Read Batak Karo KEJADIN 32 Bible Online

KEJADIN 32 - Batak Karo bible

KEJADIN 32

¹Sanga Jakup ras rombongenna nerusken perdalanenna, reh piga-piga malekat njumpai ia.

²Kenca iidah Jakup malekat e, ersurak ia, nina, “ Kemah Dibata kap enda!” E maka ibahanna gelar ingan e Mahanaim.

³Isuruh Jakup suruh-suruhenna leben njumpai Esau si ringan i negeri Edom.

⁴Itenahkenna arah kalak enda gelah ikatakenna man Esau, bagenda, “Aku Jakup suruh-suruhenndu si patuh, ngataken man bandu, tuanku Esau, maka kidekah enda ras Laban aku tading, la aku mulih seh genduari.

⁵Lit lembungku, kaldengku, biri-biringku, kambingku, ras suruh-suruhenku. Kutenahken kata enda man bandu, Tuan, alu pengarapen, gelah mekuah atendu bangku.”

⁶Kenca suruh-suruhen e mulih man Jakup nina, “Enggo ijumpai kami seninandu Esau, janah genduari sangana ia i bas perdalanen njumpai kam. Lit 400 kalak dilaki ngikut ras ia.”

⁷Megi si e mbiar dingen gentar si Jakup. E maka ibagina anak buahna jadi dua bagin, bage pe biri-biri, kambing, lembu ras untana.

⁸Nina i bas ukurna, “Adi reh Esau merang terpuk si pemena, terpuk si peduaken banci kiam.”

⁹Kenca e ertoto Jakup, “O Dibata si isembah niningku Abraham, si isembah bapangku Isak, begiken min aku! Isuruhndu aku, o TUHAN, gelah aku mulih ku tanehku, ku keluargangku, janah ikatakenNdu maka Kam erbahanca kerina erdalan alu mehuli man bangku.

¹⁰La metunggung aku ngaloken ulina perbahanenNdu ras pertetap ateNdu si enggo icidahkenNdu man bangku, suruh-suruhenNdu. Sanga aku ngepari Lau Jordan sada ciken ngenca lit i bas aku, genduari enggo mulih aku alu si dua nterpuken enda.

¹¹Ertoto aku, pulahi min aku i bas seninangku Esau nari. Mbiar aku reh ia merang aku ras ngelesapken kami kerina, subuk diberu bage pe danak-danak.

¹²Inget padanNdu man bangku maka kerina ibahanNdu erdalan alu mehuli, ras mereken man bangku kesusuren teremen asang si ngasup kalak meligaisa, bali teremna ras kersik i tepi lawit.” [89†]

¹³ [13-15] Kenca erberngi i jah, ipilih Jakup asuh-asuhenna jadi persembahen man seninana Esau: 200 kambing beruna, 20 kambing bajarna, 200 biri-biri beruna ras 20 biri-biri bajarna, 30 unta beru-beru ras anakna, 40 lembu ras 10 jenggina, 20 kelede beruna, ras 10 kelede sangkarna.

¹⁶Iterpukenna asuh-asuhen e jadi piga-piga terpuk, isuruhna sekalak suruh-suruhen njaga tep-tep terpuk. Nina man kalak enda, “Leben kena asa aku; ban kelang-kelangna tep-tep terpuk.”

¹⁷Nina man suruh-suruhenna si pemena, “Adi jumpa kam ras seninangku Esau, janah isungkunna kam, ‘Ise tuanndu? Ku ja perlawesndu? Ise empuna asuh-asuhen si igerandu e?’,

¹⁸arus maka ijabapndu, ‘Kerina asuh-asuhen e suruh-suruhenndu Jakup empuna. Iberekenna atena jadi pemere man tuanna Esau. Ia arah pudi denga.’ ”

¹⁹Perentah si seri iberekenna man suruh-suruhenna sipeduaken, sipeteluken, ras man kerina si njaga terpuk asuh-asuhen e. Nina, “Kenca jumpa ras Esau

²⁰arus bage nindu, ‘Payo, suruh-suruhenndu Jakup i pudi kami denga.’ ” Nina Jakup i bas ukurna, “Kubuatlah ukurna alu mereken pemere enda, janah kenca jumpa kari aku, ialokenna aku.”

²¹E maka ipelebena kalak naruhken pemere e, sedang ia erberngi i bas kemahna i bas berngi e.

²²I bas berngi e ka, medak Jakup. Ibabana duana ndeharana, ras duana gundikna, ras anakna si sepuluh sada, ngepar Lau Jabok.

²³Kenca isuruhna kerina kalak enda ngepar, e maka barang-barangna ikeparkenna

²⁴tapi ia tading si sada arah pudi. Kenca bage reh sekalak dilaki erbebe ras ia seh nandangi pultak matawari. [90†]

²⁵Kenca ieteh dilaki ndai maka la ia banci menang i bas perbeben e, e maka ipekpekna bena paha Jakup seh tersiher.

²⁶Nina dilaki ndai, “Pulahi aku, enggo nandangi terang wari.” Tapi nina Jakup njabapsa, “La kam kupulahi adi la ipasu-pasundu aku lebe.”

²⁷“Kai gelarndu?” nina dilaki e nungkun. “Jakup,” nina njabapsa.

²⁸Nina dilaki ndai, “Genduari lanai Jakup gelarndu. Enggo erbebe kam ras Dibata ras manusia, janah enggo kam menang. E maka Israel ibahan gelarndu.” [91†]

²⁹Nina Jakup, “Genduari kataken ka gelarndu.” Tapi nina njabapsa, “Man kadendu meteh gelarku?” Kenca bage ipasu-pasuna Jakup. [92†]

³⁰Nina Jakup, “Enggo pedempak aku ras Dibata, tapi tetap denga aku nggeluh.” E maka Peniel ibahanna gelar ingan e.

³¹Matawari enggo pultak sanga Jakup nadingken Peniel. Mengkah-engkah ia erkiteken enggo tersiher bena pahana.

³²Seh ngayak genduari kesusuren Israel la man jukut bena paha rubia-rubia sabap Jakup kena pek-pek i bas bagin e.