Read Batak Karo KEJADIN 37 Bible Online

KEJADIN 37 - Batak Karo bible

KEJADIN 37

¹Jakup tetap tading i taneh Kanaan ingan bapana ndube.

²Enda me turi-turin keluarga Jakup. Jusup e me kap sekalak anak Jakup. Tupung umur sepuluh pitu tahun, ia ermakan biri-biri ras senina-seninana anak Bilha ras Silpa, duana gundik bapana. Kerina perbahanen seninana si la mehuli iturikenna man bapana.

³Ngenan ate Jakup man Jusup asa man kerina anakna si deban, erkiteken Jusup tubuh kenca ia enggo metua. Ibanna baju jubah si mejile man Jusup.

⁴Kenca enggo ieteh senina-seninana maka kelengen ate bapana man Jusup asang man kalak enda kerina, nembeh kal atena man seninana Jusup, seh maka ngerana pe lanai ia meriah.

⁵I bas sada berngi ernipi Jusup, janah kenca iturikenna nipina e man senina-seninana, ernembehna atena ngenen Jusup.

⁶Bagenda nina Jusup, “Begikenlah nipingku.

⁷Kita kerina sangana i juma ngerakuti gandum, jenari gandumku si enggo kurakuti e keke, tedis ia. Kerina berkisen gandumndu engkeleweti berkisen gandumku, kenca bage mungkuk ia kerina man berkisen gandumku e.”

⁸“Ntah akapndu kam raja janah kam si engkuasai kami?” nina senina-seninana nungkun. E maka ernembehna atena erkiteken kerina nipina ras kasakai si iturikenna kerna si e.

⁹Kenca bage ernipi ka Jusup. Nina man senina-seninana, “Ernipi denga ka aku, kuidah matawari, bulan, ras sepuluh sada bintang mungkuk man bangku.”

¹⁰Man bapana pe iturikenna ka nipina e, e maka ipandang bapana ia, “Nipi kai kin e? Akapndu kin maka nandendu, senina-seninandu ras aku, reh mungkuk man bandu?”

¹¹Cian ate senina-seninana kerina man Jusup, tapi bapana rukur kerna si e kerina. [102†]

¹²I bas sada wari sanga senina-senina Jusup lawes ku Sikem ermakan asuh-asuhen bapana,

¹³nina Jakup man Jusup, “To lawes kam ku Sikem, ku ingan senina-seninandu ermakan.” Nina Jusup njabapsa, “Banci, Bapa.”

¹⁴Nina bapana man Jusup, “To nehen senina-seninandu ntah mejuah-juah nge ia, bage pe asuh-asuhen kerina ntah labo kena kai pe. Kenca bage mulih kam janah turiken man bangku.” E maka isuruh bapana ia lawes i Baluren Hebron nari. Dungna seh me Jusup i Sikem.

¹⁵Isiar-siarna mbalmbal e. E maka lit sekalak dilaki jumpa ras ia, janah isungkunna Jusup nina, “Kai daramenndu e?”

¹⁶“Aku ndarami senina-seninangku si sangana ermakan asuh-asuhenna,” nina njabapsa. “Ietehndu kang i ja inganna ermakan?”

¹⁷Nina dilaki ndai, “Ia enggo lawes kerina jenda nari. Kubegi ia ngerana maka ku Dotan atena lawes.” E maka iterusken Jusup perdalanenna ngikuti seninana, janah dungna tunduksa i Dotan.

¹⁸Idauh-dauh nari enggo idah senina-seninana Jusup reh. Ope denga Jusup seh enggo ersada arih senina-seninana munuh ia.

¹⁹Nina senina-seninana sapih-sapih ia, “Ah enggo reh si pernipi-nipi.

²⁰Mari sibunuh ia, jenari siambekken maitna ku bas sada sumur si kerah enda. Sikataken kari maka ia enggo ibunuh rubia-rubia si merawa. Jenari siidah me kai jadina nipina e kerina.”

²¹Ibegi Ruben rencana kalak enda. E maka icubakenna nelamatken Jusup nina, “Ola sibunuh ia.

²²Siambekken saja ku bas sumur si lit i bas taneh si mesawang enda, tapi ola sisakiti ia.” Maka bagenda nina, ipulahina atena Jusup janah nuruh ia mulih ku bapana.

²³Kenca seh Jusup ku senina-seninana, isintapkenna jubah Jusup si mejile e.

²⁴E maka irintakna Jusup, iambekkenna ku bas sumur si enggo kerah.

²⁵Sanga ia man kerina rempet idah kalak enda sada rombongen kalak Ismael i bas perdalanen i Gileat nari ku Mesir. Unta kalak enda erbaban damar, kumenen, duruh si merim.

²⁶Nina Juda man senina-seninana, “Kai gunana sibunuh gia seninanta ras si rahasiaken pemunuhen e?

²⁷Sidayaken sajalah ia man kalak Ismael enda. Alu bage la perlu sisakiti ia. Lang pe seninanta sada dareh sada daging nge ia.” Payo iakap senina-seninana katana e,

²⁸e maka sanga mentas perbinaga bangsa Midian e, irintak kalak enda Jusup ndarat i bas sumur ndai nari, idayakenna man bangsa Ismael e, ergana dua puluh duit pirak. Ibaba bangsa Ismael me Jusup ku Mesir. [103†]

²⁹Sanga Ruben reh mulihken ku sumur e, lanai idapetina Jusup i je. Icaingkenna uisna perban ceda kal atena.

³⁰Idahina senina-seninana nina, “Lanai i je anak ndai! Uga naring e perbanku?”

³¹E maka igeleh kalak enda sada kambing, icelupkenna jubah Jusup ku bas dareh kambing e.

³²Ibaba kalak enda e man bapana nina, “Idat kami jubah enda. Jubah anakndu nge e?”

³³Minter itandaina jubah e, e maka nina, “Payo, enda jubah anakku Jusup. Enggo ipan rubia-rubia si merawa ia. Ugapa pe anakku Jusup enggo icaing-caingna.”

³⁴Icaingken Jakup uisna, jenari ipakena baju guni perban ceda kal atena. Itangisina anakna e erwari-wari dekahna.

³⁵Kerina anakna si dilaki ras si diberu reh ngapuli ia, tapi la ia nggit iapuli. Nina, “Lawes pe aku ku bas doni kematen, lalap kutangisi anakku.” Bage me tetap ia erceda ate erkiteken anakna Jusup.

³⁶Sanga si e, i Mesir, kalak Midian e enggo ndayaken Jusup man sekalak pegawai raja, Potipar gelarna. Ia sekalak kepala pengawal istana.