Read Batak Karo KEJADIN 40 Bible Online

KEJADIN 40 - Batak Karo bible

KEJADIN 40

¹Lanai ndekahsa kenca si ndai, kalak si nikapken inemen raja Mesir ras kepala si ngaturken nakanna ersalah man raja e.

²Nembeh ate raja man pegawaina si dua kalak e,

³e maka ipenjarakenna kalak enda i rumah kepala penjara, e me i bas ingan Jusup ipenjaraken.

⁴Ndekah kalak enda tading i penjara, e maka iangkat kepala penjara e Jusup jadi pelayanna.

⁵I bas sada berngi, ernipi me ibas penjara kalak si nikapken inemen ras kepala si ngaturken nakan e. Nipi kalak si dua e la seri antusenna.

⁶Pagina sanga erpagi-pagi idahi Jusup kalak enda. Idahna kalak enda lolah-lolah.

⁷Nungkun Jusup man bana nina, “Engkai maka jutjut kal kam sendah?”

⁸Nina kalak ndai njabapsa, “Duana kami ernipi, tapi ise pe i jenda la lit si beluh ngantusisa.” “Dibata nge si mereken kengasupen ngantusi nipi,” nina Jusup. “Turiken lah man bangku nipindu e.”

⁹E maka nina si nikapken inemen raja, “I bas nipingku lit i lebe-lebengku sada batang anggur.

¹⁰Lit telu dahanna. Kenca reh bulungna, minter reh bungana, jenari buah anggur mulai tasak.

¹¹Aku sangana ncikep calung ingan minem raja; e maka kubuati buah anggur e, kupereh ku bas calung ndai, kenca bage kubereken man raja.”

¹²Nina Jusup, “Enda me antusenna: dahan si telu e, e me telu wari.

¹³Telu wari nari ipulahi raja me kam ibas tutupen nari, janah isuruhna kam mulih erdahin bagi si gelgel e. Isikapkenndu ka denggo inemen raja bagi si gelgel e asum kam jadi si ngaturken inemenna.

¹⁴Tapi inget min aku kenca enggo sikap pagi sikerajangenndu. Kuarap arah perkuah atendu maka tersinget kam man raja kerna aku, janah sampati aku gelah ndarat i bas rumah tutupen enda nari.

¹⁵Sabap si tuhuna kal, iculik nge aku i taneh Heber nari, janah i Mesir enda pe labo lit perbahanenku si erbanca aku patut itamaken ku bas tutupen.”

¹⁶Kenca ibegi kepala si ngaturken pangan, maka mehuli antusen nipi si ngaturken inemen, e maka nina man Jusup, “Aku pe ernipi. Aku sangana njujung telu raga roti.

¹⁷I bas raga si arah dasna kal lit erbage-bage pangan raja, tapi sangana denga kujujung ipangani perik-perik pangan e.”

¹⁸Nina Jusup njabapsa, “Enda me ertina: raga si telu e, ertina telu wari.

¹⁹Telu wari nari ipulahi raja me kam gelah itampul kerahungndu! Kenca bage iolah-olahna badanndu i das tiang, e maka ipangani perik-perik dagingndu.”

²⁰Telu wari kenca si e sangana ulang tahun raja iundangna kerina pegawaina. Isuruhna gelah ipedarat singaturken pangan ras inemenna, jenari ibabana kalak si dua e ku lebe-lebe pegawai-pegawaina.

²¹Si ngaturken inemen e isuruhna mulihi ndahiken dahinna si gelgel,

²²tapi itampulna kerahung kepala si ngaturken pangan e. Kerina e, payo jadi bagi si enggo ikataken Jusup.

²³Amin bage gia la iinget si ngaturken inemen e si Jusup, sabap tuhu-tuhu lupa ia.