Read Batak Karo KEJADIN 21 Bible Online

KEJADIN 21 - Batak Karo bible

KEJADIN 21

¹Ipasu-pasu TUHAN Sara bagi si enggo ipadankenNa.

²E maka mehuli me kula Sara, jenari ipupusna sekalak anak dilaki man Abraham kenca ia enggo metua. Anak e tubuh i bas paksa si enggo itentuken Dibata, payo bagi si enggo katakenNa mbarenda. [60†]

³Ibahan Abraham gelarna Isak,

⁴janah enggo kenca waluh wari umurna isunatken Abraham ia, bagi enggo iperentahken Dibata. [61†]

⁵Enggo 100 tahun umur Abraham sanga Isak tubuh.

⁶Nina Sara, “Enggo ibaba Dibata man bangku keriahen ras pertawan. E maka kasa kai kalak si megisa la banci lang tawa ras aku.”

⁷Nina Sara tole, “Ise ndube si lit ngataken man Abraham maka Sara banci pepinemken? Aminna bage gia enggo kupupus sada anak dilaki man bana kenca ia enggo metua.”

⁸Tambah warina tambah belinna anak e, janah i bas warina ia ngadi minem, ibahan Abraham sada kerja man-man si mbelin.

⁹I bas sada wari, Ismael anak Abraham si ipupus Hagar, kalak Mesir e, main-main ras Isak anak Sara.

¹⁰Iidah Sara kalak enda, e maka nina man Abraham, “Suruh budak e lawes ras anakna. Anakna e, la banci daten tading-tadingenndu si arus ialoken anakku Isak.” [62†]

¹¹Erkiteken si e gulut ukur Abraham, sabap Ismael pe anakna kang.

¹²Tapi nina Dibata man Abraham, “Ola aru atendu kerna anak e ras budakndu Hagar. Bahanlah bagi si ikataken Sara man bandu, erkiteken arah Isak nge rehna sinursurndu si enggo Kupadanken e. [63†]

¹³Man anak budak e pe Kubereken nge anak nterem, gelah ia jadi sada bangsa. Sabap ia pe anakndu nge.”

¹⁴Pepagina, lampas erpagi-pagi ibereken Abraham man Hagar pangan bage pe sada ingan lau si ibahan i bas kuling-kuling nari si dem isina. Ipetembahkenna anak e ku gurung Hagar, jenari isuruhna lawes. E maka lawes Hagar, mampa-mampa ia i bas taneh si mesawang Berseba.

¹⁵Kenca enggo keri lau si ibabana ndai, iamparkenna anakna e i teruh batang kayu kitik.

¹⁶Ia jine kundul i bas ingan si deban kira-kira 100 meter dauhna. Nina i bas ukurna, “La aku ngasup ngenehen anakku mate.” Sanga ia kundul i je mulai me anak e tangis.

¹⁷Ibegi Dibata sora anak e tangis, e maka ngerana malekat Dibata i langit nari man Hagar, “Kai kiniseranndu Hagar? Ola mbiar. Enggo ibegi Dibata sora anakndu serko.

¹⁸Kekeken, legi lah janah pesinik lah ia sabap Kujadiken pagi kesusurenna jadi sada bangsa si mbelin.”

¹⁹Kenca bage ipemedakken Dibata mata Hagar, e maka idahna me sada sumur. E maka lawes ia ku sumur e, i isina kuling-kuling ingan lau ndai, jenari iberena minem anakna.

²⁰Dibata nemani anak e, erbelinna ia; ringan ia i taneh mesawang Paran. Ia jadi sekalak perburu si beluh.

²¹Ibuat nandena sekalak diberu bangsa Mesir man ndeharana.

²²I bas sada paksa sanga lawes Abimelek ras puanglimana Pikol, nina man Abraham, “Dibata ras kam i bas kerina si idahikenndu. [64†]

²³E maka ersumpahlah i lebe-lebe Dibata maka la itebu-tebundu aku, anak-anakku, ntah pe kesusurenku. Bagi perbahanenku bujur man bandu, erpadanlah maka kam pe bujur ka nge perbahanenndu man bangku, ras man negeri si iani kam genduari e.”

²⁴Nina Abraham, “Erpadan aku.”

²⁵Tapi ituriken Abraham keberatenna man Abimelek kerna sumur si irampas suruh-suruhen Abimelek alu paksa.

²⁶Nina Abimelek, “La kueteh ise ngelakokenca e. Kam pe la ngata bangku, janah sekali enda denga nge kubegi kerna si e.”

²⁷Jenari ibereken Abraham piga-piga biri-biri ras lembu man Abimelek, e maka erbahan perpadanen kalak enda duana.

²⁸Iserapken Abraham pitu anak biri-biri permakanenna,

²⁹e maka isungkun Abimelek ia nina, “Kai ertina maka iserapkenndu anak biri-biri si pitu e.”

³⁰Ijabap Abraham, “Alokenlah anak biri-biri enda pituna. Alu ngaloken si e, kam jadi saksi maka aku nge kalakna si engkali sumur e.”

³¹Erkiteken si e ingan e igelari Berseba sabap i je me kalak enda duana ersumpah.

³²Kenca enggo dung ibahanna perpadanen e i Berseba, mulih me Abimelek ras Pikol puanglimana ku negeri kalak Pilisti.

³³Jenari isuan Abraham sada batang kayu tamariska i Berseba, jenari nembah ia man TUHAN, Dibata Si Rasa lalap.

³⁴Ndekah Abraham ringan i negeri kalak Pilisti.