Read Batak Karo KEJADIN 31 Bible Online

KEJADIN 31 - Batak Karo bible

KEJADIN 31

¹Jakup megi anak Laban si dilaki ngerana, “Enggo ibuat Jakup kerina sikerajangen bapanta. Kerina kebayakenna rehna i bas sikerajangen bapanta nari.”

²Idah Jakup pe maka Laban lanai bagi si gelgel e ulina.

³E maka nina TUHAN bana, “Mulihlah kam ku taneh bapandu, ku keluargandu. Aku ras kam.”

⁴Erkiteken si e itenahken Jakup si Rahel ras Lea njumpai ia i mbalmbal ingan asuh-asuhen e.

⁵Nina man bana duana, “Enggo kuperdiateken maka bapandu lanai bagi si gelgel e ulina man bangku; tapi Dibata bapangku tetap ras aku.

⁶Itehndu duana, aku enggo erdahin ras bapandu asa gegehku.

⁷E pe i tebu-tebuna kang aku. Enggo sepuluh kali iubah-ubahna upahku. Tapi la ipelepas Dibata aku bene ibahan kejahatenna.

⁸Adi ikataken Laban kenca, ‘Kasa kai kambing si meruntik jadi upahndu,’ e maka kerina ka asuh-asuhen e meruntik anakna. Kenca ikataken Laban, ‘Kasa kai si mekambing jadi upahndu,’ e maka kerina ka asuh-asuhen e mekambing anakna.

⁹Enggo ibuat Dibata asuh-asuhen bapandu janah iberekenNa man bangku.

¹⁰Sanga asuh-asuhen paksa si ikut-ikuten, ernipi aku maka kuidah kerina kambing bajar si kawin ras beruna e, rupana ergaris-garis, mekambing ras meruntik.

¹¹Ngerana malekat Dibata man bangku i bas nipi e nina, ‘O Jakup!’ ‘Kai,’ ningku.

¹²‘Nen,’ nina, ‘Bajar si kawin ras beruna e, kerina ergaris-garis, mekambing, ras meruntik rupana. Enda Kubahan erkiteken enggo Kuidah kerina perbahanen Laban man bandu.

¹³Aku kap Dibata si teridah bandu i Betel. Tupung si e ipajekkenndu sada batu jadi peringet-ingeten, janah iamburkenndu minak saitun i babona tandana maka batu e enggo ipersembahkenndu, janah i je enggo kam erpadan man bangKu. Genduari ersikaplah kam mulih ku taneh inganndu tubuh ndube!’ ” [88†]

¹⁴Nina Rahel ras Lea ngaloi Jakup, “Lanai kap lit kai pe tading-tadingen man kami i bas bapa kami nari.

¹⁵Enggo seri akapna kami ras kalak tandang-tandang. Idayakenna kami, janah genduari enggo ikerikenna kerina tukur kami e.

¹⁶Kerina kebayaken enda si enggo ibuat Dibata i bas bapa kami nari e me sikerajangen kami ras anak-anak kami. Bahan lah kai si enggo ikataken Dibata man bandu.”

¹⁷ [17-18] E maka ersikap Jakup mulih ndahi bapana i taneh Kanaan. Itamakenna anak-anakna ras duana ndeharana ku das unta, jenari igerana kerina asuh-asuhenna leben asa ia ras kasa si idatna i Mesopotami.

¹⁸

¹⁹Sanga si e Laban enggo lawes nggunting mbulu biri-birina. Tupung si e me ibabaken Rahel gana-gana si ni pajuh keluarga bapana.

²⁰Iakali Jakup si Laban, e maka la ikatakenna perberkatna.

²¹Ibuatna kerina sikerajangenna, pedas-pedas ia lawes. Ikeparina Lau Eprat, jenari erdalan ia kempak deleng Gileat.

²²Kenca telu wari maka tereteh man Laban maka Jakup enggo kiam.

²³E maka ibuatna anak buahna, ras ia lawes ngayaki Jakup. Kenca pitu wari, itundukna Jakup i deleng Gileat.

²⁴Berngi e reh Dibata ndahi Laban i bas nipina nina, “Ola sitik pe belaskenndu kata-kata si la mehuli man Jakup.”

²⁵Tupung itunduk Laban si Jakup, Jakup enggo majekken kemahna i datas sada deleng, janah Laban ras anak buahna pe erbahan kemahna ka i datas deleng-deleng Gileat.

²⁶Nina Laban man Jakup, “Engkai maka itipundu aku, janah ibabakenndu anakku ena duana bali ras tahanen perang?

²⁷Engkai maka itipundu aku, janah kiam kam alu erbuni-buni dingen la ngata bangku? Adi ngata min ndai kam, tentu kutaruhken kam alu meriah ukur, rende, ralep-alep, alu gendang ras kulcapi.

²⁸La ipelepasndu pe kuema kempungku ras anakku ena duana lako ngataken mejuah-juah i bas dalan. Bodoh perbahanenndu.

²⁹Lit kuasangku erbahan atendu mesui, tapi berngi rebih nai Dibata bapandu ngataken man bangku gelah ola sitik pe kubelasken kata-kata si la mehuli man bandu.

³⁰Kueteh nge maka kam lawes perbahan tedeh atendu mulih, tapi engkai ka maka itangkondu gana-gana pajuh-pajuhen keluargangku?”

³¹Nina Jakup njabapsa, “La aku ngata lawes erkiteken mbiar aku ibuatndu mulihi anakndu e duana.

³²Tapi adi i bas ise kari i jenda datndu gana-ganandu e, bunuh ia. Kalak enda kerina jadi saksi i jenda, e maka daramilah kai i je barangndu, janah buat kai sikerajangenndu.” La ieteh Jakup maka Rahel nge si muat gana-gana Laban e.

³³Lawes Laban nggargari kemah Jakup. Kenca e lawes ia ku kemah Lea, terus ku kemah budak diberu e duana, tapi la datca gana-ganana e. E maka lawes ia ku kemah Rahel.

³⁴Sanga si e ibuat Rahel gana-gana, jenari itamakenna i bas tas pelana untana, janah kundul ia i babona. Igargari Laban kerina kemah e, tapi la idatca.

³⁵Nina Rahel man bapana, “Ola kam nembeh man bangku bapa; la aku banci tedis i lebe-lebendu erkiteken sangana reh bulanku.” Igargari Laban kerina tapi la idatca gana-gana si nipajuh keluargana e.

³⁶Kenca bage enggo bene kesabaren Jakup, “Kejahaten kai kin si enggo kubahan?” nina nungkun alu merawa. “Undang-undang kai kin nge enggo kulanggar, maka iayakindu aku?

³⁷Genduari enggo igargarindu kerina barang-barang; lit dage i je dat kam sikerajangenndu? Amparken i jenda gelah banci idah anak buahndu ras anak buahku. Kalak enda kari metehsa ise kita si bujur.

³⁸Enggo dua puluh tahun aku ras kam. Biri-biri ras kambingndu la pernah molas. La pernah kupan sada pe bajar biri-biri asuh-asuhenndu.

³⁹Adi lit kenca biri-biri si mate ipan rubia-rubia si merawa aku saja ngenca rusur nggengkenca. La kukataken pe man bandu maka labo e salahku. Ipindondu maka kuganti kerina si bene subuk suari ntah pe berngi.

⁴⁰Megati mesui ateku iparpari las suari, ras bergehen sanga berngi. Megati pe aku la banci tunduh.

⁴¹Bagem rusur kecibalku kidekah dua puluh tahun aku erdahin ras kam. Sepuluh empat tahun dekahna aku erdahin ras kam lako ndatken duana anakndu; enem tahun aku erdahin ngasuhi asuh-asuhenndu. Amin bage pe isambarindu kang upahku sepuluh kali.

⁴²Adi la kin erkiteken iarak-arak Dibata bapangku aku, e me Dibata si isembah Abraham ras Isak, enggo me aku ipelawesndu pe ngambe-ngambe. Tapi iidah Dibata kiniseranku ras kelatihenku, e maka iberekenNa keputusenNa.”

⁴³Ijabap Laban Jakup nina, “Diberundu enda duana anakku; anakna pe sikerajangenku, asuh-asuhen enda pe aku empuna. Situhuna kal, kerina siidahndu i jenda ajangku kerina. Tapi erkiteken la tertagangi aku anakku enda duana, bage pe ras anak-anak e,

⁴⁴nggit aku erbahan perpadanen ras kam. Mari sipegun-gun batu lako ngingetken kita kerna perpadanenta.”

⁴⁵E maka ibuat Jakup sada batu, ipajekkenna jadi batu peringet-ingeten.

⁴⁶Isuruhna anak buahna pepulung batu, jenari ipegun-gunna. E maka man kalak enda i deher pinugun batu e.

⁴⁷Iban Laban gelar pinugun batu ndai, “Jegar Sahaduta”, tapi Jakup nggelarisa “Galet”.

⁴⁸Nina Laban man Jakup, “Pinugun batu jadi peringet-ingeten man banta duana.” Em sabapna maka ibahan gelar ingan e Galet.

⁴⁹Nina ka Laban tole, “Dibatalah singarak-ngarak kita amin gia kita sirang pedauh.” Enda ka pe sabapna maka ingan e igelari Mispa.

⁵⁰Iterusken Laban cakapna nina, “Adi igasgasindu anakku enda duana, ntah empo ka kam ras diberu si deban, aminna pe la kueteh, ingetlah maka Dibata si mperdiateken kita.

⁵¹Enda me batu si enggo kupegun-gun jadi baleng i bas kita duana, janah enda me batu peringet-ingeten e.

⁵²Duana pinugun batu e jadi tanda persinget man banta. Ndigan pe la kulewati pinugun batu enda merang kam, janah kam pe la banci ngelewati batu peringet-ingeten enda ngelawan aku.

⁵³Dibata si Abraham ras Dibata Nahor pagi singadili kita.” E maka i bas gelar Dibata sinisembah bapana Isak, ersumpah Jakup matuhi perarihen e.

⁵⁴Igelehna sada rubia-rubia, ipersembahkenna jadi kurban persembahen i das deleng ndai. Jenari idilona anak buahna gelah man ras-ras. Kenca elah man, i das deleng e kalak enda erberngi.

⁵⁵Pepagina erpagi-pagi iema Laban kempuna ras duana anakna ngataken mejuah-juah i bas perdalanen, e maka lawes ia mulih ku kutana.