Read Batak Karo KEJADIN 42 Bible Online

KEJADIN 42 - Batak Karo bible

KEJADIN 42

¹Kenca ibegi Jakup maka i Mesir melala gandum, e maka nina man anak-anakna, “Engkai maka si nehenen saja kena?

²Enggo kubegi maka i Mesir melala gandum. To lawes ku jah nukursa gelah ola kita mate la man.” [111†]

³E maka lawes me sepuluh kalak senina Jusup nukur gandum ku Mesir.

⁴Tapi Benyamin, e me senina Jusup sada nande, la ipediat Jakup ngikut ras kalak enda, erkiteken mbiar ia ntah lit denggo kai-kai jadi man bana.

⁵Anak-anak Jakup lawes ras kalak si deban nukur gandum e, erkiteken kelihen e jadi i belang-belang taneh Kanaan.

⁶Jusup, selaku wakil raja i taneh Mesir sangana ndayaken gandum man kerina kalak si reh i belang-belang doni nari. E maka reh me senina-senina Jusup nembah mungkuk i lebe-lebena, ayona seh ku taneh.

⁷Kenca enggo iidah Jusup seninana, itandaina kalak enda, tapi ipekulah-kulahna la itandaina. Alu kasar isungkunina kalak ndai nina, “Ja nari kam?” Nina kalak enda njabapsa, “Kami i Kanaan nari, nukur nakan ate kami.”

⁸Dage itandai Jusup nge seninana e kerina, tapi seninana e la nandai ia.

⁹Iingetna me nipina gelgel e kerna seninana. Jenari nina, “Mata-mata nge kena. Ndaram-ndarami kelemahen negeri kami enda nge ate kena ku jenda.” [112†]

¹⁰“Lang Tuan,” nina kalak enda njabapsa. “Kami budakndu enda kerina reh ku jenda, nukur nakan ate kami.

¹¹Kami kerina sada bapa. Kami labo mata-mata Tuan, kami kalak bujur-bujur nge.”

¹²Nina Jusup man kalak enda, “Labo! Ngenen kelemahen negeri kami enda nge ate kena kerina ku jenda.”

¹³Nina kalak enda, “Kami sepuluh dua kalak ersenina Tuan, kerina kami sada bapa; ia ringan i taneh Kanaan; sada i bas kami enggo mate, sada nari e me si nguda tading ras bapa.”

¹⁴Nina Jusup njabapsa, “Bagi kukataken ndai mata-mata nge kena kerina.

¹⁵Bagendam carana kena iuji. I bas gelar raja ersumpah aku, maka la banci sada pe kena lawes jenda nari adi la reh agi kena si nguda ndai ku jenda.

¹⁶Sekalak kena ngelegisa, si deban itutup i jenda. Alu bage banci iuji ntah kin tuhu-tuhu kai si ikataken kena e. Adi la tuhu, i bas gelar raja ningku, kena pe kerina pasti mata-mata.”

¹⁷Kenca bage, itutupna kalak e kerina i bas tutupen telu wari dekahna.

¹⁸Petelu wariken nina Jusup man bana kerina, “Aku kalak si mbiar man Dibata. Kupelepas kena nggeluh, la ibunuh, tapi alu sada sarat.

¹⁹Metehsa tuhu-tuhu kena bujur, sekalak kena tading i bas tutupen; si debanna banci mulih maba gandum si enggo itukur kena e man keluarga kena si sangana kelihen e.

²⁰Kenca bage arus ibaba kena senina kena si nguda ndai man bangku. Arah e kari tereteh maka tuhu kepe si ikataken kena e, e maka la kena kubunuh.” Kai si ikataken Jusup payo akap kalak enda.

²¹Ngeranai ia sapih-sapih ia, “Salah kap kita kerna perbahanenta man aginta mbarenda; si idah kuga suina atena mbarenda asum ia mindo perkuah ateta, tapi la diateta. Em sabapna maka mesui ka ateta genduari.”

²²Nina Ruben, “Kukataken nge man kena ola kuga pe ban anak e ningku, tapi la begiken kena. Genduari kematenna ibalas man banta.” [113†]

²³Ierti Jusup nge kerina ranan kalak enda, tapi la ieteh kalak enda, perban Jusup ngerana erkelang-kelangken kalak si deban.

²⁴Itadingken Jusup kalak ndai, kenca bage tangis ia. Kenca enggo ka ia banci ngerana, mulihken ia. Ipilihna Simeon, janah isuruhna iiket i lebe-lebe kalak ndai kerina.

²⁵Iperentahken Jusup ngisi guni senina-seninana alu gandum ras ngulihken duit seninana e ku tep-tep gunina, bage pe mereken nakan panganna i bas perdalanen. Kerina si enda idalanken.

²⁶Kenca bage iampeken kalak enda gandum si enggo itukurna e ku das keledena e maka lawes ia.

²⁷I bas ingan kalak enda erberngi, sekalak i bas ia nalangi gunina, sabap mere man keledena atena. Idahna duit ampar arah das guni e.

²⁸“Senku iulihken,” nina man seninana. “Enda i bas guningku!” Debet-debet pusuh kalak enda. Si sungkunen ia sapih-sapih ia alu kebiaren, “Kai nge deba perbahanen Dibata man banta e?”

²⁹Kenca kalak enda seh i Kanaan jumpa ras bapana Jakup, iturikenna bana kerina si jadi.

³⁰Nina kalak enda, “Wakil raja Mesir la mehuli cakapna man kami; ituduhna kami maka imata-matai kami negerina.

³¹‘Labo kami mata-mata,’ ningkami, ‘kami kalak bujur-bujur.

³²Sepuluh dua kami senina i bas sada bapa e. Sekalak senina kami enggo mate. Si nguda ras bapa kami tading i Kanaan.’

³³Nina wakil raja e, ‘Bagenda ku ban dalanna nguji kena kalak bujur ntah lang: Tading kena sekalak ras aku; si debanna maba gandum man keluarga kena si kelihen, janah banci kena lawes.

³⁴Baba agi kena si nguda man bangku. Alu bage kueteh maka labo kena mata-mata, tapi kalak bujur; kuulihken pagi senina kena, janah banci kena tading i jenda dingen erbinaga.’ ”

³⁵Kenca iuseken kalak enda kerina gunina, sekalak-sekalak ia ndat gajut-gajut senna; sanga idah kalak enda sen e, kalak enda ras bapana mbiar kal.

³⁶Nina bapana, “Entah merincuh nge kam gelah bene kerina anakku? Jusup enggo bene; Simeon pe enggo bene. Genduari ibabandu ka atendu Benyamin. Ateku ngenca mesui!”

³⁷Nina Ruben man bapana, “Banci ibunuhndu duana anakku si dilaki adi la pagi kubaba Benyamin mulihken man bandu. Endesken ia ku bas tanku, tentu kubaba ia pagi mulih.”

³⁸Tapi nina Jakup, “La banci lawes anakku ras kam. Seninana enggo mate, tading ia nari nge. Kune kenca jadi cilaka man bana i bas perdalanen, banci erkiteken ceda ateku e aku mate sabap aku enggo metua.”