Read Batak Karo KEJADIN 25 Bible Online

KEJADIN 25 - Batak Karo bible

KEJADIN 25

¹Iempoi Abraham ka diberu si deban, Ketura gelarna.

²Arah perjabunna e tubuh si: Simran, Joksan, Medan, Midian, Isbak, ras Suah.

³Joksan e me Bapa Syeba ras Dedan, janah kesusuren Dedan e me bangsa Ashur, Letus, Leum.

⁴Anak Midian e me: Epa, Eper, Henoh, Abida, ras Eldaa. Enda me kerina kesusuren si Ketura.

⁵Kerina erta-erta Abraham itadingkenna man Isak,

⁶tapi sanga ia nggeluh denga iberekenna erta-erta man anak-anakna si dilaki si tubuh arah ndeharana si deban. Kenca bage isuruhna kerina anak-anakna e kempak negeri Timur ndauh i bas anakna Isak nari.

⁷ [7-8] Abraham mate kenca ia enggo metua kal, i bas umur 175 tahun.

⁹Ia ikuburken anakna Isak ras Ismael i gua Mahpela, i juma si Epron anak Sohar kalak Heti e, arah Timur Mamre.

¹⁰Juma e, e me si enggo itukur Abraham i bas kalak Heti e nari. I je me Abraham ras ndeharana Sara ikuburken. [72†]

¹¹Kenca enggo mate Abraham, ipasu-pasu Dibata me anakna Isak, si ringan deherken “Sumur Dibata si nggeluh si mperdiateken aku”.

¹²Enda me gelar-gelar kesusuren Ismael anak Abraham, si ipupus Hagar, kalak Mesir, budak Sara e.

¹³Gelar-gelar anakna e isuratken mulai i bas sintua nari: Nebayot, Kedar, Adbeel, Mipsam,

¹⁴Misma, Duma, Masa,

¹⁵Hadat, Tema, Jetur, Napis, ras Kedma.

¹⁶Kalak enda me nini sepuluh dua suku, janah gelar-gelar kalak enda enggo ipake jadi gelar kuta ras gelar ingan-ingan erkemah.

¹⁷Sanga Ismael mate umurna 137 tahun.

¹⁸Kesusuren Ismael ringan kelang-kelang Hawila ras Sur, arah Timur Mesir, i bas dalan ku Assur. Kalak enda ndauh sirang ras kesusuren Abraham si deban.

¹⁹Enda me turi-turin kerna Isak anak Abraham.

²⁰Umur Isak enggo empat puluh tahun tupung ia erjabu ras Ribka. Ribka e me anak Betuil turang Laban. Betuil e me kalak Aram i Mesopotami nari.

²¹Erkiteken langa lit anak Ribka, ertoto Isak man TUHAN kerna ia. Ibegiken TUHAN pertotonna, e maka mehuli me kula Ribka.

²²Kepeken anak si nandangi ipupusna e rindu, janah ope denga anak e tubuh si lawanen ia duana i bas bertin nandena. Nina Ribka, “Engkai maka jadi bagenda i bas aku?” Erkiteken si e lawes ia nungkun man TUHAN.

²³Nina TUHAN man bana, “Lit dua bangsa i bas bertinndu nandangi ipupusndu me dua bangsa si ermusuhen gegehen agina asa kakana sintua jadi suruh-suruhen singuda.” [73†]

²⁴Seh me paksana Ribka mupus, ipupusna anak dilaki rindu.

²⁵Sintua megara-gara rupana, kulitna bagi jubah si ermbulu. E maka ibahan gelarna Esau.

²⁶Sanga tubuh singuda icikepna nteguh kal tukul-tukul Esau. E maka ibahan gelarna Jakup. Umur Isak enggo 60 tahun sanga kalak ndai tubuh.

²⁷Duana anak e reh belinna. Esau jadi perburu si beluh, janah riahen akapna tading i bas kerangen. Tapi Jakup, biak persinik, dekahen tading i rumah.

²⁸Adi si Isak ngenan atena Esau erkiteken entabeh akapna man bekas Esau erburu, tapi Ribka ngenan ka atena Jakup.

²⁹I bas sada wari sanga itasakken Jakup sitik kacang megara, Esau mulih i bas erburu nari. Melihe kal ia,

³⁰e maka nina man Jakup, “Melihe kal aku; enta sitik pangan si megara-gara ena.” (Em sabapna maka igelari ia Edom.)

³¹Nina Jakup njabapsa, “Banci kubereken, adi iberekenndu bangku hakndu selaku anak sintua.”

³²Nina Esau, “Bage-bage! Mate me atena aku, kai gunana aku anak sintua?”

³³Nina Jakup, “Ersumpah dage kam lebe maka iberekenndu hak kinituanndu man bangku.” E maka ersumpah Esau, iberekenna hak kinituanna man Jakup. [74†]

³⁴Kenca bage maka ibereken Jakup man bana roti ras kuah kacang megara e. Minter ia man ras minem, jenari lawes ia. Bage me si Esau, la kal akapna meherga kinituanna.