Read Batak Karo KEJADIN 44 Bible Online

KEJADIN 44 - Batak Karo bible

KEJADIN 44

¹Iperentahken Jusup man suruh-suruhen si ngurus rumahna, “Asak guni kalak enda alu pangan asa terbabasa, janah tamaken senna e i bas gunina sekalak-sekalak.

²Tamaken calung ingan minemku, calung pirak e, i bas guni agina si nguda radu ras sen penukur gandum e.” Ilakoken suruh-suruhen bagi si iperentahken Jusup.

³Pagina lampas erpagi-pagi ipeberkat me kalak enda ras keledena kerina.

⁴Langa ndauhsa kalak enda nadingken kuta e nina Jusup man suruh-suruhenna, “Pedasken ayaki kalak ndai. Kenca enggo tundukndu kalak e sungkun ia, ‘Engkai maka ibalasndu perbahanen si mehuli alu perbahanen si jahat?

⁵Engkai maka itangkondu calung pirak tuanku? E kap ingan minemna, si ipakena guna meteh kejadin si reh alu ertendung. Jahat kal perbahanenndu e!’ ”

⁶Kenca itunduksa kalak e iulihina ka ngatakenca bagi si ndai man kalak e.

⁷Nina kalak enda njabap suruh-suruhen e, “Kai tujunna cakapndu e, Tuan? Ersumpah kami maka la lit ibahan kami si bage.

⁸Ietehndu ibaba kami mulih i taneh Kanaan nari duit si idat kami i bas guni kami. I ja nge kami nggit nangko pirak tah emas i bas rumah tuanndu nari?

⁹Tuan, adi lit sekalak i bas kami terdat i bassa, ukum mate ia, janah kami kerina jadi budakndu.”

¹⁰Nina suruh-suruhen e, “Payo kuakap; tapi kalak si muniken calung e saja ngenca jadi budakku, si debanna banci mulih alu bebas.”

¹¹E maka pedas ipesusur kalak enda gunina, janah tep-tep kalak nalangi karungna.

¹²Alu megermet ipepayo suruh-suruhen ndai guni kalak e, menaken i bas sintua nari seh ku si nguda; dungna terdat calung e i bas karung Benyamin.

¹³E maka iamparkenna barang-barangna ku das keledena, mulihken ia kerina ku kuta e.

¹⁴Kenca Juda ras senina-seninana seh i rumah Jusup, idapetina Jusup i je. Erjimpuh kalak enda i lebe-lebena.

¹⁵Nina Jusup, “Uga nge perbahanenndu e? La kin ietehndu maka kalak si erkuasa bagi aku enda banci meteh ukur alu ertendung?”

¹⁶Nina Juda njabapsa, “Uga denga nge ningkami man bandu Tuan? Uga nari ningkami pebujur diri kami? Enggo icidahken Dibata kesalahen kami. Genduari kerina kami jadi budakndu, la saja kalak si i bas ia terdat calung e.”

¹⁷Nina Jusup, “E, lang! La aku nggit erban bage. Kalak si muat calung e saja nge ngenca jadi budakku. Si debanna banci mulih alu mejuah-juah ndahi bapandu.”

¹⁸Reh Juda ndeheri Jusup nina, “Sentabi, Tuan, ngarap aku maka iberendu min aku ngerana man bandu alu bebas. Ola kam nembeh; sabap iakap kami bali nge kam ras raja negeri enda.

¹⁹O, Tuan, isungkunndu kami, ‘Lit denga nge bapandu tah seninandu si deban?’

²⁰Ngaloi kami, ‘Lit denga bapa kami si enggo metua, bage pe agi kami si nguda; ia tubuh kenca bapa kami enggo metua. Seninana sada nande sada bapa enggo mate, e maka ia naring tading anak nandena. Lanai kal lang-lang kelengna ate bapana man bana.’

²¹Tuan, isuruhndu kami maba ia ku jenda, gelah banci idahndu ia.

²²Ningkami njabap kam, ‘La banci itadingken anak e bapana; adi itadingkenna, mate me bapana.’

²³E maka nindu, ‘La banci kam reh ngadap man bangku adi la ras agindu si nguda.’

²⁴Sanga kami mulih ku bapa kami ituriken kami man bana kai si enggo ikatakenndu.

²⁵Asum isuruhna ka kami mulihken ku jenda nukur pangan man kami,

²⁶ningkami njabapsa, ‘La banci kami lawes; labo kami ibere ngadap wakil raja e pala ikut agi kami si nguda. Banci kami lawes adi agi kami si nguda pe ikut ras kami.’

²⁷Nina bapa man kami, ‘Ietehndu nge maka ndeharangku si Rahel dua ngenca anakna.

²⁸Sekalak i bas ia enggo nadingken aku. Ugapa pe enggo me ia icaing-caing rubia-rubia si merawa, sabap lanai pernah ia kuidah kenca ia lawes.

²⁹Adi si sada enda pe ibuatndu ka genduari i bas aku nari, janah kune kenca kai-kai jadi man bana, ugapa pe mate naring aku erkiteken ceda ate si ibahanndu e, sabap aku enggo metua.’ ”

³⁰ [30-31] “E maka genduari Tuan,” nina Juda nerusken cakapna, “adi mulihken aku ndahi bapa la ras anak e, kenca idahna anak e la ras aku, mate me ia. Kesahna tergantung man kesah anak enda, janah erkiteken enggo bage ia tuana, ugapa pe mate naring ia erkiteken ceda-ate si ibahan kami man bana.

³²Lang pe, enggo aku erpadan man bana maka kuasamken kesahku guna keselamaten anak e. Kukataken man bana, adi la kubaba anak e mulihken man bana, kupersan kesalahen e kidekah geluhku.

³³E maka genduari Tuan, aku me tading i jenda jadi budakndu gancih anak e; pelepas ia mulih ras senina-seninana.

³⁴Uga nge ningku mulih njumpai bapangku adi anak e la ras aku? La aku ngasup ngidah mara si bage jadi man bapangku.”