Read Batak Karo KEJADIN 30 Bible Online

KEJADIN 30 - Batak Karo bible

KEJADIN 30

¹Tapi Rahel lalap la lit pupusna; e maka cian atena man kakana. Erkiteken si e nina man Jakup, “Berekenlah man bangku anak. Adi lang mate aku.”

²Merawa ate Jakup man Rahel, janah nina, “Labo kap aku Dibata. Ia nge si erbahanca kam la mupus.”

³Nina Rahel, “Enda kap suruh-suruhenku Bilha; ras kam medem, gelah banci ipupusna anak man bangku. Alu bage banci aku jadi pernanden arah ia.”

⁴E maka ibereken Rahel me si Bilha man perbulangenna, jenari ersada kula Jakup ras Bilha.

⁵Mehuli kula Bilha, e maka ipupusna sekalak anak dilaki man Jakup.

⁶Nina Rahel, “Enggo ibenarken Dibata aku. Enggo ibegikenNa pertotonku, janah iberekenNa man bangku sada anak dilaki.” E maka ibahanna gelar anak e Dan.

⁷Mehuli ka kula Bilha, tubuh ka anakna dilaki peduaken.

⁸Nina Rahel, “Enggo kupekeri gegehku erbebe ngelawan kakangku, janah aku enggo menang.” E maka ibahanna gelarna Naptali.

⁹Kenca enggo iteh Lea maka ia enggo ngadi mupus e maka iberekenna suruh-suruhenna Silpa jadi ndehara Jakup.

¹⁰Kenca bage ipupus Silpa sekalak anak dilaki.

¹¹Nina Lea, “Sangap kal aku.” E maka ibahanna gelar anak e Gat.

¹²Ipupus Silpa ka anak dilaki si deban.

¹³E maka nina Lea, “Oh riahna kuakap. Genduari kerina diberu ngataken maka aku meriah kuakap.” E maka ibahanna gelar anak e Aser.

¹⁴Sanga paksa rani, erdalan-dalan me Ruben i bas juma, idatsa buah dudaim. Kenca e iberekenna man nandena Lea. Nina Rahel man Lea, “Enta sitik buah dudaim si idat anakndu ndai.”

¹⁵Nina Lea njabapsa, “La kin bias enggo ibuatndu perbulangenku? Genduari ibuatndu ka atendu buah dudaim anakku?” Nina Rahel, “Adi iberendu aku buah dudaim anakndu, banci kam medem ras Jakup berngi enda.”

¹⁶Kenca mulih Jakup i juma nari karaben, ialo-alo Lea ia nina, “Ras kita medem berngi enda perban enggo kugalari kerna si e alu buah dudaim anakku.” E maka medem Jakup ras Lea berngi e, ersada kula ia.

¹⁷Ibegiken Dibata pertoton Lea, e maka mehuli kulana, i jenari ipupusna anakna si pelimaken.

¹⁸Nina Lea, “Enggo ibereken Dibata upahku, erkiteken enggo kubereken suruh-suruhenku Silpa man perbulangenku.” E maka ibahanna gelar anak e Isakar.

¹⁹Mehuli ka kula Lea, e maka tubuh anakna si peenemken.

²⁰Nina, “Enggo ibereken Dibata man bangku pemere si seh kal jilena. Genduari kuga pe ialoken dilakingku me aku, perban enggo tubuh arah aku enem anakna dilaki.” E maka ibahanna gelarna Sebulon.

²¹Kenca bage tubuh sada anakna diberu, Dina ibahanna gelarna.

²²Dungna iinget Dibata me Rahel, ibegikenNa pertotonna, e maka banci ia mupus ibahanNa.

²³E maka mehuli me kula Rahel, jenari tubuh sada anakna dilaki nina, “Lanai kemalun aku ibahan Dibata.

²⁴Mbera-mbera ibereken TUHAN denga bangku sada nari anak dilaki.” E maka ibahanna gelar anak e Jusup.

²⁵Kenca tubuh Jusup nina Jakup man Laban, “Pelepas min aku mulih ku kutangku.

²⁶Bereken min ndeharangku ras anak-anakku, si enggo dat aku erkiteken aku erdahin ras kam, gelah aku lawes. Ietehndu nge kuga ulina pendahinku man bandu.”

²⁷Nina Laban, “Begiken lebe. Enggo tergejap man bangku, maka TUHAN masu-masu aku erkite-kiteken kam.

²⁸E maka katakenlah asa kai upahndu gelah kugalari.”

²⁹Nina Jakup njabapsa, “Ietehndu kuga enggo pendahinku man bandu, janah kidekah aku njagasa, asuh-asuhenndu enggo merih.

³⁰Ope denga aku i jenda sitik ngenca ertandu; genduari enggo ndauh kal reh buena, em perban enggo ipasu-pasu TUHAN kam erkite-kiteken aku. E maka enggo seh paksana aku erdahin guna diringku jine.”

³¹Nungkun Laban nina, “Asa kai dage kubereken bandu?” Nina Jakup njabapsa, “La padah aku rupah. Nggit denga aku ermakan asuh-asuhenndu, adi cocok akapndu katangku enda.

³²Berelah maka kusiar-siar sendah asuh-asuhenndu kerina, janah kuserapken kasa kai biri-biri si mbiring ras mekambing tah pe simeruntik si nguda denga; e saja ngenca ateku man upahku.

³³Alu bage tentu murah iakapndu denggo metehsa bujur aku tah lang. Adi ipepayo kam pagi upahku, janah lit i je kambing si la meruntik tah la mekambing, ntah biri-biri si la mbiring, tentu tereteh barang tinangko e.”

³⁴Nina Laban njabapsa, “Bage-bage! Kuban pagi bagi si ikatakenndu e.”

³⁵Tapi i bas wari e ipindahken Laban kerina kambing bajarna si meruntik ras si mekambing bage pe beruna si mekambing ntah meruntik tah pe kambing si lit mbentarna; biri-biri si mbiring pe ipindahkenna kerina. Kenca bage isuruhna anakna si dilaki ngurussa si e,

³⁶janah kenca e itadingkenna Jakup, lawes ia ras asuh-asuhenna asa dauhna si banci idalani telu wari. Asuh-asuhen Laban si tading Jakup ngasuhisa.

³⁷Ibuat Jakup dahan kayu dalu-dalu ketapang sirimpaga, ikulitina dahan-dahan e maka mekambing.

³⁸Iamparkenna dahan-dahan e i lebe-lebe asuh-asuhen i bas inganna minem. Itamakenna i je sabap asuh-asuhen kawin sanga ia reh ku je minem.

³⁹E maka sanga kambing e kawin i lebe-lebe dahan-dahan e, anakna mekambing, mbiring ntah meruntik.

⁴⁰Isirangken Jakup biri-biri e i bas kambing nari, jenari ipealakenna ku kambing si meruntik, mbiring ras mekambing. Alu bage enggo iserapkenna baginna jadi sada rarasen sikerajangenna jine, jenari isirangkenna ras sikerajangen Laban.

⁴¹Tole pe adi kawin asuh-asuhen si megegeh, iamparken Jakup dahan ndai i lebe-lebe asuh-asuhen e i bas inganna minem, gelah ermurik ia i tengah-tengah dahan-dahan e.

⁴²Tapi la iamparken Jakup dahan-dahan e i lebe-lebe asuh-asuhen si lemah. E maka lanai ndekahsa kerina asuh-asuhen si lemah enggo jadi sikerajangen Laban, tapi asuh-asuhen si megegeh jadi sikerajangen Jakup.

⁴³Em dalanna maka Jakup jadi kalak si seh bayakna. Melala asuh-asuhenna, suruh-suruhenna, untana ras keledena.