Read Batak Karo KEJADIN 24 Bible Online

KEJADIN 24 - Batak Karo bible

KEJADIN 24

¹Genduari Abraham enggo seh kal tuana, janah ipasu-pasu TUHAN ia i bas kerina si idahikenna.

²Nina man suruh-suruhenna si metuana, si ngurus kerina erta-ertana, “Amparken tanndu kelang-kelang pahangku, jenari ersumpahlah.

³Ateku maka ersumpah kam i bas gelar TUHAN, Dibata langit ras doni, maka la ibuatndu beru Kanaan enda jadi ndehara anakku Isak.

⁴La banci la mulih kam ku negeri asalku, gelah ibuatndu diberu man anakku Isak, i bas kade-kadengku nari.”

⁵Tapi nungkun suruh-suruhen ndai nina, “Uga adi la pagi nggit si nguda-nguda e nadingken rumahna ngikut ras aku ku taneh enda? Banci nge kutaruhken anakndu ku negeri asalndu?”

⁶Ijabap Abraham, “E ola kal! Ola kal isuruhndu anakku mulih ku jah!

⁷TUHAN, Dibata si mada langit, enggo maba aku i rumah bapangku nari, i bas taneh keluargangku nari ku ingan enda. Dibata enggo ersumpah man bangku maka iberekenNa taneh enda man kesusurenku. Ia pagi si nuruh malekat arah lebendu, gelah idatndu sada diberu i jah man anakku.

⁸Adi singuda-nguda e la pagi nggit ngikut ras kam, enggo nangtang kam i bas perpadanen enda. Tapi amin kai pe jadi, ola kal babandu anakku mulih ku jah.”

⁹Kenca bage itamaken suruh-suruhen ndai tanna i kelang-kelang paha Abraham, tuanna, jenari ersumpah ia maka idahikenna kerina bagi si ipindoken Abraham e.

¹⁰E maka ibuat suruh-suruhen Abraham ndai sepuluh unta tuanna, jenari lawes ia ku kuta ingan Nahor ringan ndube, e me arah Utara Mesopotami.

¹¹Kenca ia seh i jah, ipengadina unta ndai deher sumur i darat kuta. Wari nandangi ben, janah sangana kal diberu-diberu rehen ku sumur e ngelegi lau.

¹²Ertoto suruh-suruhen ndai nina, “O, TUHAN, Dibata tuanku Abraham, bahanlah maka seh sura-surangku sendah, janah ingetlah padanNdu ras tuanku Abraham.

¹³Genduari aku sangana ndeher ku sumur enda, i ja singuda-nguda kuta enda nandangi reh ngelegi lau.

¹⁴Kuperkuanken kari sekalak i bas singuda-nguda e ningku, ‘Pesusur sitik ingan laundu, maka banci aku minem!’ Adi ngaloi ia, ‘Minemken, untandu pe banci kupeminem,’ singuda-nguda si e min si itetapken Kam man suruh-suruhenndu Isak. Adi jadi kari bage, enggo kueteh maka itepatiNdu kepe padanNdu ras tuanku.”

¹⁵Langa pe ia dung ertoto, enggo seh Ribka i je maba ingan lau i babo barana. Ribka anak Betuil si diberu, janah Betuil e me anak Nahor si dilaki, ras ndeharana Milka. Nahor e me senina Abraham.

¹⁶Ribka e me sekalak singuda-nguda si seh kal jilena, janah ngincuah ia kempak sumur ngisi ingan launa, jenari mulih ia.

¹⁷Kiam suruh-suruhen Abraham ndahi ia, jenari nina, “Banci kang kuinem sitik laundu ena?”

¹⁸“Minemken Tuan,” nina singuda-nguda e. Pedas-pedas ipesusurna ingan launa i bas barana nari, e maka itunggahina suruh-suruhen ndai.

¹⁹Kenca enggo dung ia minem nina singuda-nguda ndai, “Lau inemen untandu pe banci nge kulegi asa biasna.”

²⁰Pedas-pedas iusekenna launa ku bas pelangkah ingan minem rubia-rubia si lit i je, jenari kiam ia ku sumur ndai ngelegi lau tole, seh puas kerina untana ndai minem.

²¹Alu sinik-sinik, iperdiateken suruh-suruhen ndai singuda-nguda e, metehsa ntah payo enggo isehken TUHAN sura-surana.

²²Kenca singuda-nguda ndai enggo dung mere minem unta-unta e, ibuat suruh-suruhen e sada anting-anting emas si meherga, itamakenna ku igung singuda-nguda e, janah gelang emas si galang igelangkenna i bas tanna.

²³Jenari nina, “Anak ise kin kam? Lit kang ingan i bas i rumahna man inganku erberngi ras teman-temanku?”

²⁴“Bapangku Betuil, anak Nahor ras Milka,” nina singuda-nguda e njabapsa.

²⁵“Nggala ras gagaten man nakan asuh-asuhen pe melala nge i rumah kami, janah inganndu erberngi pe lit nge.”

²⁶E maka erjimpuh suruh-suruhen e nembah ia man TUHAN.

²⁷Nina, “Terpujilah TUHAN, Dibata tuanku Abraham, si tetap nteguh ncikep perpadanenNa ras tuanku Abraham. Enggo ibabai TUHAN aku pinter ku kade-kade tuanku.”

²⁸Kenca bage kiam singuda-nguda e ku rumah, iturikenna kasa kai si enggo jadi.

²⁹Lit sekalak turang Ribka, Laban gelarna, janah enggo ibegina kai si enggo ituriken turangna man bana.

³⁰Bage pe enggo ka idah Laban anting-anting i bas igung turangna, ras gelang i bas tanna. E maka kiam ia ndahi suruh-suruhen ndai si sangana tedis ras untana deherken sumur e.

³¹Jenari nina Laban, “Mari ras kita ku rumah. Kam kalak si enggo ipasu-pasu TUHAN. Engkai maka tedis kam i darat enda? Enggo sikap kamar i rumahku man inganndu, bage pe lit nge ingan man kerina untandu.”

³²Dage ku rumah me suruh-suruhen e. Itangtangi Laban baban unta e, iberena nggala ras gagaten. Man suruh-suruhen Abraham ras teman-temanna, ibabana lau man pemurihi nahena.

³³Kenca enggo sikap nakan man pangan nina suruh-suruhen e, “Aku langa nggit man, adi langa kubelasken kai si arus kukataken.” Nina Laban, “Belasken lah!”

³⁴“Aku kap suruh-suruhen Abraham,” nina menaken ranan.

³⁵“Tuhu-tuhu enggo ipasu-pasu TUHAN tuanku Abraham. Ibahan TUHAN ia jadi kalak bayak. Enggo ibereken TUHAN man tuanku melala biri-biri, kambing, lembu, pirak, emas, budak-budak dilaki ras diberu, bage pe unta ras kelede.

³⁶Sara, ndehara tuanku, enggo mupus sekalak anak dilaki kenca ia enggo metua. Enggo ibereken tuanku kerina kebayakenna man anak e.

³⁷Isuruh tuanku aku erpadan alu ersumpah, maka tetap kuikutken perentahna. Nina tuanku, ‘Ola kal ibuatndu singuda-nguda kalak Kanaan man ndehara anakku.

³⁸Tapi lawes lah ku bangsa bapangku, ku kade-kadengku, janah pilihlah i je diberu man anakku.’

³⁹E maka kusungkuni tuanku, ‘Uga adi singuda-nguda e la nggit ngikut ras aku?’

⁴⁰Ijabapna nina, ‘ TUHAN si kusembah i bas geluhku, Ia si nuruh malekat ras kam gelah sangap kam i bas tugasndu. Idatndu nge pagi diberu man anakku i bas bangsangku nari, e me i bas keluarga bapangku nari.

⁴¹Sada ngenca dalanndu nangtang i bas sumpahndu e nari, e me: adi lawes kam ndahi kade-kadengku, tapi itulakna kam, e enggo nangtang kam i bas sumpah e nari.’

⁴²Ndai kenca seh aku i sumur, ertoto aku, ‘ TUHAN, Dibata tuanku Abraham, berelah maka seh sura-surangku i bas tugasku enda.

⁴³Genduari i deher sumur enda aku. Adi lit kari singuda-nguda muat lau atena, kupindo kari man bana maka iberena minem aku alu ingan launa.

⁴⁴Adi iberena kari, janah lau man untangku pe ibabana ka, ia me kalakna si enggo ipilihNdu jadi ndehara man anak tuanku.’

⁴⁵Ope denga aku dung ertoto, reh Ribka maba ingan lau i babo barana ku sumur e muat lau. Ningku man bana, ‘Enta sitik laundu ena, minem kal ateku.’

⁴⁶Pedas-pedas ipesusurna ingan launa, jenari nina, ‘Minemken, untandu pe banci kubere minem!’ E maka minem aku, janah unta e pe iberena minem.

⁴⁷Kusungkun ia, ‘Ise bapandu?’ Ijabapna nina, ‘Bapangku si Betuil, anak Nahor ras Milka.’ Kenca bage kutamaken anting-anting i bas igungna ras gelang i bas tanna.

⁴⁸Erjimpuh aku nembah muji TUHAN, Dibata tuanku Abraham, si enggo naruhken aku pinter ku kade-kade tuanku, i ja enggo jumpa aku ras anakna si diberu man ndehara anak tuanku.

⁴⁹Genduari adi atendu nehken tanggung jawabndu ras keleng atendu man tuanku, katakenlah man bangku; adi lang pe katakenlah lang, maka kueteh kai arus kubahan.”

⁵⁰Erjabap Laban ras Betuil nina, “Kai si jadi e, i bas TUHAN nari kap, e maka labo kami si erbahan keputusen e.

⁵¹Enda kap si Ribka; babalah ia jadi ndehara anak tuanndu, bagi si enggo ikataken TUHAN.”

⁵²Kenca ibegi suruh-suruhen Abraham kata enda, erjimpuh ia nembah TUHAN.

⁵³Kenca bage, ipedaratna uis, bage pe perhiasen emas ras pirak, jenari iberekenna man Ribka. Bage pe iberekenna barang-barang si meherga man turang ras nande Ribka.

⁵⁴Kenca bage maka man ras minem suruh-suruhen Abraham ras teman-temanna si ngikut ras ia, janah i je ia erberngi. Kenca ia enggo keke erpagi-pagi nina suruh-suruhen e, “Ateku mulih min ku tuanku.”

⁵⁵Tapi nina nande Ribka ras turangna, “Seminggu ntah sepuluh wari narilah gia min diberu enda ras kami i jenda, jenari kari lawes gia ia labo dalih.”

⁵⁶Tapi nina suruh-suruhen e, “E ola kal ambati aku. Enggo ibere TUHAN maka sangap perdalanenku, e maka berelah aku mulih ku tuanku.”

⁵⁷Nina kalak ndai ngaloi, “Adi bage kin, sidilo lah Ribka e, ntah kuga nina.”

⁵⁸E maka idilona Ribka, isungkunna nina, “Nggit kam berkat ras kalak enda?” “Nggit,” nina ngaloi.

⁵⁹Erkiteken si e ipelepas kalak enda me Ribka ras si rembahisa nai berkat ras suruh-suruhen Abraham, ras teman-teman suruh-suruhen e.

⁶⁰Ipasu-pasu kalak enda Ribka nina, “Jadilah kam Ribka, nande erjuta-juta kalak. Italuken kesusurenndu gelah pagi kuta-kuta musuh-musuhna.”

⁶¹Kenca bage ersikap-sikap me Ribka ras piga-piga kalak suruh-suruhenna si deban, jenari iersakna unta, berkat ia ras suruh-suruhen Abraham.

⁶²I bas paksa e Isak mbaru denga seh i gurun pasir si tergelar “Sumur Dibata si nggeluh si mperdiateken aku”. Ia sanga ringan i bagin Selatan Kanaan.

⁶³Karaben-karaben ndarat ia erdalan-dalan i bas mbalmbal, jenari iidahna unta reh.

⁶⁴Kenca idah si Ribka Isak, minter nusur ia i datas untana nari.

⁶⁵Isungkunna suruh-suruhen Abraham nina, “Ise dilaki si erdalan kempak kita i bas mbalmbal ah?” “Ia kap tuanku,” nina suruh-suruhen ndai njabapsa. Erkiteken si e, minter ibuat Ribka selendangna, itutupina ayona.

⁶⁶Ituriken suruh-suruhen e man Isak kasa kai si enggo ilakokenna.

⁶⁷Kenca bage ibaba Isak me Ribka ku kemah si nai iingani nandena, Sara. Ribka jadi ndehara Isak. Ngena kal ate Isak man Ribka, janah erkiteken si e terapul ia aminna gia nandena enggo mate.