Read Batak Karo KEJADIN 33 Bible Online

KEJADIN 33 - Batak Karo bible

KEJADIN 33

¹Idah Jakup si Esau reh ras 400 anak buahna, e maka ibagi Jakup anak-anak si Lea, Rahel, ras anak-anak suruh-suruhenna duana si enggo jadi ndeharana e.

²Ipelebena suruh-suruhen si enggo jadi ndeharana ras anakna arah lebe kal, jenari Lea ras anakna, janah si arah pudina e me Rahel ras Jusup.

³Jakup erdalan ngelebei kerina, jenari nembah mungkuk ia pitu kali seh ku taneh ndeheri seninana.

⁴Tapi kiam Esau njumpai ia, idakepina Jakup ras iemaina. Tangis ia duana.

⁵Asum ipernehen Esau sekelewetna janah idahna diberu-diberu ras anak-anak, nungkun ia, “Ise enda kerina si ras kam e?” “Kalak enda kerina, o Tuan, e me anak-anak si enggo ibereken Dibata man bangku erkiteken lias ateNa,” nina Jakup njabapsa.

⁶E maka reh suruh-suruhen si enggo jadi ndeharana ras anak-anakna erjimpuh nembah.

⁷Kenca bage reh Lea ras anak-anakna, janah si perpudina kal reh Rahel ras Jusup; erjimpuh ia kerina nembah.

⁸Nungkun Esau, “Uga kerna terpuk si sada nari si aku jumpa ndai? Kai ertina e?” Nina Jakup njabapsa, “E mindo perkuah atendu, Tuanku.”

⁹Tapi nina Esau, “Bas aku pe enggo bias agingku, la padah iberekenndu bangku.”

¹⁰Nina Jakup, “Lang, la banci bage; adi payo kin mekuah atendu, alokenlah pemerengku e. Ngidah ayondu saja bali kuakap bagi natap ayo Dibata, perban ulina perbahanenndu man bangku.

¹¹E maka alokenlah pemere enda, si enggo kubaba man bandu. Enggo seh kal ulina perbahanen Dibata man bangku, enggo iberekenNa bangku kerina keperlunku.” Mesek-sek ipindona man Esau e maka ialokenna dungna.

¹²Nina Esau, “Ersikaplah kita gelah sitadingken ingan enda. Aku erdalin i lebendu.”

¹³Nina Jakup njabapsa, “Ietehndu nge kap anak-anak enda la megegeh. Janah aku arus ngukuri biri-biri, bage pe lembu ras anakna denga. Adi terus erdalan sada wari, mate me asuh-asuhen e kerina.

¹⁴Lebe lah kam, reh aku arah pudi manjar-anjar asa ngasup kami rikut ras lembu bage pe anak-anak enda. I Edom kita jumpa.”

¹⁵Nina Esau, “Adi bage kin kutadingken saja deba anak buahku ras kam.” Tapi nina Jakup, “Adi la akapndu dalih, labo padah tadingken anak buahndu e.”

¹⁶Bage me i bas wari e mulih me Esau ku Edom.

¹⁷Tapi Jakup lawes ku Sukot. Ipajekkenna rumahna i je bage pe sapo-sapo man ingan cicio asuh-asuhenna. Em sabapna maka gelarna ingan e Sukot.

¹⁸I bas perdalanenna mulih i Mesopotami nari, seh ia alu mejuah-juah i Sikem i taneh Kanaan. Ipajekkenna kemahna i bas sada mbalmbal deher kuta e.

¹⁹Itukurna juma e i bas keturunen Hamor bapa Sikem, ergana 100 duit pirak. [93†]

²⁰Ipajekkenna sada batar-batar ingan ersembah i je, janah ibahanna gelarna: El, Dibata kalak Israel.