Read Batak Karo KEJADIN 35 Bible Online

KEJADIN 35 - Batak Karo bible

KEJADIN 35

¹Nina Dibata man Jakup, “Lawes lah kam minter ku Betel. I jah me kam ringan. Pajekken i jah sada batar-batar ingan ersembah man bangKu. Aku kap Dibata si petandaken baNa man bandu i Betel sanga kam lompat nadingken seninandu Esau.” [94†]

²Erkiteken si e ngerana Jakup man keluargana ras man kerina kalak si ras ia, “Ambekkenlah kerina dibata-dibata si deban si lit i bas kam; urasi bandu maka kam bersih kerina, jenari pakelah uisndu si bersih.

³Sitadingken me ingan enda, lawes kita ku Betel, i jah kupajekken ateku sada batar-batar ingan persembahen man Dibata si enggo mulahi aku sanga i bas kiniseran, si enggo ngarak-ngarak aku kujapa pe aku lawes.”

⁴E maka ibereken kalak enda kerina dibata-dibata si lit i bas ia man Jakup, ras anting-anting si ipakena pe. Itanemken Jakup kerina barang-barang i teruh batang kayu si galang deher Sikem.

⁵Sanga Jakup ras anak-anakna berkat nadingken ingan e, mbiar kerina penduduk kuta-kuta si lit i sekelewetna, e maka la iayakina rombongen Jakup.

⁶Dungna seh me Jakup ras kerina kalak si ras ia i Betel si nai igelari Lus i negeri Kanaan.

⁷Ipajekken Jakup i je sada batar-batar ingan ersembah man Dibata. Ibanna gelar ingan e “Dibata nu Betel”, erkiteken Dibata enggo encidahken baNa man Jakup i je, sanga ia lompat nadingken kakana.

⁸Suruh-suruhen Ribka, e me kap Debora, mate i je, janah ikuburken i teruh batang kayu si mbelin arah Selatan Betel. Em sabapna maka ibahan gelar kayu e “Kayu perngandungen”.

⁹Kenca Jakup mulih i Mesopotami nari, Dibata encidahken baNa ka man Jakup ras masu-masu ia.

¹⁰Nina Dibata man bana, “Gelarndu si Jakup, tapi mulai genduari nari kam igelari Israel.” Bagenda me maka Dibata nggelari ia Israel. [95†]

¹¹Jenari nina Dibata man bana, “Aku kap Dibata Si Erkuasa. Nteremlah kesusurenndu. Bangsa-bangsa ernini man bandu, kam jadi nini raja-raja. [96†]

¹²Kubereken man bandu ras man kesusurenndu taneh si nai Kubereken man Abraham ras man Isak.”

¹³Kenca e lawes Dibata i bas si Jakup nari.

¹⁴I bas ingan Dibata ngerana man bana e, ipajekken Jakup sada batu peringet-ingeten. Iamburkenna lau anggur ras minak saitun i babona, janah alu bage batu e enggo jadi sada batu si badia ingan ersembah man Dibata. [97†]

¹⁵Ingan e ibahan Jakup gelarna “Betel”.

¹⁶Jakup ras keluargana nadingken Betel. Sanga kalak e lanai ndauhsa i Eprata nari, enggo seh paksana Rahel mupus, tapi lanai lang-lang serana akapna mupus e.

¹⁷Tupung paksana mesui kal akapna nina bidan man bana, “Ola mbiar Rahel, dilaki kang anakndu si tubuh e.”

¹⁸Tapi Rahel nandangi mate me, janah ope denga peltep kesahna ibahanna gelar anakna e Benoni, tapi igelari bapana ia Benyamin.

¹⁹Kenca Rahel mate, ikuburken ia i tepi dalan ku Eprata; genduari Betlehem gelarna ingan e.

²⁰Ipajekken Jakup sada batu peringet-ingeten i je, janah seh asa genduari pe batu e tetap denga jadi tanda kuburen Rahel.

²¹Kenca bage iterusken Jakup perdalanenna, e maka ibahanna barung-barungna i kepar menara Eder.

²²Sanga Jakup ringan denga i bas taneh e, ersada kula me Ruben ras Bilha, e me gundik bapana. Ieteh Jakup si enda e maka seh kal atena nembehna. Lit sepuluh dua kalak anak Jakup dilaki. [98†]

²³Anak Lea e me Ruben (ia me anak Jakup sintua), Simeon, Lewi, Juda, Isakar, ras Sebulon.

²⁴Anak Rahel e me: Jusup ras Benyamin.

²⁵Anak Bilha budak Rahel e me: Dan ras Naptali.

²⁶Anak Silpa budak Lea e me: Gat ras Aser. Enda kerina tubuh i Mesopotami.

²⁷Jenari idahi Jakup bapana Isak i Mamre, deher Hebron, e me sada ingan i ja Isak pernah tading ras Abraham i je. [99†]

²⁸[28-29] Kenca Isak enggo seh tuana, e me kap ibas umur seratus waluh puluh tahun, mate ia. Duana anakna, e me kap Esau ras Jakup, ras-ras engkuburken ia.