Read Batak Karo KEJADIN 45 Bible Online

KEJADIN 45 - Batak Karo bible

KEJADIN 45

¹Lanai tertahan Jusup ukurna i lebe-lebe suruh-suruhenna kerina, e maka isuruhna kalak nadingken ingan e. La lit ise pe si deban ras Jusup sanga iturikenna man senina-seninana ise kin ia si tuhuna. [114†]

²Perban gangna sorana tangis kalak Mesir pe nterem megisa, janah berita e ipeseh ku istana raja.

³Nina Jusup kempak senina-seninana, “Aku kap si Jusup. Nggeluh denga nge bapangku?” Tapi perban biarna senina-seninana e megi si e lanai ia ngasup njabapsa.

⁴E maka nina Jusup man kalak enda, “Mari terdeheren ku jenda.” Ideheri kalak enda ia, e maka nina Jusup, “Aku kap seninandu si Jusup si dayakenndu ku Mesir.

⁵Genduari ola aru atendu, ola isalahkenndu bandu erkiteken idayakenndu aku ku jenda. Si tuhuna Dibata nge si erbahan maka aku leben seh asang kam ku jenda guna nelamatken kalak si nterem.

⁶Enda pedua tahunken denga nge kelihen i negeri enda. Lima tahun nari dekahna Ia lit kalak si nenggala tah pe rani.

⁷Dibata si erbahanca maka aku leben seh asang kam, guna nelamatken kam alu cara si luar biasa enda, gelah alu bage kam ras kesusurenndu selamat.

⁸Erkiteken si e si tuhuna labo kam si erbahanca maka aku seh i jenda tapi Dibata nge. IbahanNa aku jadi penungkunen raja. IberekenNa man bangku kuasa nandangi kerina negeri enda; aku me si merentah kerina negeri Mesir.

⁹Genduari pedaslah mulih ku bapangku; kataken man bana, maka bagenda nina anakna Jusup, ‘Enggo ijadiken Dibata aku jadi si merentah belang-belang negeri Mesir; minterlah kam reh. [115†]

¹⁰Banci kam ringan i daerah Gosen gelah ndeher ras aku -- kam, anak-anakndu, kempu-kempundu, biri-birindu, kambingndu, lembundu, ras kerina sikerajangenndu si deban.

¹¹Adi i Gosen kam ringan, banci kam kupekena-kena. Lit lima tahun nari dekahna kelihen enda; la ateku kam mate kelihen ras keluargandu bage pe ras asuh-asuhenndu.’ ”

¹²Iterusken Jusup cakapna, “Genduari kerina kam, bage pe agingku Benyamin, enggo ngidahsa maka aku tuhu-tuhu kap si Jusup.

¹³Turiken man bapangku kuga belinna kuasangku i taneh Mesir; turiken man bana kerina si enggo idahndu. Kenca bage pedas ia baba ku jenda.”

¹⁴Idakep Jusup agina Benyamin janahna tangis. Benyamin pe tangis sanga ndakep Jusup.

¹⁵Kenca bage, sanga tangis denga, idakepi Jusup kerina seninana, iemaina. Kenca bage maka mulai seninana ngerana ras Jusup.

¹⁶Kenca seh berita e ku istana raja, maka enggo reh senina Jusup, meriah ukur raja ras kerina pegawaina.

¹⁷Nina man Jusup, “Kataken man senina-seninandu kerina gelah iampekenna barang-barangna ku das keledena gelah ersikap mulih ku negeri Kanaan.

¹⁸Suruh ia kerina ngelegi bapana ras keluargana mulihken ku jenda. Aku merekenca taneh si mejilena kal i Mesir enda man bana, gelah idatca lebih asang keperlun geluhna.

¹⁹Kataken man bana gelah ibabana gereta i Mesir nari maba ndeharana ras anak-anakna si kitik denga, janah suruh ibabana bapana ku jenda.

²⁰La pada aru atena nadingken ertana, sabap kasa kai si mejilena i taneh Mesir jadi sikerajangenna me.”

²¹Ilakoken anak-anak Jakup me bagi si isuruh e. Ibereken Jusup piga-piga gereta bagi si iperentahken raja, bage pe pangan i bas perdalanen.

²²Iberekenna ka pe man seninana e sekalak-sekalak sepasang uis, tapi man Benyamin iberekenna telu ratus duit pirak ras lima pasang uis.

²³Itenahkenna man bapana barang-barang si mejilena i Mesir si ibaba sepuluh kelede ras sepuluh kelede nari ka maba pangan, roti ras pangan si deban guna perdalanen e denggo.

²⁴Ipeberkatna senina-seninana e, janah muat kalak enda lawes ikataken Jusup man bana kerina, “Ola rubat-rubat i bas dalan.”

²⁵Itadingkenna negeri Mesir, mulih ia ku kutana ndahi bapana Jakup i Kanaan.

²⁶“Jusup nggeluh denga!” nina man bapana. “Ia kap si erkuasa i belang-belang taneh Mesir!” Mamang ate Jakup. La ia tek kai si ikataken kalak enda.

²⁷Tapi kenca ituriken kalak enda man bana kerina si ikataken Jusup e man kalak enda, janah kenca idahna ka gereta si ikirimken Jusup guna maba ia ku Mesir, nggeluh ka mulihken ukur Jakup.

²⁸E maka nina, “Anakku Jusup nggeluh denga! E kap ngenca pinta-pintangku. Aku arus lawes gelah jumpa ras ia ope aku mate.”