Read Batak Karo KEJADIN 2 Bible Online

KEJADIN 2 - Batak Karo bible

KEJADIN 2

¹Bage me, enggo dung ijadiken Dibata kerina si nasa lit.

²I bas wari si pepituken enggo idungi Dibata dahinNa. [6†] [7†]

³Ipasu-pasuNa wari si pepituken, iserapkenNa jadi sada wari si badia erkiteken i bas wari e enggo dung kerina si ijadikenNa, janah ngadi Ia.

⁴Bage me turi-turinna kerna kejadin si nasa lit enda. Sanga Dibata njadiken kerina si nasa lit,

⁵langa lit kai pe turah i doni. Langa lit benih ersuli, erkiteken langa ipesusur Dibata udan, janah langa lit ise pe ngusahai taneh e.

⁶Tapi mulai me turah ulu lau i bas taneh, janah e me erbahanca maka enggo litap kerina taneh e ibahanna.

⁷Ibuat TUHAN Dibata sitik abu taneh ijadikenNa jelma; iembuskenNa kesah kegeluhen ku bas igungna, e maka mulai me jelma ndai nggeluh. [8†]

⁸Kenca bage ibahan TUHAN Dibata sada peken i Eden, arah Timur, janah i je me itamakenNa manusia si enggo ijadikenNa e.

⁹IjadikenNa erbage-bage batang kayu si mehuli turah i je janah buahna pe mehuli. I tengah-tengah peken e, lit turah sada batang kayu si mereken kegeluhen ras sada batang kayu si mereken pemeteh kerna si bujur ras si jahat. [9†]

¹⁰I Eden lit sada lau belin, janah ipalerina peken e. Kenca ngepari Eden, lau ndai erbelah empat.

¹¹Si pemena Pisun gelarna, maler ngkeleweti negeri Hawila. (

¹²I je lit emas, si merim-merim, ras batu permata si meherga.)

¹³Si peduaken Gihon gelarna, maler ngkeleweti negeri Kus.

¹⁴Si peteluken, Tigris, maler arah Timur negeri Assur, janah si peempatken Eprat.

¹⁵Kenca bage, itamaken TUHAN Dibata manusia ndai i Peken Eden, guna ngusahai ras njagaisa.

¹⁶Nina Dibata man manusia, “Kerina buah batang kayu si lit i bas peken enda banci ipanndu,

¹⁷seakatan buah batang kayu si mereken pemeteh kerna si bujur ras si jahat. Buah batang kayu e la banci ipanndu; adi ipanndu, la banci lang mate kam i bas wari e.”

¹⁸Kenca bage nina ka TUHAN Dibata, “La mehuli adi manusia nggeluh sisada-sisada. Kubahanlah teman si cocok man bana, guna nampati ia.”

¹⁹E maka ibuatNa sitik abu i bas taneh nari, jenari ijadikenNa kerina rubia-rubia ras perik-perik. Kenca bage ibabaNa man manusia ndai gelah idahNa kai ibahan manusia gelar kerina rubia-rubia ras perik-perik e. Bagenda me dalanna kerina rubia-rubia e ndatken gelarna.

²⁰Ibahan manusia e gelar kerina perik-perik ras rubia-rubia ndai, tapi sada pe la lit jadi teman si cocok nampati ia.

²¹Kenca bage ibahan TUHAN Dibata maka entabeh pertunduh manusia ndai, janah sanga bage, ibuatNa sada tulan rang-rangna, jenari itutupNa ka alu jukut.

²²IjadikenNa sekalak diberu i bas tulan rang-rang e nari kenca bage itaruhkenNa man manusia ndai.

²³Nina manusia e, “Enda nge maka enggo payo; Tulanna i bas tulanku nari, janah jukutna i bas jukutku nari. ‘Diberu’ gelarna perbahan ia ibuat i bas dilaki nari.”

²⁴Em sabapna dilaki nadingken nande bapana, gelah ersada ia ras ndeharana, maka duana enggo jadi sada. [10†]

²⁵Dilaki ras diberu ndai manjang-anjang duana, tapi la ia mela.