Read Batak Karo KEJADIN 41 Bible Online

KEJADIN 41 - Batak Karo bible

KEJADIN 41

¹Dua tahun kenca si e, ernipi raja Mesir, maka ia sanga tedis i tepi Lau Nil.

²Iidahna pitu lembu mbur, mejile, ndarat i bas lau e nari, jenari nggagat ia.

³Kenca bage ndarat ka pitu lembu kertang-kertang. Idahina lembu si mejile ras mbur ndai ku tepi lau.

⁴E maka ipangani lembu si kertang-kertang e lembu si mbur ndai seh keri. Kenca bage medak me raja.

⁵Kenca bage tunduh ka raja, ernipi ka ia. Iidahna i bas sada ngkebena pitu ruhi page perngis.

⁶Jenari turah ka pitu ruhi page si lambang ras melus iembusken angin si melas.

⁷E maka pituna ruhi page lambang ndai nelen pituna page si perngis ndai. Medak ka raja janah ietehna maka ia enggo ernipi.

⁸Pagina erpagi-pagi lanai ia tenang. E maka idilona kerina guru-guru si baso ras kalak si erpemeteh i Mesir. Iturikenna man kalak enda nipina, tapi sada pe la ngasup ngantusisa. [106†]

⁹E maka nina si ngaturken inemen man raja, “Sendah arus kuakuken salahku.

¹⁰Mbarenda itembehindu aku ras kepala si ngaturken panganndu, e maka itutupkenndu kami i bas rumah kepala penjara.

¹¹I bas sada berngi ernipi kami duana. Duana nipi kami la seri antusenna.

¹²I bas paksa si e lit sekalak i je anak perana kalak Heber, e me budak kepala penjara. Ikataken kami bana nipi kami e, jenari iantusina nipi kami ndai.

¹³Kerina jadi bagi si ikatakenna. Isuruhndu aku erdahin bagi si gelgel, tapi itampulndu kerahung kepala si ngaturken pangan.”

¹⁴E maka idilo raja me Jusup, janah minter ia ibaba ipenjara nari. Kenca ia ercukur, ras ganti uis, reh ia ngadap raja.

¹⁵Nina raja man bana, “Lit nipingku, tapi la lit ise pe si ngasup ngantusisa. Lit singatakenca maka kam beluh ngantusi nipi.”

¹⁶Nina Jusup njabapsa, “Labo terantusi aku, o Raja, tapi Dibata banci mereken antusen si mehuli.”

¹⁷Nina raja, “Ernipi aku maka tempa-tempa tedis aku i tepi Lau Nil.

¹⁸Kuidah pitu lembu mejile ras mbur, ndarat i bas lau e nari, jenari nggagat ia.

¹⁹Kenca bage ndarat ka pitu lembu si deban si kertang-kertut, tempa-tempa tading tulanna nari ngenca. I belang-belang taneh Mesir enda e denga nge kuidah lembu si bage mejinna.

²⁰Ipangani lembu si kertang-kertut ndai lembu si mbur e seh keri.

²¹Tapi ise pe la meteh kerna si e, erkiteken lembu kertang-kertut ndai tetap nge kertang ras mejin. Dungna medak aku.

²²Ernipi ka aku, maka kuidah pitu ruhi page perngis, turah i bas sada ngkebena.

²³Kenca bage luar pitu ruhi page si lambang ras melus iembusken angin si melas.

²⁴Pituna ruhi page si lambang ndai nelen ruhi page si perngis ndai. Kuturiken nipi e man guru-guru si baso, tapi sekalak pe la ngasup ngantusisa.”

²⁵Nina Jusup man raja, “Duana nipi e seri antusenna; enggo ikataken Dibata man bandu, kai atena ilakokenNa.

²⁶Pituna lembu si mbur e, e me pitu tahun, pituna ruhi page si perngis e, e pe pitu tahun; duana seri ertina.

²⁷Pituna lembu kertang-kertang e si reh arah pudi, bage pe pituna ruhi page si lambang ras melus iembus angin si melas e, e me pitu tahun kelihen.

²⁸Bagi si kukataken ndai, maka Dibata enggo nuduhken kai ateNa si ibanNa.

²⁹Pitu tahun dekahna riba-iba pangan i belang-belang Mesir.

³⁰Kenca bage jadi me pitu tahun dekahna kelihen, e maka tahun-tahun si lepas e ilupaken kalak, erkiteken kelihen e ncedaken negeri e.

³¹Paksa nakan riba-iba ilupaken kalak kerina, erkiteken kelihen e tuhu-tuhu seh serana.

³²Kam ernipi dua kali, ngatakenca maka kerina kejadin e enggo itetapken Dibata. Pasti ilakokenNa i bas paksa si lanai ndekah.

³³Genduari arus ipilihndu sekalak si erpemeteh ras pentar guna ngaturken negeri enda.

³⁴Arus pe iangkat kam pegawai-pegawai si deban guna pepulung seperlima i bas ulih peranin tupung paksa nakan riba-iba si pitu tahun e.

³⁵Suruh pepulungna kerina pangan sanga paksa riba-iba si reh enda, janah bereken man bana kuasa muniken pangan e i tep-tep kuta, ras njagaisa.

³⁶Pangan e jadi persedian man negeri enda, i bas paksa kelihen si pitu tahun i Mesir gelah rayat la mate kelihen i bas paksa mesera.”

³⁷Raja ras pegawai-pegawaina setuju rencana enda.

³⁸Nina raja man kalak enda, “Labo lit dat kita jelma tersikapen asang Jusup enda, sekalak si lit kesah Dibata i bas dirina jine.”

³⁹Nina raja man Jusup, “Enggo icidahken Dibata man bandu kerina kejadin enda. Erkiteken si e teridah maka ganjangen pemetehndu ras kebeluhendu asang ise pe.

⁴⁰E maka kutamaken kam jadi si ngaturken negeringku, janah kerina rayatku patuh man bandu. Kenca aku kuasandu ngenca si mbelinna i bas negeri enda.” [107†]

⁴¹Genduari kuangkat kam jadi wakil raja i belang-belang Mesir.

⁴²Itangtangi raja cincin stempel kerajanna, jenari itamakenna ku jari-jari Jusup. Ipakekenna man Jusup baju si mejilena kal, janah iburakenna man Jusup bura emas. [108†]

⁴³Iberekenna gereta kinirajan si peduaken man Jusup janah pengawal kehormaten erdalan arah lebe gereta e janahna erlebuh, “Pelapang! Pelapang dalanna.” Bage me Jusup enggo itangkuhken jadi wakil raja i belang-belang taneh Mesir.

⁴⁴Nina raja man Jusup, “Aku raja tapi ise pe la banci erban kai pe adi la nungkun man bandu.”

⁴⁵[45-46] Ibanna gelar Jusup gelar bangsa Mesir e me: Sapnat Panea. Iberekenna ka sada diberu man ndeharana e me: si Asenat anak Potipera imam i kuta Heliopolis. Sanga e enggo telu puluh tahun umur Jusup. Itadingkenna istana raja, lawes ia ndalani taneh Mesir kerina.

⁴⁶

⁴⁷I bas pitu tahun si riba-iba e, melala tuhu ulih taneh.

⁴⁸E maka ipepulung Jusup me kerina pangan e, itamakenna ku lumbung i bas tep-tep kuta. I tep-tep kuta ipepulungna buah juma sekelewetna.

⁴⁹Seh kal buena juma ipepulungna seh maka enggo seri buena ras kersik i tepi lawit. Perban e lanai isukati pe.

⁵⁰Ope seh paksa kelihen e, enggo tubuh dua anak Jusup arah perjabunna ras Asnat.

⁵¹Nina Jusup, “Erkiteken perbahanen Dibata enggo lupa aku kiniseranku ras keluarga bapangku.” E maka ibahanna gelar anakna e Manase.

⁵²Tole nina, “Enggo ibereken Dibata man bangku tuah i taneh kiniseranku.” E maka ibahanna gelar anakna si peduaken Eperaim.

⁵³Paksa mehumur si pitu tahun e enggo lepas.

⁵⁴E maka mulai me paksa kelihen pitu tahun, bali ras si ikataken Jusup. Tep-tep negeri si deban enggo kelihen kerina, i Mesir ngenca lang. [109†]

⁵⁵Kenca kalak Mesir mulai kelihen, ipindona nakan man raja. Isuruhna ndahi Jusup, ras ngelakoken bagi si ikataken Jusup man kalak enda. [110†]

⁵⁶Sanga kelihen ngkenai kerina negeri, italangi Jusup me kerina lumbung ingan nimpan pangan. Idayakenna man kalak Mesir, erkiteken kelihen e tuhu-tuhu mesangat.

⁵⁷Jelma rehen ku Mesir i belang doni nari nukur nakan man Jusup, erkiteken kelihen ngkenai kerina ingan alu mesangat.