Read Batak Karo KEJADIN 46 Bible Online

KEJADIN 46 - Batak Karo bible

KEJADIN 46

¹Isikapken Jakup kerina ertana, e maka lawes ia ku Berseba, guna erbahan persembahen man Dibata bapana Isak.

²Ngerana Dibata man bana i bas sada pengenehenen sanga berngi nina erlebuh, “Jakup, Jakup!” “Kai, enda aku,” nina ngaloi.

³“Aku kap Dibata bapandu,” niNa. “Ola kam mbiar lawes ku Mesir. Aku erbahanca maka kesusurenndu jadi bangsa si mbelin i jah.

⁴Aku nemani kam lawes ku Mesir, janah aku ka denggo maba si nursurndu mulih ku taneh enda. Jusup pagi si ngadep-ngadep kam asum kam mate.”

⁵Berkat Jakup i Berseba nari. Itamaken anak-anakna ia ku datas gereta si ikirem raja Mesir, danak-danak si kitik denga, ras diberu itamaken kerina ku datas gereta e.

⁶Ibuat kalak enda asuh-asuhenna ras kerina erta-ertana si idatca i Kanaan, e maka lawes ia ku Mesir. Ibaba Jakup kerina kesusurenna, e me [116†]

⁷anakna si dilaki ras si diberu, kempuna si dilaki ras si diberu.

⁸Enda me keluarga Jakup si lawes ras ia ku Mesir,

⁹anakna sintua, e me Ruben, anak Ruben si dilaki e me: Enoh, Palu, Hesron, ras Karmi.

¹⁰Simeon ras anakna si dilaki: Jemuel, Jamin, Ohad, Jakin, Sohar, ras Saul nandena kalak Kanaan.

¹¹Lewi ras anak-anakna e si dilaki: Gerson, Kohat, ras Merari.

¹²Juda ras anak-anakna si dilaki: Sela, Peres, Serah. (Anak-anak dilaki Juda si deban e me Er, ras Onan, enggo mate i Kanaan.) Anak Peres si dilaki e me: Hesron, ras Hamul.

¹³Isakar ras anak-anakna si dilaki e me: Tola, Pua, Jasup ras Simron.

¹⁴Sebulon ras anak-anakna si dilaki: Sered, Elon, Jahleel.

¹⁵Enda me anak-anak dilaki si tubuh arah Lea man Jakup i Mesopotami, tambah sekalak anakna diberu, Dina gelarna. Kerina kesusuren Jakup arah si Lea lit telu puluh telu kalak teremna.

¹⁶Gat ras anak-anakna si dilaki e me: Sipion, Hagi, Suni, Esbon, Eri, Arodi, ras Areli.

¹⁷Aser ras anak-anakna si dilaki e me: Jimna, Ispa, Ispi, Beria ras turangna si Sera. Anak Beria e me Heber ras Malkiel.

¹⁸Si sepuluh enem kalak enda e me kesusuren Jakup arah si Silpa. Silpa e me budak diberu si ibereken Laban man anakna Lea.

¹⁹Rahel, ndehara Jakup, mupus dua anak dilaki e me: Jusup ras Benyamin.

²⁰I Mesir, enggo lit dua anak Jusup dilaki e me: Manase ras Eperaim, si ipupus ndeharana Asnat, anak si Potipera, sekalak imam i Heliopolis. [117†]

²¹Anak Benyamin si dilaki e me: Bela, Beker, Asbel, Gera, Naaman, Ehi, Ros, Mupim, Hupim, ras Ared.

²²Si sepuluh empat kalak enda e me kesusuren Jakup arah si Rahel.

²³Dan ras anakna Husim.

²⁴Naptali ras anak-anakna si dilaki e me: Jahseel, Guni, Jeser, ras Silem.

²⁵Si pitu kalak enda e me kesusuren Jakup arah si Bilha. Bilha e me budak diberu si ibereken Laban man anakna Rahel.

²⁶Teremna kesusuren Jakup si lawes ku Mesir lit enem puluh enem kalak, la ibeligai ndehara anak-anakna.

²⁷Dua anak Jusup si dilaki tubuh i Mesir, e maka lit pitu puluh kalak kerina keluarga Jakup lawes ku Mesir. [118†]

²⁸Ipelebe Jakup si Juda gelah ialo-alo Jusup kalak enda i Gosen. Kenca kalak enda seh,

²⁹inangkihi Jusup geretana, lawes ku Gosen ngalo-ngalo bapana. Kenca jumpa, idakepina kerahung bapana, janah ndekah kal ia tangis.

³⁰Nina Jakup man Jusup, “Genduari enggo sikap aku bicara mate pe, sabap enggo kuidah kam, janah kueteh maka nggeluh denga kam.”

³¹E maka nina Jusup man senina-seninana bage pe man kerina keluarga bapana, “Arus aku lawes erkata man raja, maka senina-seninangku ras kerina keluarga bapangku si gelgel nari tading i Kanaan reh ndahi aku.

³²Kukataken man raja maka kam kerina kalak permakan, ngasuhi asuh-asuhen, janah enggo ibabandu biri-biri ras lembu bage pe kerina ertandu.

³³Sanga ilebuh raja kam kari, adi isungkunna kai pendahinndu,

³⁴katakenlah maka gedang-gedang geluhndu, dahinndu e me ermakan bali ras nini-ninindu. Alu bage tentu iberena kam kerina ringan i Gosen.” Ikataken Jusup bage erkiteken kalak Mesir la nggit sitik pe campur ras kalak permakan.