Read Batak Karo KEJADIN 39 Bible Online

KEJADIN 39 - Batak Karo bible

KEJADIN 39

¹Tupung si e kalak Ismael ndai enggo maba Jusup ku Mesir, jenari idayakenna man Potipar, sekalak pegawai raja. Potipar e me kap kepala pengawal istana.

²TUHAN si ngarak-ngarak Jusup, seh maka sangap ia i bas kerina pendahinna. Jusup tading ras tuanna bangsa Mesir e. [104†]

³Ieteh tuanna, maka TUHAN si ngarak-ngarak Jusup e maka kai pe idahikenna mehuli kerina ulihna.

⁴Meriah ukur Potipar ngidah lagu langkah Jusup, e maka ibahanna jadi suruh-suruhenna jine. Isuruhna ia ngurus rumahna ras kerina ertana.

⁵Menaken i jenari, ipasu-pasu TUHAN kerina isi jabu kalak Mesir e, bage pe ipasu-pasu TUHAN kerina si lit i rumahna ras i jumana.

⁶Iendesken Potipar kerina man Jusup, janah ia lanai lit kai pe man ukurenna, seakatan man saja ngenca. Jusup paguh dagingna dingen rupana pe mejile.

⁷La ndekahsa, ndehara tuanna mulai leket ukurna man Jusup, e maka ipindona gelah ras ia medem.

⁸Itulak Jusup pemindonna enda nina, “Nehenlah, sitik pe lanai icampuri tuanku urusen rumah enda, perban aku enggo i jenda. Iendeskenna man bangku guna ngurus kerina ertana.

⁹Seri kuasangku ras ia i bas rumah enda, janah kerina enggo iendeskenna bangku seakatan kam perban kam ndeharana. Adi bage i ja nge banci kulakoken perbahanen si la mehuli, janah erdosa man Dibata?”

¹⁰Aminna gia tep-tep wari iendik-endikna Jusup, lalap la nggit Jusup medem ras ia.

¹¹Tapi i bas sada wari sanga Jusup bengket ku rumah ndahiken dahinna, sada pe suruh-suruhen si ertugas i bas rumah e la i je.

¹²Itagangina baju Jusup nina, “Mari ras kita medem.” Tapi ipulahi Jusup bana, kiam ia ndarat, itadingkenna bajuna i bas tan diberu e.

¹³Kenca idah diberu e maka enggo itadingken Jusup bajuna janah enggo kiam ia ndarat,

¹⁴ilebuhina kerina suruh-suruhenna si erdahin i bas rumah e nina, “Nehenlah! Kalak Heber si ibaba dilakingku ku rumah enda megombang kal man banta kerina. Bengket ia ku bas kamarku janah iperkosana atena aku, tapi serko aku asa gegehku.

¹⁵Kenca ibegina aku serko, kiam ia ndarat, itadingkenna bajuna.”

¹⁶Ibuniken diberu e baju ndai seh ngayak perbulangenna mulih ku rumah.

¹⁷Kenca bage iturikenna man bana bagi si ndai nina, “Kalak Heber si ibabandu ku rumah enda, bengket ku kamarku njuruken aku.

¹⁸Tapi kenca serko aku kiam ia ndarat, itadingkenna bajuna deherku e.”

¹⁹Merawa kal ate tuanna man Jusup.

²⁰E maka isuruhna Jusup itangkap, dingen itamaken ku bas tutupen ingan tutupen tahanen raja. I je me Jusup tading.

²¹Tapi TUHAN kap si ngarak-ngarak Jusup dingen ipasu-pasuNa ia. E maka ngena ate penjaga rumah tutupen e man Jusup. [105†]

²²Isuruhna Jusup ngurus kerina kalak tutupen si deban, janah iendeskenna man bana kerina tanggung jawab kerna kai si ilakoken i bas rumah tutupen e.

²³Si njaga penjara e lanai perlu mperdiateken kasa kai dahin si iendeskenna ku bas tanggung jawab Jusup. Janah erkiteken TUHAN si ngarak-ngarak Jusup, kasa kai si idahikenna jore kerina.