Read Batak Karo KEJADIN 48 Bible Online

KEJADIN 48 - Batak Karo bible

KEJADIN 48

¹Lanai ndekahsa nari kenca si e, iberitaken man Jusup maka sakit bapana. Erkiteken si e lawes ia ras duana anakna, Manase ras Eperaim ndahi Jakup.

²Kenca enggo ibegi Jakup maka anakna Jusup reh ngenehen ia, ipala-palaina kundul i das ingan medemna.

³Nina Jakup man Jusup, “Dibata si Mada Kuasa enggo encidahken baNa man bangku i Lus i taneh Kanaan, janah ipasu-pasuNa aku. [120†]

⁴Nina man bangku, ‘Aku merekenca bandu nterem anak, gelah alu bage kesusurenndu jadi melala bangsa; Aku mereken taneh enda man kesusurenndu jadi sikerajangenna seh rasa lalap.’ ”

⁵Tole nina Jakup, “Jusup, duana anakndu si tubuh i Mesir enda ope denga aku reh ku jenda, e me Eperaim ras Manase aku nge empuna. Duana ia bali ras anakku Ruben ras Simeon.

⁶Adi lit denga pe nterem anakndu, e lanai bo ia ikira sikerajangenku. E maka tading-tadingen si ialokenna pagi rehna arah si Eperaim ras Manase nari.

⁷Si enda kulakoken erkiteken nandendu Rahel. Ceda kal ateku erkiteken kematenna i Kanaan, la ndauh i Eprata nari, sanga aku mulih i Mesopotami nari. Kukuburken ia i dalan ku Eprata.” (Eprata e me Betlehem si genduari.) [121†]

⁸Kenca iidah Jakup anak-anak Jusup, isungkunna ia nina, “Ise anak-anak si dua enda?”

⁹Nina Jusup njabapsa, “Enda me anak-anakku si ibereken Dibata man bangku i Mesir enda.” Nina Jakup, “Baba ku jenda gelah kupasu-pasu ia duana.”

¹⁰Enggo merabun pengenen mata Jakup perban tuana, e maka lanai terang pengidahna. Ibaba Jusup anak e duana man Jakup, e maka idakep Jakup ras iemana duana.

¹¹Nina Jakup man Jusup, “La kuarap banci denga kita jumpa. Genduari labo ngidah kam saja, tapi enggo ibereken Dibata pe kesempaten man bangku ngidah anakndu.”

¹²Dungna iangkip Jusup anak-anak e i bas ampun Jakup nari, jenari erjimpuh ia i lebe-lebe bapana, ayona seh ku taneh.

¹³Itamaken Jusup si Eperaim arah kawes Jakup gelah Manase arah kemuhen.

¹⁴Tapi ipesimbel Jakup tanna, e maka iamparkenna tanna si kemuhen i babo takal Eperaim, aminna pe gia si Eperaim nge anak si nguda, janah tanna si kawes i babo takal Manase, e me sintua.

¹⁵Ipasu-pasuna kalak enda duana nina, “Dibata si isembah bapangku Abraham ras Isak, Dibata si enggo negu-negu aku seh wari enda!

¹⁶Dibata si enggo nuruh malekatNa mulahi aku i bas kerina cilaka nari. Ialah si masu-masu kalak enda. Seh maka gelarku ras gelar bapangku Abraham ras Isak tetap nggeluh arah anak enda duana, melala anak ipupusna, kesusurenna pe jadi nterem.”

¹⁷La mehuli iakap Jusup asum idahna itamaken bapana tanna si kemuhen ku babo takal Eperaim. Erkiteken si e itangkapna tan bapana, ipiserkenna i bas takal Eperaim nari ku takal Manase.

¹⁸Nina Jusup man bapana, “La payo bage, bapa. Enda kap sintua; tamaken tanndu si kemuhen ku babo takalna.”

¹⁹La nggit bapana, janah nina, “Kueteh nge anakku, kueteh nge. Kesusuren Manase pe jadi sada bangsa si mbelin nge denggo. Tapi agina lebih mehaga asa ia, janah kesusurenna jadi bangsa-bangsa si mbelin pagi.”

²⁰E maka ipasu-pasu Jakup ia duana i bas wari si ndai nina, “Adi masu-masu pagi kalak Israel ipakena gelarndu. Nina pagi, ‘Bagi Eperaim ras bagi Manase lah kam pagi ibahan Dibata.’ ” Alu bage ipebelinken Jakup si Eperaim lebih asa Manase. [122†]

²¹Kenca bage nina Jakup man Jusup, “Bagi enggo idahndu jine, nandangi mate me aku. Tapi Dibata tetap nge nemani kam, janah ibabaiNa kam mulih ku negeri nini-ninindu.

²²Man bandu nge kubereken taneh Sikem, labo man senina-seninandu. Taneh si mehumur e kubuat nai i bas kalak Amori nari alu pedang ras panahku.”