Read Batak Karo KEJADIN 38 Bible Online

KEJADIN 38 - Batak Karo bible

KEJADIN 38

¹Kira-kira i bas paksa e ka, Juda lawes nadingken senina-seninana. Kenca bage tading ia ras sekalak dilaki gelarna Hira anak kuta Adulam.

²I jah jumpa Juda ras sekalak singuda-nguda kalak Kanaan; gelar bapana Sua. Erjabu ia ras.

³Ipupusna sada anak dilaki, ibahanna gelarna Er.

⁴Mehuli ka kulana, e maka tubuh ka anakna dilaki; ibahanna gelarna Onan.

⁵Kenca bage tubuh denga ka tole anakna; ibahanna gelarna Sela. Sanga tubuh Sela, Juda sangana i Aksip.

⁶Ibuat Juda diberu man ndehara anakna Er, gelarna Tamar.

⁷Lagu langkah Er seh jahatna; erkiteken si e la ngena ate TUHAN e maka ibunuh TUHAN si Er.

⁸Kenca bage nina Juda man anakna Onan, “To lako mangani perkakanndu. Sehken tanggung jawabndu man bana selaku senina perbulangenna, gelah lit kesusuren kakandu.”

⁹Tapi ieteh Onan maka anak-anak e labo pagi jadi anakna. E maka sanga ia ersada kula ras perkakanna e, la ipelepasna lit anak kakana, alu ngamburkenca ku taneh.

¹⁰Perbahanenna e la mehuli iakap TUHAN, e maka ia pe ibunuh TUHAN ka.

¹¹Kenca bage nina Juda man permainna, “Mulih saja kam ku rumah bapandu; mbalu kam lebe nimai anakku Sela mbelin.” Bage nina perban mbiar ia ntah Sela pe mate ka denggo bagi kakana si dua e. Erkiteken si e mulih Tamar ku rumah bapana.

¹²Piga-piga paksa kenca si e, mate diberu si Juda. Kenca lepas wari erceda ate, ia ras temanna Hira, anak kuta Adulam, lawes ku Timna, ingan ngguntingi biri-birina.

¹³Lit kalak si ngatakenca man Tamar, “Bengkilandu lawes ku Timna ngguntingi mbulu biri-birina.”

¹⁴E maka itangtangi Tamar uis mbalu si ipakena; itutupina ayona alu tudung, kundul ia i kerabangen kuta Enaim, dalan ku Timna. Ieteh Tamar maka Sela, anak Juda si nguda enggo anak perana, tapi lalap langa ia ipejabuna ras Tamar.

¹⁵Sanga Juda ngidah Tamar, akapna ia diberu perdenggal, erkiteken itutupina ayona.

¹⁶Ideherina Tamar ku tepi dalan e, janah nina, “Mari ras kita medem.” (La ietehna maka permainna kap e.) Nina Tamar, “Adi nggit aku ras kam, kai atendu iberekenndu bangku?”

¹⁷Nina Juda, “Kubereken pagi bandu sada anak kambing i bas asuh-asuhenku nari.” Nina Tamar, “Banci, asal lit iberekenndu bangku barang jaminen seh kualoken pagi kambing e.”

¹⁸“Kai atendu kubereken bandu jaminenna?” nina Juda nungkun. Ngaloi diberu e nina, “Cincin stempelndu ras rantena bage pe ciken si ibabandu ena.” Ibereken Juda barang-barang e man Tamar, e maka medem ia ras. Kenca bage mehuli me kula Tamar.

¹⁹Mulih Tamar ku rumah, italangina tutup ayona, ipakena ka paken mbalu.

²⁰Isuruh Juda temanna Hira, maba kambing e gelah ibabana mulih barang jaminen e i bas diberu e nari tapi Hira la jumpa rassa.

²¹Isungkunna piga-piga dilaki i Enaim nina, “I ja diberu perdenggal si i tepi dalan enda mbarenda?” Nina kalak ndai ngaloi, “La kap pernah lit i jenda diberu perdenggal.”

²²Mulih Hira ndahi Juda janah nina, “La aku jumpa rassa. Nina kalak si i je la pernah lit diberu si perdenggal i je.”

²³Nina Juda, “Pelepas ibunikenna barang-barang e, gelah ola kita itawai jelma si nterem. Enggo kuusahaken nggalarisa, tapi la kam jumpa rassa.”

²⁴Kira-kira telu bulan kenca si e, lit si ngatakenca man Juda, “Permainndu Tamar enggo ceda perlangkahna, janah genduari enggo mehuli kulana.” Iperentahken Juda nina, “Baba ia ndarat, ciluk seh mate.”

²⁵Sanga Tamar ibaba ndarat, ipesehna kata man bengkilana, “Aku mehuli kulangku erkiteken sekalak dilaki, si mada barang-barang enda. Nen me barang-barang enda; ise empuna cincin stempel ras rante enda, bage pe ciken enda?”

²⁶Itandai Juda barang-barang e, e maka nina, “Labo ia si ersalah. Aku nge si la nehken tanggung jawabku man bana. Arusna kupejabu ia ras anakku Sela.” Jenari lanai pernah Juda medem ras ia.

²⁷Kenca enggo seh paksana ia mupus ietehna maka ia mupus anak rindu.

²⁸Sanga mesera iakapna, ndarat sada tan anakna. Itangkap bidan tan anak e irakutina alu benang megara, janah nina, “Enda sintua.”

²⁹Tapi irintak anak e ka tanna mulihi, e maka agina nge lebe tubuh. Nina bidan e, “Ipaksakenna kepe bana ndarat!” E maka Peres ibahanna gelarna.

³⁰Kenca e maka tubuh ka seninana, janah benang megara e i bas tanna, janah Sera ibahanna gelarna.