Read Batak Karo KEJADIN 28 Bible Online

KEJADIN 28 - Batak Karo bible

KEJADIN 28

¹Ilebuh Isak anakna Jakup, jenari ipeberkatna ia alu pasu-pasuna, nina, “Ola kal ibuatndu beru Kanaan enda jadi ndeharandu.

²To lah ku Mesopotami, ku rumah nini bulangndu Betuil. I jah me kam empo, buat sada anak mamandu Laban.

³Dibata si Mada Kuasa lah si masu-masu perjabunndu, ras mereken man bandu nterem anak, gelah kam jadi nini nterem bangsa!

⁴Ialah si masu-masu kam ras kesusurenndu alu pasu-pasu si enggo iberekenNa man Abraham. Janah man bandulah pagi taneh si inganindu genduari enda, si enggo ibereken Dibata man Abraham!” [84†]

⁵E maka isuruh Isak si Jakup lawes ku Mesopotami ndahi Laban, anak Betuil, kalak Aram e, turang Ribka. Ribka e me nande Jakup ras Esau.

⁶Ieteh si Esau maka bapana Isak enggo masu-masu si Jakup, janah isuruhna pe ia ku Mesopotami erjabu. Ietehna pe maka asum ipasu-pasu Isak si Jakup, isuruhna maka ola iempoi Jakup diberu kalak Kanaan.

⁷Ietehna pe maka Jakup enggo ngikutken kata nandena ras bapana, janah enggo ia lawes ku Mesopotami.

⁸Dage ieteh Esau maka bapana Isak, la kal atena ngena diberu bangsa Kanaan.

⁹Erkiteken si e lawes Esau ndahi Ismael anak Abraham, jenari iempoina si Mahalat, turang Nebayot, anak Ismael, tambah ndeharana si dua kalak.

¹⁰Itadingken Jakup Berseba, jenari berkat ia kempak Haran.

¹¹Nandangi sundut matawari seh ia i bas sada ingan, e maka i je ia erberngi. Medem ia, janah ibantalkenna sada batu.

¹²Ernipi ia maka iidahna sada redan pajek i babo doni, ujungna seh ku langit; ku teruh ku das i je malekat. [85†]

¹³Tedis TUHAN i deherna nina, “Aku kap TUHAN, Dibata Abraham ras Isak. Man bandu ras man kesusurenndu Kubereken taneh inganndu medem enda. [86†]

¹⁴Kesusurenndu bali pagi ras abu taneh teremna. Ipebelangna daerahna kempak apai pe. Arah kam ras kesusurenndu kerina bangsa i doni enda ndat pasu-pasu i bas aku nari. [87†]

¹⁵Inget lah, Aku ras kam dingen ngkawali kam ku japa pe kam lawes, janah Aku ka pagi maba kam mulih ku taneh enda. La Kutadingken kam seh enggo dung Kulakoken kerina si Kukataken bandu e.”

¹⁶Medak me Jakup, jenari nina, “I jenda kepe TUHAN ; ndai la kueteh maka Ia i jenda!”

¹⁷Mbiar ia nina, “Kebiaren kap ingan enda! Ugapa pe rumah Dibata nge enda; ugapa pe ingan enda pintun si talang kempak surga.”

¹⁸Lampas erpagi-pagi keke Jakup, ibuatna batu si ibantalkenna ndai, ipajekkenna jadi sada tanda peringet-ingeten. Iamburkenna minak saitun ku batu e tandana batu e enggo ipersembahken man Dibata.

¹⁹Ibahanna gelar ingan e Betel. (Ope si e kuta enda igelari kalak, Lus.)

²⁰Kenca bage ersumpah Jakup man TUHAN, “Adi itemani Dibata aku janah adi ikawaliNa aku i bas perdalanenku, janah adi iberekenNa bangku uis ras pangan,

²¹adi selamat aku mulih ku rumah bapangku, e maka TUHAN me jadi Dibatangku.

²²Batu peringet-ingeten si enggo kupajekken enda pagi jadi sada Rumah Dibata, janah kubereken pagi sepersepuluh i bas kasa kai si iberekenNdu bangku.”