Read Batak Karo KEJADIN 3 Bible Online

KEJADIN 3 - Batak Karo bible

KEJADIN 3

¹I bas kerina rubia-rubia daraten si ijadiken Dibata, nipe me si cerdikna. Nungkun nipe man diberu ndai nina, “Tuhu kin ikataken Dibata man bandu maka la banci ipanndu sada pe buah batang kayu si i bas peken enda?” [11†]

²Erjabab diberu e nina, “Kerina buah batang kayu si lit i bas peken enda banci nge ipan kami,”

³“seakatan buah kayu si i tengah peken. Ikataken Dibata man kami maka la banci pan buahna, jemak pe ola. Adi ipan tah ijemak kami, mate kami.”

⁴Ngaloi ka nipe nina, “Labo tuhu e, labo kam mate.

⁵Bage nina Dibata, perban ietehNa kenca ipanndu, bali kam ras Dibata, meteh si bujur ras si jahat.”

⁶Itatap diberu e batang kayu ndai, tuhu seh kal akapna jilena, janah buahna pe entabeh nari nge man pangan. Iukurina ka, kuga senangna adi arah man buah batang kayu e ndat pemeteh ia. E maka iputikkenna buah kayu e, ipanna, jenari iberekenna man perbulangenna si rassa i je, janah ipan perbulangenna ka.

⁷Mintes medak matana duana, janah igejapna maka manjang-anjang ia. E maka isemitna bulung ara jadi gonjena.

⁸Karabenna, ibegi kalak ndai TUHAN Dibata erdalan-dalan i bas peken ndai. E maka cebuni ia duana i ligen-ligen batang kayu.

⁹Ilebuh TUHAN Dibata si dilaki nina, “I ja kam?”

¹⁰Ngaloi ia nina, “Kubegi ndai Kam erdalan i bas peken; mbiar aku, e maka cebuni aku, erkiteken aku manjang-anjang.”

¹¹“Ise ngatakenca maka kam manjang-anjang?” nina Dibata nungkun. “Ipanndu kin buah batang kayu si Kularang e?”

¹²Erjabap dilaki e nina, “Diberu si itamakenNdu ras aku i jenda kap merekenca man bangku, e maka kupan.”

¹³Isungkun TUHAN Dibata ka si diberu nina, “Engkai maka bage perbahanenndu?” Erjabap diberu ndai, “Nipe si ngajar-ngajari aku maka kupan.” [12†]

¹⁴Kenca bage nina TUHAN Dibata man nipe, “Erkiteken perbahanenndu e, kena ukumen kam; i bas kerina rubia-rubia nari kam ngenca kena sumpah enda: Mulai genduari nari njoler kam alu beltekndu, janah kidekah kam nggeluh abu taneh panganndu.

¹⁵Kuperimbangken kam ras diberu enda, bage pe kesusurenndu ras kesusurenna. Kesusurenna merperken takalndu, janah kam naguti tukul-tukulna.” [13†]

¹⁶Nina Dibata man diberu e, “Kutambahi kiniseranndu sanga mehuli kulandu. Mesui akapndu sanga mupus. Aminna bage pe metedeh atendu rusur man perbulangenndu, tapi perbulangenndu ngkuasai kam.”

¹⁷Nina Dibata kempak dilaki, “Perban ibegikenndu ndeharandu, janah ipanndu buah batang kayu si Kularang e, e maka kena sumpah taneh enda erkiteken kam. Terpaksa kam latih erdahin ngusahaisa kidekah geluhndu, gelah banci iberekenna cukup nakanndu. [14†]

¹⁸Dukut-dukut ras sinuan-sinuan si erduri, e me turah i bas taneh enda nari, janah terpaksa ipanndu sinuan-sinuan i juma.

¹⁹Terpaksa igegehindu erdahin alu curcur panasndu, gelah taneh enda banci mereken ulihna man bandu, seh mulih ka kam ku taneh, sabap i je nari kam ijadiken. I bas taneh nari kam ijadiken, janah jadi taneh ka kam mulihken.”

²⁰Ibahan Adam gelar ndeharana Hawa erkiteken ia me nande kerina jelma manusia.

²¹Kenca bage ibahan TUHAN Dibata uis i bas kulit rubia-rubia nari man Adam ras Hawa, jenari ipakekenNa e man bana duana.

²²Nina TUHAN Dibata, “Genduari manusia e enggo seri ras sekalak i bas Kita, erpemeteh kerna si bujur ras si jahat. Ola bere ibuatna buah batang kayu kegeluhen e janah ipanna, jenari nggeluh ia rasa lalap.” [15†]

²³E maka ipelawes TUHAN Dibata ia i bas Peken Eden nari gelah iperjumaina taneh, i ja nari ia ndube ijadiken.

²⁴Arah Timur peken ndai itamaken TUHAN Dibata malekat kerubim, njemak pedang merara si mawat-awat, njagai batang kayu kegeluhen ndai gelah ise pe la banci ndeher ku je.