Read Batak Karo KEJADIN 20 Bible Online

KEJADIN 20 - Batak Karo bible

KEJADIN 20

¹Miser Abraham i Mamre nari kempak Selatan Kanaan, janah ringan ia kelang-kelang Kades ras Sur. Kenca bage, asum ia ringan bagi kalak pertandang i Gerar,

²ikatakenna maka Sara, e me kap turangna. E maka raja Gerar, si tergelar Abimelek, nuruh kalak gelah ngelegi Sara man bana. [59†]

³I bas sada berngi Dibata encidahken diriNa man Abimelek i bas nipi; nina, “Mate me kam erkiteken ibuatndu diberu enda sabap ia enggo erjabu.”

⁴Tapi Abimelek langa bo ersada kula ras Sara, e maka nina, “TUHAN labo aku salah! IkernepkenNdu kin ateNdu aku ras rayatku?

⁵Abraham jine ngataken maka turangna nge Sara, janah Sara pe bage ka nge nina. Kulakoken enda alu ukur meciho, janah aku langa lit erbahan si lepak.”

⁶Ngaloi Dibata i bas nipi e, “Ue, Kueteh nge maka alu ukur meciho nge ilakokenndu e. E maka Kuambati kam gelah ola kam erdosa bangKu, erkiteken si e maka la Kubere ia ikuitndu pe.

⁷E maka ulihken lah diberu enda man perbulangenna. Perbulangenna e sekalak nabi kap. Ia suruh-suruhen Dibata, janah ia kari ertoto kerna kam maka ola kam mate. Tapi adi la iulihkenndu diberu e, la banci lang mate kam ras rayatndu!”

⁸Pepagina lampas erpagi-pagi idilo Abimelek kerina pegawaina janah iturikenna kai si enggo jadi. E maka mbiar kal ia kerina.

⁹Kenca bage ilebuh Abimelek si Abraham, isungkunina, “Uga perbahanenndu e man kami? Kai kin salah si enggo kubahan man bandu maka ibanndu mara si mbelin e man bangku ras man kerajanku. La mehuli perbahanenndu e.

¹⁰Engkai maka bage ibahanndu?”

¹¹Ngaloi Abraham, nina, “Kuakap kin la lit sekalak pe i jenda kalak si mbiar man Dibata. E maka mbiar aku ibunuh kalak guna ndatken ndeharangku.

¹²Tuhu nge ia turangku. Ia anak bapangku tapi la kami sada nande, e maka kuempoi ia.

¹³Jadi sanga isuruh Dibata aku nadingken rumah bapangku, lawes aku ku negeri si deban, ningku man ndeharangku, ‘Cidahken lah keleng atendu man bangku alu ngataken man kerina kalak maka turangndu nge aku.’ ”

¹⁴Kenca bage iulihken Abimelek si Sara man Abraham, janah radu ras si e iberekenna ka man bana biri-biri, lembu, ras budak dilaki ras diberu.

¹⁵Nina Abimelek man Abraham, “Enda tanehku kerina, banci kam ringan i je arah apai pe atendu.”

¹⁶Nina ka Abimelek man Sara, “Kubereken man turangndu 1000 duit pirak, jadi tanda man kalak kerina maka kam la ersalah, janah kerina kalak meteh si e.”

¹⁷ [17-18] Erkiteken kejadin si jadi i bas Sara, ndehara Abraham e, kerina diberu si lit i bas istana Abimelek lanai banci mupus ibahan TUHAN. E maka ertoto Abraham kerna Abimelek, e maka ipepalem Dibata ia. Bage pe ndehara Abimelek ras budakna si diberu ipepalemNa kerina janah enggo ka banci mupus.