Read Batak Karo KEJADIN 43 Bible Online

KEJADIN 43 - Batak Karo bible

KEJADIN 43

¹Kelihen e reh sangatna i taneh Kanaan.

²Kenca nakan si ibaba i Mesir nari enggo keri ipan keluarga Jakup nina Jakup man anak-anakna, “Lawes lah mulihken ku Mesir nukur pangan sitik man banta.”

³Nina Juda man bapana, “Kalak si erkuasa e alu tangkas ngataken man kami, la banci kami ngadap man bana adi la radu ras agi kami.

⁴Adi iberendulah agi kami ikut ras kami, nggit kami lawes nukur pangan e man bandu.

⁵Adi la iberekenndu, la kami lawes, sabap ikatakenna man kami, la kami banci ngadap man bana, pala ikut agi kami.”

⁶Nina Jakup, “Engkai maka itambahindu kesusahenku alu ngataken man bana maka lit denga seninandu si deban?”

⁷Nina kalak enda njabapsa, “Lalap isungkunina kerna diri ras keluarga kami, ‘Nggeluh denga bapandu? Lit denga seninandu si deban?’ Arus ijabap kami penungkunenna. Uga pemeteh kami maka isuruhna ka kami reh maba senina kami?”

⁸Nina Juda man bapana, “Bereken lah anak e ras aku, gelah minter kami berkat. Alu bage la lit sada pe kita mate kelihen.

⁹Kuendesken kesahku jadi jaminenna; aku ertanggung jawab kerna ia. Adi la ia kubaba mulih ku lebe-lebendu alu mejuah-juah, rasa lalap aku mersan kesalahenku.

¹⁰Bicara la min ndai si pelawen-lawen bagenda, enggo min ndai kita seh dua kali pe mulih-ulih.”

¹¹Nina bapana man kalak enda, “Adi bage nari ngenca maka banci, babalah dage ulih taneh enda si mejilena kal jadi luahndu man wakil raja e. Tama ku bas gunindu: kumenen, tengguli, rempah-rempah ras damar, buah kembiri ras buah ketapang.

¹²Baba ka pe sen dua kali ganda, sabap arus iulihkenndu sen si lit i bas gunindu mbarenda. Tah kesilapen nge mbarenda.

¹³Baba dage agindu e, jenari minter kam berkat ndahi wakil raja e.

¹⁴Dibata si Mada Kuasa lah si erbahanca maka mekuah ate wakil raja e, maka iulihkenna Benyamin ras seninandu si deban man bandu. Adi kerna aku, adi la kin banci lang aku kebenen anak-anakku, benelah.”

¹⁵Kenca bage ibuat kalak enda me luahna ras sen dua kali ganda, e maka lawes ia ku Mesir ras Benyamin. I jah ngadap me ia kerina man Jusup.

¹⁶Kenca idah Jusup si Benyamin ras kalak enda nina man suruh-suruhen si ngurus rumahna, “Baba kalak enda ku rumahku. Ras kami man ciger, e maka geleh sada rubia-rubia, janah sikapken kerina.”

¹⁷Ilakoken suruh-suruhen bagi si iperentahken man bana, ibabana senina-seninana e ku rumah Jusup.

¹⁸Sanga kalak enda ibaba ku rumah, mbiar ia, janah nina sapih-sapih ia, “Kita ibaba ku jenda perban sen si iulihken i bas guninta sanga kita tangtangna ku jenda. Iemona me kita kari rempet, ibuatna kerina kaldenta, kenca bage ibahanna kita jadi suruh-suruhenna.”

¹⁹Erkiteken si e i lebe-lebe pintu rumah e nina kalak enda man suruh-suruhen ndai,

²⁰“Bagenda, o Tuan! Pernah kami ku jenda mbarenda nukur nakan.

²¹[21-22] Kenca kami seh i bas ingan pengadi-ngadin kami muat mulih, italangi kami guni kami kerina, janah i bas guni kami sekalak-sekalak idat kami sen i babo gandum i bas guni e, sitik pe la kurang beliganna. La ieteh kami ise ngulihken sen e ku karung kami. E maka iulihken kami ate kami bandu. Ibaba kami pe sen tole man penukur pangan.”

²³Nina suruh-suruhen, “Ola aru atendu. La pada mbiar. Ugapa pe Dibatandu, Dibata bapandu nge si namaken sen e ku bas gunindu. Enggo me kualoken galarndu.” Kenca bage ibabana Simeon ku kalak enda.

²⁴Ibaba suruh-suruhen ndai kalak e ku bas rumah. Iberekenna lau guna murihi nahena, janah keledena pe iberena gagaten.

²⁵Isikapkenna luahna guna ipersembahken man Jusup kenca kari ia mulih ciger, perban enggo ikataken man kalak enda maka ras ia man ciger.

²⁶Kenca enggo seh Jusup i rumahna, ibuat kalak ndai luahna jenari ipersembahkenna man Jusup alu erjimpuh mungkuk i lebe-lebena.

²⁷Ikataken Jusup mejuah-juah man bana kerina, jenari nina, “Kai berita i bas bapandu nari? Mbarenda pernah iturikenndu bangku kerna ia. Nggeluh denga nge ia? Ma mejuah-juah nge?”

²⁸Nina kalak enda ngaloi, “Suruh-suruhenndu, bapa kami, nggeluh denga janah mejuah-juah nge.” Jenari erjimpuh dingen mungkuk ia kerina i lebe-lebe Jusup.

²⁹Kenca idah Jusup agina Benyamin, anak nandena, nungkun ia nina, “Enda kin seninandu si nguda, si ikatakenndu mbarenda bangku? Dibata lah si masu-masu kam, anakku.”

³⁰Kenca bage rempet itadingken Jusup ingan e, erkiteken enggo simpar atena metedeh ngenen agina e. Menam lanai terampersa bana, e maka lawes ia ku kamarna, janah tangis i je.

³¹Kenca ia erduhap, ndarat ia ndahi seninana. Janahna nahan ukurna, isuruhna gelah nakan ielaken.

³²Pedauh-dauh ingan Jusup man ras senina-seninana. Kalak Mesir si man i je serap ka, sabap hagan iakapna ia asa kalak Heber.

³³Siala-alan perkundul Jusup ras senina-seninana, raturen rikutken umurna, menaken i bas sintua nari ku si nguda. Ngenehen cibal perkundul e, sinehenen ia, janah mamang atena.

³⁴Ielaken me nakan i bas meja Jusup nari. Man Benyamin ibereken lima kali buena asang man si deban. Man ras minem kalak enda ras Jusup janah meriah kal akapna kerina.