Read Batak Karo KEJADIN 27 Bible Online

KEJADIN 27 - Batak Karo bible

KEJADIN 27

¹Tupung si e Isak enggo metua, janah enggo seleng matana. Idilona anakna sintua Esau nina man bana, “O anakku.” “Kai, Bapa,” nina Esau ngaloi.

²Nina Isak, “Idahndu nge kap maka aku enggo metua. Tah lanai bo ndekah aku nggeluh.

³Buat dage panah ras anak panahndu. To ku kerangen kam erburu, buat sada rubia-rubia man bangku.

⁴Tasakken man bangku pangan si entabeh kuakap, jenari baba man bangku. Kenca kupan, kupasu-pasu ateku kam ope aku mate.”

⁵Tapi sanga ercakap-cakap Esau ras Isak kepeken ibegiken Ribka. E maka kenca lawes Esau erburu,

⁶nina Ribka man Jakup, “Enda denga nge kubegi ikataken bapandu man Esau,

⁷‘To buat sada rubia-rubia, tasakken e bangku. Kenca kupan, kupasu-pasu kam i lebe-lebe TUHAN ope denga aku mate.’ ”

⁸“E maka anakku,” nina Ribka tole, “Begiken ras ikutken kai si kukataken.

⁹To pilihi dua kambing si mburna, gelah kutasakken sitik pangan si ntabehna kal akap bapandu.

¹⁰Kenca bage ibabandu kari man bana gelah ipanna, maka ipasu-pasuna kam ope ia mate.”

¹¹Tapi nina Jakup man nandena, “Ietehndu nge Esau kalak si ermbulu badanna, tapi aku lang.

¹²Ntah idadap bapa kari aku, ma ietehna kutipu ia? Alu bage sumpah nge dat aku, labo pasu-pasu.”

¹³Nina nandena, “Aku nanggungsa sumpah si seh man bandu anakku. Bahanlah bagi si kukataken, to lah buat kambing e man bangku.”

¹⁴E maka lawes Jakup muatca, ibabana man nandena, itasakkenna kuga akap Isak entabeh.

¹⁵Kenca bage ibuat Ribka me baju Esau si mejilena kal, si ibunikenna i bas rumah e, jenari isuruhna ipake Jakup.

¹⁶Itamakenna kulit kambing e i bas tan Jakup, ras bage pe i bas kerahungna si la lit mbuluna.

¹⁷Iberekenna pangan si entabeh e man Jakup, rikut pe ras roti si enggo itasakkenna.

¹⁸Kenca bage lawes me Jakup ku bapana nina, “O, Bapa!” “Kai,” nina bapana ngaloi, “Ise kin kam?”

¹⁹“Aku kap Esau, anakndu sintua; enggo kulakoken bagi si isuruhndu. Kundul kam bapa, gelah ipanndu sitik pangan si kubaba enda, gelah ipasu-pasundu aku,” nina Jakup njabapsa.

²⁰Nina Isak, “Uga maka bage pedasna dat kam, anakku?” Erjabap Jakup, “TUHAN Dibatandu kap si nampati aku ndatkenca.”

²¹Nina Isak man Jakup, “Mari terdeheren ku jenda gelah banci kam kudadap. Tuhu kin lah kam Esau?”

²²Ideheri Jakup bapana. Icikep bapana ia nina, “Sorandu bali ras sora Jakup, tanndu bali ras tan Esau.

²³La itandai Isak si Jakup sabap tanna ermbulu bagi tan Esau. Menam ipasu-pasuna Jakup,”

²⁴tapi isungkunna ka nina, “Tuhu kam Esau?” “Tuhu Bapa,” nina Jakup.

²⁵Nina Isak, “Baba dage sitik pangan e bangku, gelah kenca kupan, kupasu-pasu kam.” Ibaba Jakup pangan e man bapana, bage pe ibabana ka anggur man inemenna.

²⁶Kenca bage nina bapana man bana, “Mari terdeheren, emma aku anakku.”

²⁷Sanga iemana bapana, ianggeh Isak bau uis anakna, e maka ipasu-pasuna anakna Jakup. Nina Isak, “Bau anakku si merim bali ras bau juma si enggo ipasu-pasu TUHAN. [78†]

²⁸Dibata mereken embun man bandu i langit nari si mahan jumandu mehumur. Ia lah si mereken man bandu mbue gandum ras anggur.

²⁹Bangsa-bangsa jadi suruh-suruhenndu gelah, janah nembah ia kerina man bandu. Kam lah si merentah senina-seninandu, sinursur nandendu pe nembahlah man bandu. Kalak si numpahi kam, kena sumpah, kalak si masu-masu kam dat pasu-pasu.” [79†]

³⁰Kenca enggo dung Isak mereken pasu-pasuna, minter kenca Jakup lawes, reh seninana Esau i bas perburun nari.

³¹Ia pe nasakken pangan si entabeh, jenari ibabana ku bapana nina, “O Bapa, kekeken, pan dage pangan si kubaba enda, gelah banci aku ipasu-pasundu.”

³²“Ise kin kam?” nina Isak nungkun. “Anakndu sintua, Esau,” nina njabapsa.

³³Sengget Isak, nggirgir kerina dagingna, e maka isungkunna, “Adi bage, ise dage ndai si enggo enggeleh rubia-rubia, janah si enggo mabasa bangku? Ope denga kam reh enggo kupan, enggo kupasu-pasu ia alu pemasu-masunku si pengkeri-kerinna, janah erkiteken si e enggo jadi sikerajangenna seh rasa lalap.”

³⁴Kenca ibegi Esau e, serko ia alu sora megang. Ngilas kal akapna, janah nina, “Aku pe pasu-pasu min, Pa!”

³⁵Nina Isak njabapsa, “Enggo ndai reh agindu, itipuna aku. Enggo ibuatna pasu-pasundu.”

³⁶Nina Esau, “Enda me pedua kaliken aku itipuna. Payo me gelarna Jakup. Enggo ibuatna hakku selaku anak sintua, genduari pasu-pasungku ka ibuatna. Lanai nge lit pasu-pasundu si man bangku?” [80†]

³⁷Nina Isak njabapsa, “Enggo kubahan ia jadi tuanndu, enggo kubahan maka kerina senina-seninana jadi suruh-suruhenna. Enggo kubereken man bana gandum ras anggur. Genduari kai kal pe lanai banci kubahan man bandu anakku!”

³⁸Isekseki Esau lalap bapana nina, “Sada kin ngenca pasu-pasundu, Bapa? Aku pe pasu-pasu min!” E maka mulai ia tangis. [81†]

³⁹E maka nina Isak man bana, “Lanai lit embun i langit nari man bandu, lanai lit juma si mehumur man bandu. [82†]

⁴⁰Kam nggeluh arah pedangndu, tapi kam suruh-suruhen seninandu. Tapi bage pe, adi la kam nggit, kam banci nangtang i bas kuasana nari.” [83†]

⁴¹Erkiteken si e nembeh ate Esau man Jakup, perban bapana enggo mereken pasu-pasuna man Jakup. Rukur ia, “Bapangku lanai bo kap ndekah nggeluh, kenca e pagi kubunuh Jakup.”

⁴²Tapi ieteh Ribka sura-sura Esau, e maka isuruhna kalak ndilo Jakup, janah nina, “Begiken, kakandu Esau erbalas atena man bandu janah ibunuhna atena kam.

⁴³E maka genduari o anakku, bahanlah bagi si kukataken e. Minterlah kam lawes ndahi turangku Laban i Haran.

⁴⁴Ras ia me kam lebe, nimai ngadi nembeh ate kakandu,

⁴⁵seh ngayak lupa ia perbahanenndu man bana. Kenca bage kusuruh denggo si ngalo-ngalo kam mulih. Sabap la ateku bene anakku duana i bas sada wari.”

⁴⁶Nina Ribka man Isak, “Ngelabuh aku erkiteken diberu bangsa Heti, ndehara Esau ah. Adi si Jakup pe muat singuda-nguda bangsa Heti jadi ndeharana, kai nari gunana aku nggeluh?”