kam asa bancina.” Ngaloi kalak si telu ndai, “Bujur adi bage.”

⁶Minter kiam Abraham ku kemahna, janah nina man Sara, “Pedasken, buat tepung si mejilena sada guni, aduk, tasakken jadi roti asa biasna.”

⁷Kenca bage kiam Abraham muat sada lembu si mburna kal tapi nguda denga; paksa entabeh man pangan. E maka iberekenna man sekalak suruh-suruhenna. Minter igeleh suruh-suruhen ndai lembu si ibereken Abraham e, jenari itasakkenna.

⁸Ibuat Abraham susu si mejilena, bage pe daging si enggo itasakken ndai. Kenca bage isikapkenna i lebe-lebe temuena ndai, janah Abraham jine ngelai kalak enda man i teruh batang kayu e.

⁹Isungkun temue e Abraham nina, “I ja Sara ndeharandu?” “Ia i bas kemah,” nina Abraham.

¹⁰Sekalak i bas si telu kalak ndai ngerana nina, “Siwah bulan nari, reh ka Aku ku jenda, i je pagi Sara enggo mupus sada anak dilaki.” Sara megi-megi arah pudina, i balik pintun kemahna nari. [51†]

¹¹Abraham ras Sara enggo seh kal tuana; e maka lanai bo reh bulanna.

¹²E maka tawa Sara nina i bas ukurna, “Banci denga kin merincuh aku man perbulangenku adi aku pe enggo melus, janah perbulangenku pe enggo seh tuana?” [52†]

¹³Jenari isungkun TUHAN si Abraham nina, “Kuga maka tawa Sara nina, ‘Banci denga kin aku mupus adi bagenda tuangku?’

¹⁴Lit kin si metahat i bas TUHAN ? Bagi ningKu ndai siwah bulan nari Aku reh ka ku jenda; i je pagi Sara enggo mupus sada anak dilaki.” [53†]

¹⁵Erkiteken mbiar Sara, merso ia nina, “La kap aku tawa.” “Kueteh nge kam tawa,” nina TUHAN ngaloisa.

¹⁶Kenca bage lawes si telu kalak ndai ku sada ingan, janah i je nari banci ia natap kempak Sodom. Abraham pe ikut naruhkenca.

¹⁷Nina TUHAN i bas ukurNa, “Labo pada Kubuni-buniken man Abraham kerna kai si nandangi Kubahan.

¹⁸Kesusurenna jadi sada bangsa si mbelin ras erkuasa pagi, janah arah ia, Kupasu-pasu kerina bangsa-bangsa.

¹⁹Enggo Kupilih Abraham, gelah banci iperentahkenna anakna ras kesusurenna gelah erkemalangen man bangKu, janah ilakokenna kai si benar ras bujur. Adi bage, Kusehken pagi man bana kasa kai si enggo Kupadanken.”

²⁰Kenca bage nina TUHAN man Abraham, “Lit pengadun si mberat kerna perbahanen si melket i Sodom ras Gomora; dosana enggo seh belinna.

²¹E maka ngincuah ateKu ku jah, pepayosa tuhu tah lang pengadun perbahanen si melket e.”

²²Kenca bage dua i bas temuena ndai nerusken perdalanenna kempak Sodom, tapi TUHAN tading ras Abraham.

²³Ideheri Abraham me TUHAN nina, “Tuhu kin imasapkenNdu ateNdu kalak benar radu ras kalak jahat?

²⁴Adi lit 50 kalak i je kalak si benar, icedakenNdu kang kerina kuta e? La ateNdu iselamatkenNdu, erkiteken si lima puluh kalak e?

²⁵Tentu la ateNdu munuh kalak benar radu ras kalak jahat. E la banci jadi; la banci ilakokenNdu e. Adi icedakenNdu kin kuta e tentu bali ibahanNdu ukumen kalak benar ras kalak jahat. Enda la banci jadi. Adi bage la bujur perbahanen Hakim kerina doni.”

²⁶Ngaloi TUHAN nina, “Adi lit 50 kalak Kujumpai si benar i Sodom, la Kucedaken kuta erkiteken si 50 kalak e.”

²⁷Nina ka Abraham tole, “Ola ateNdu merawa adi kuterusken ngerana ras Kam TUHAN. Aku abu taneh kap ngenca; la lit hakku ngataken kai pe man baNdu.

²⁸Tapi banci jadi 45 kalak ngenca lit si benar, labo 50 kalak. IcedakenNdu kang kerina kuta e erkiteken kurang lima kalak?” Nina TUHAN, “La Kucedaken kuta e adi lit 45 kalak si benar i je.”

²⁹Ngerana ka tole Abraham, “Kuga adi 40 kalak ngenca?” Ijabap TUHAN, “La Kucedaken adi lit 40 kalak.”

³⁰Nina Abraham, “Ola Kam nembeh TUHAN, ngerana denga nge ateku. Kuga adi 30 kalak ngenca lit?” Nina TUHAN, “Adi lit i je 30 kalak, la Kulakoken e.”

³¹Nina Abraham, “Kupiherken menda ngerana man Bandu TUHAN; kuga adi lit 20 kalak lah gia?” Nina TUHAN, “La Kucedaken kuta e adi lit ije 20 kalak.”

³²Nina Abraham, “Ola Kam merawa TUHAN, ateku ngerana sekali nari kal. Kuga adi lit 10 kalak ngenca?” Nina TUHAN, “La Kucedakan kuta e adi lit Aku jumpa 10 kalak si benar i je.”

³³Kenca TUHAN enggo dung ngerana ras Abraham, lawes Ia janah Abraham pe mulih ku inganna.