Read Batak Karo KEJADIN 23 Bible Online

KEJADIN 23 - Batak Karo bible

KEJADIN 23

¹Dekahna Sara nggeluh lit 127 tahun.

²Ia mate i Hebron i taneh Kanaan, janah megogo kal ate Abraham erkiteken kematen Sara.

³Itadingkenna ingan mait ndeharana, lawes ia ku bangsa Heti, janah nina,

⁴“Aku kalak tandang i jenda; e maka kutukur ateku tanehndu, ingan ngkuburken ndeharangku.” [71†]

⁵Ijabap kalak ndai,

⁶“Begiken lebe Tuan. Kam iakap kami kalak si mbelin, e maka kuburkenlah ndeharandu e i bas kuburen si mejilena kal si lit i bas kami. Meriah kal ukur kami kerina mereken kuburen man bandu, gelah banci i je ikuburkenndu ndeharandu.”

⁷Kenca bage erjimpuh Abraham i lebe-lebe kalak enda,

⁸nina, “Adi senang atendu, kukuburken ateku ndeharangku i jenda. E maka pindondu sitik man Epron anak Sohar,

⁹maka kutukur min Gua Mahpela, si ndeher ras tepi jumana. Sungkun ia ntah banci idayakenna e bangku. Asa kai ergana banci kugalari i jenda i lebe-lebendu, gelah banci kubahan e jadi taneh kuburen sikerajangenku.”

¹⁰Tupung si e Epron sangana kundul ras kalak Heti si deban i bas ingan runggu i gerbang kuta e; asum kerina kalak megisa erjabap ia nina,

¹¹“Begiken Tuan; kubereken man bandu kerina juma e ras gua si lit i je. I jenda i lebe-lebe bangsangku jine, kubereken man bandu ingan e gelah banci ikuburkenndu ndeharandu i je.”

¹²E maka erjimpuh Abraham i lebe-lebe kalak Heti e,

¹³jenari nina man Epron, “Ngarap aku gelah megi-megi kam kerina. Kutukur me dage juma e. Aloken lah tukurna i bas aku nari, gelah kukuburken ndeharangku ije.”

¹⁴Erjabap Epron nina,

¹⁵“Tuan, erga juma e 400 duit pirak ngenca kai lah e ertina i bas kita duana? Kuburkenlah ndeharandu i je.”

¹⁶Payo akap Abraham, e maka ibeligaina duit pirak e asa pemindon Epron si ibelaskenna i adep-adepen jelma si nterem, e me 400 duit pirak, sue ras timbangen si ipake perbinaga.

¹⁷Bage me turi-turinna, maka taneh Epron si i Mahpela, arah matawari pultak Mamre, enggo jadi sikerajangen Abraham. Si itukurna e, e me kap juma, gua si lit i bas juma e, ras kerina batang kayu si i bas juma e seh ku tepi taneh e.

¹⁸Kerina kalak Heti si ikut i bas perjumpan e, enggo jadi saksi maka taneh e genduari Abraham empuna.

¹⁹Kenca bage ikuburken Abraham ndeharana Sara i bas gua e i taneh Kanaan.

²⁰Erkiteken si e maka juma si nai kalak Heti empuna, ras gua si lit i je, genduari enggo jadi sikerajangen Abraham si ibahanna jadi taneh kuburen.