Read Batak Karo KEJADIN 29 Bible Online

KEJADIN 29 - Batak Karo bible

KEJADIN 29

¹Iterusken Jakup perdalanenna, lawes ia kempak negeri Timur.

²Rempet idahna sada sumur i bas mbalmbal i keleweti telu terpuk biri-biri si sangana gempang i je ibere minem i bas sumur e nari, janah i bas lubang sumur lit sada batu galang man tutupna.

³Sanga pulung asuh-asuhen e ku je kerina, igulingken permakan batu e, jenari ibere minemna asuh-asuhen e. Kenca dung minem e maka iulihkenna ka batu ndai ku inganna.

⁴Nungkun Jakup man permakan ndai nina, “O teman-temanku, i ja nari kam kerina?” “I Haran nari,” nina kalak ndai njabapsa.

⁵Nungkun ka Jakup, “Itandaindu kang Laban kempu Nahor?” “Tandai kami,” nina kalak ndai njabapsa.

⁶“Ma sehat-sehat nge ia?” nina nungkun. “Sehat,” nina kalak enda njabapsa. “Ah kap anakna Rahel reh ku jenda nggera asuh-asuhen bapana.”

⁷Nina Jakup, “Adi langa bo ben, janah langa bo pekarangken ngkai maka la ibere minemndu lebe asuh-asuhenndu, kenca bage igera ka mulihken ku mbalmbal?”

⁸Nina kalak enda njabapsa, “La banci bage adi langa pulung kerina asuh-asuhen e i jenda; kenca e kari maka banci igulingken batu e, jenari asuh-asuhen e enggo banci ibere minem kami.”

⁹Sanga ngerana denga Jakup ras permakan e, seh Rahel i je ras asuh-asuhen bapana.

¹⁰Kenca iidah Jakup si Rahel ras biri-biri mamana Laban, lawes Jakup ku sumur e, igulingkenna batu, ibere minemna biri-biri ndai.

¹¹Kenca bage iemana Rahel, janah tangis perban riahna ukurna.

¹²Iturikenna man Rahel, “Aku kap anak Ribka, turang bapandu.” E maka kiam Rahel ngatakenca man bapana.

¹³Kenca ibegi Laban kerna beberena Jakup, kiam ia njumpaisa, idakepna, iemaina, jenari ibabana ku rumah. Ituriken Jakup kerina kai si enggo jadi.

¹⁴Kenca si e nina Laban, “Payo, kam tuhu-tuhu nge sada dareh ras aku.” Tading me Jakup i je sada bulan dekahna.

¹⁵Nina Laban man Jakup, “Situhuna la patut kam erdahin nampati aku adi la kam dat kai pe, aminna gia kam keluargangku. E maka, kai atendu upahndu?”

¹⁶Lit dua kalak anak Laban diberu; sintua Lea gelarna, singuda Rahel.

¹⁷Mata Lea tuhu mejile; tapi potongen badan Rahel seh kal jilena.

¹⁸Jakup ngena atena Rahel, e maka nina man mamana, “Nggit aku pitu tahun erdahin ras kam, gelah iberendu aku erjabu ras anakndu si nguda Rahel.”

¹⁹Nina Laban njabapsa, “Ulin kuakap merekenca man bandu asang man ise pe. E maka jenda me kita ras.”

²⁰E maka erdahin me Jakup pitu tahun dekahna lako ndatken Rahel, tapi bagi piga-piga wari ngenca akapna sipitu tahun e, perban ngenana atena ngenen Rahel.

²¹Kenca seh paksana nina Jakup man mamana Laban, “Enggo seh pitu tahun; erjabu me kami ras anakndu.”

²²Erkiteken si e ikataken Laban me kerina si man katanken ku kerja erdemu bayu anakna.

²³Tapi i bas berngi e labo Rahel si ibereken Laban man Jakup, tapi Lea, e maka ras ia medem bagi arusna kalak erjabu.

²⁴(Ibereken Laban budakna si diberu, e me Silpa jadi budak Lea.)

²⁵Pepagina maka enggo ieteh Jakup maka Lea nge kepeken si iempoina e. E maka idahina Laban nina, “Uga perbahanenndu e bangku? Aku erdahin gelah Rahel bangku. Engkai maka itipundu aku?”

²⁶Nina Laban njabapsa, “Rikutken adat si i jenda la banci anak si nguda leben erjabu asang kakana.

²⁷Timai seminggu nari dekahna seh enggo dung adat kerja enda; kenca bage banci kubereken man bandu Rahel, adi nggit kam erdahin pitu tahun nari ras aku.”

²⁸Jakup setuju, janah kenca enggo lepas kerja erdemu bayu e, iberekenna ka anakna Rahel man Jakup jadi ndeharana. (

²⁹Ibereken Laban budakna si diberu Bilha jadi budak Rahel, anakna.)

³⁰Dagina erjabu Jakub ras Rahel, janah ngenan atena man Rahel asang Lea. Pitu tahun nari ka ia erdahin ras Laban.

³¹Perban idah TUHAN maka ngenan ate Jakup nandangi Rahel asangken man Lea e maka ibere TUHAN maka Lea banci mupus, tapi Rahel lang.

³²Mehuli kula Lea, ipupusna sada anak dilaki. Nina, “Enggo idah TUHAN kiniseranku, genduari tentu ikelengi perbulangenku aku.” E maka Ruben ibahanna gelar anakna.

³³Mehuli ka kulana, tubuh ka sada anakna dilaki e maka nina, “Enggo ka ibereken TUHAN anak dilaki erkiteken ibegiNa aku la ikelengi.” E maka Simeon ibahanna gelarna.

³⁴Sekali nari mehuli ka kulana, tubuh ka anakna dilaki nina, “Genduari la banci lang erpelcikna perbulangenku teriket man bangku perban enggo kupupus man bana telu anak dilaki.” E maka ibahanna gelar anakna e Lewi.

³⁵Kenca bage mehuli ka kulana; tubuh ka anakna dilaki si deban nina, “Genduari kupuji TUHAN.” E maka ibahanna gelar anak e Juda. Kenca bage ngadi ia mupus.