Read Batak Karo KEJADIN 34 Bible Online

KEJADIN 34 - Batak Karo bible

KEJADIN 34

¹I bas sada wari, Dina, e me anak Jakup ras Lea, erdalan-dalan njumpai piga-piga diberu kalak Kanaan.

²Kenca Sikem anak Hamor, kalak Hewi, kepala daerah e, ngidah si Dina, itagangina, iperkuasana.

³Tapi perbahan mejile iakapna singuda-nguda e, minter ngena atena, e maka iusahakenna maka ngena ka ate singuda-nguda e man bana.

⁴Ikatakenna man bapana, “Sungkun min singuda-nguda enda man ndeharangku.”

⁵Ieteh Jakup maka anakna enggo icemarken, tapi erkiteken anakna si dilaki i juma denga ermakan la kuga pa pe nina seh maka anak-anakna mulih ku rumah.

⁶E maka reh Hamor bapa Sikem ndahi Jakup.

⁷Sanga si e rembang ka reh anak Jakup si dilaki i juma nari. Kenca ibegina kai si enggo jadi, sengget pusuhna ras merawa ia, perban arah perbahanenna e enggo ijuruken Sikem bangsa Israel alu mperkuasa anak Jakup si diberu.

⁸Nina Hamor man bana, “Enggo leket ukur Sikem man anakndu si diberu. Bere min maka iempoina ia.

⁹Si persada min arihta maka banci si empon bangsa kami ras bangsandu.

¹⁰Alu bage banci kam tading i negeri enda ras kami, banci ipilih kam inganndu tading, bebas kam erbinaga, ras banci ibuat kam taneh jadi sikerajangenndu.”

¹¹Kenca bage ngerana Sikem man bapa ras turang Dina, “Bere min pemindonku, maka kubereken kai saja si ipindondu.

¹²Kataken man bangku kai pemindondu, pindolah asa kai atendu tukurna; kubereken kerina pemindondu, gelah min iberendu aku erjabu ras ia.”

¹³Erkiteken enggo icemarken Sikem si Dina, e maka anak-anak Jakup si dilaki njabap Sikem ras bapana Hamor alu tipu.

¹⁴Nina, “La ibere kami erjabu turang kami ras sekalak si la isunat. E njuruken kami.

¹⁵Banci ibere kami turang kami erjabu adi kerina kam si dilaki isunatken bali ras kami.

¹⁶E maka kami nggit si empon ras kam, janah kenca bage maka kami ringan i tengah-tengahndu dingen jadi sada bangsa ras kam.

¹⁷Tapi adi la kam nggit bagi si ikataken kami ras isunatken, ibuat kami Dina lawes jenda nari.”

¹⁸Sarat-sarat si ikataken kalak enda, enggo bujur iakap Hamor ras anakna Sikem.

¹⁹E maka mintes ilakoken anak perana e kai si enggo isuruh, erkiteken ngenana atena man anak Jakup. Sikem me kalak si mehergana i bas keluargana.

²⁰Lawes Hamor ras anakna Sikem ku ingan perpulungen i pintu gerbang kuta, guna ngataken man kalak kuta e.

²¹“Kalak enda kalak bujur-bujur; pelepas kalak enda ringan i bas negeri enda ras kita, ola larang ku ja atena. Taneh enda cukup belangna man kalak enda pe. Marilah si empoi anakna si diberu, janah sibereken iempoina anak-anakta.

²²Bage pe kalak enda nggit tading ras kita, janah jadi sada bangsa ras kita, adi kerina kita si dilaki nggit isunatken, bali ras ia pe isunatken.

²³Ma kin kerina kari asuh-asuhenna ras kerina sikerajangenna, jadi sikerajangenta? E maka siuekenlah maka ia banci tading ras kita.”

²⁴Kerina si ngiani kuta e cocok akapna bagi si ikataken Hamor ras Sikem, e maka kerina si dilaki isunatken.

²⁵Telu wari kenca si e, sanga mesui denga akap kalak e, lawes me Simeon ras Lewi, turang Dina, ku kuta e maba pedang alu la ise pe metehsa. Jenari ibunuhna kerina dilaki si lit i bas kuta e,

²⁶termasuk Hamor ras anakna Sikem. Ibabana minter mulih Dina i bas rumah Sikem nari.

²⁷Kenca jelma si nterem e enggo ibunuhi kalak enda duana, anak-anak Jakup si debanna ngerampuki kuta e. Enda me pembalasen si ibahanna erkiteken turangna enggo ijuruken.

²⁸Ibuat kalak enda biri-biri, lembu, kelede, ras kerina si debanna si lit i bas kuta e ras i juma.

²⁹Ibuatna kerina si lit ergana, itabanna kerina diberu ras anak-anak, jenari iangkatna kerina kasa kai si lit i rumah-rumah.

³⁰Nina Jakup man Simeon ras Lewi, “Perbahanen kena e erbanca kuakap gulut nge e. Genduari nembeh me ate kalak Kanaan, kalak Peris ras kerina jelma si lit i bas negeri enda man bangku. La nterem anak buahku; e maka adi ipersada kalak enda kenca arihna ngelawan ras merang aku, e keri me kerina keluarganta.”

³¹Nina kalak enda, “La kami ngasup ngidah turang kami ijadiken bali ras diberu perdenggal.”