Read Batak Karo KEJADIN 49 Bible Online

KEJADIN 49 - Batak Karo bible

KEJADIN 49

¹Idilo Jakup anak-anakna si dilaki, jenari nina, “Pulunglah kam kerina gelah kuturiken kai si jadi man bandu i bas wari si reh enda.

²Pulung lah, begiken lah, o anak-anak Jakup. Begiken lah kata bapandu Israel.

³Ruben anakku sintua, kam kap gegehku, kam buah si pemena, tandana aku dilaki. Kemegahenku si mbelinna, i bas kerina anak-anakku.

⁴Kam desken lau si ergalun merawa, tapi labo kam anakku si pentingna, sabap ipedemindu gundikku, ingan medem bapandu iliamindu.

⁵Simeon ras Lewi ersenina, ipakena perkakasna ngamburken dareh kalak.

⁶Alu erbuni-buni arih-arih ia, ncampurisa aku la nggit. I bas kerina perjumpanna pe bage ka, ikut ningen aku labo nggit. Sabap ibunuhna kalak iban rawana nahe lembu ipenggelkenna guna kesenangenna.

⁷Kena sumpah lah rawana, perban bage hantuna. Kena sumpah lah pernembehna, perban bage kejamna. Ateku ngkerapken ia i belang-belang taneh Israel, ateku nirang-nirang ia i tengah-tengah penduduk Israel.

⁸Juda, kam ipuji senina-seninandu, kerahung musuh-musuhndu ijenggelndu, senina-seninandu mungkuk i lebe-lebendu.

⁹Juda desken sada singa, kenca njerngem mulihken nangkih ku liangna, ngenat, jenari gempang, si nggasgasisa, ise pe la pang. [123†]

¹⁰Juda me si ncikep tungkat kinirajan, kesusurenna erkuasa seh rasa lalap, bangsa-bangsa maba persembahen man bana, nembah alu erkemalangen i lebe-lebena.

¹¹Ku batang anggur itambatkenna keledena, ku batang anggur si mejilena. Icucina uisna alu lau anggur, bali ras dareh megara rupana.

¹²Matana megara perban minem lau anggur, ipenna mbentar minem susu.

¹³Sebulon ringan i tepi lawit, i je me ingan kapal ngadi-ngadi. Mbelang daerahna seh ku Sidon.

¹⁴Isakar megegeh desken kelede, singenat itindan babanna.

¹⁵Tapi iidahna ingan pengadi-ngadin e mejile, janah taneh e pe la teralang jilena, e maka itarekenna gurungna ngangkat babanna, janah ipaksa ia erdahin desken sekalak budak.

¹⁶Dan, ia me jadi peminpin bangsana seh bali ras suku-suku Israel si debanna.

¹⁷Desken nipe i tepi pasar me kap ia, nipe si erbisa i duru dalan, itagutna padit-padit kuda, seh maka sualak ku pudi si ngersaksa.

¹⁸O, TUHAN, keselamaten i bas Kam nari e me si kutima-timai.

¹⁹Gat, iserbu gerombolen pengerampok, tapi erkusur ia, iayakina pengerampok e.

²⁰Aser, ulih tanehna pangan si entabeh, isikapkenna pangan, metunggung man pangan raja.

²¹Naptali, desken belkih beru-beru si pulah-pulah, anak-anak si ipupusna mejile rupana.

²²Jusup desken sada batang kayu si turah i duru ulu lau. Meramis buahna i bas dahanna sindauh njurjur ngepari bidena.

²³Musuhna megasgas la teralang, ngayaki ia ersenjataken panah,

²⁴tapi panah Jusup tetap paguh, janah tanna tetap megegeh, erkiteken gegeh Permakan si Mada Kuasa Dibata Jakup, Sekawal Israel.

²⁵Dibata bapandu nge si nampati kam, alu mereken udan i das nari ras lau i teruh nari alu mereken asuh-asuhen ras anak nterem.

²⁶Alu mereken pangan ras rudang-rudang, alu mereken deleng-deleng si nuria, ras barang-barang si mejile i uruk-uruk si rasa lalap nari. Kerina pasu-pasu enda nusurlah ku babo takal Jusup ku babo perdempakenna, ia si iserapken i bas senina-seninana nari.

²⁷Benyamin desken serigala si merawa. Pagi-pagi ipanganina kai si nijerngemna, karaben ibagi-bagikenna kai si la kerisa.”

²⁸Enda me sepuluh duana suku bangsa Israel, janah enda ndai me kata pemasu-masun si ibereken bapana, si sentudu man bana sekalak-sekalak.

²⁹Dungna nina Jakup man anak-anakna si dilaki, “Dage, erkiteken lanai bo ndekah umurku, kuburkenlah aku pagi ras nini-niningku i bas gua si lit i juma Epron kalak Heti e,

³⁰i Mahpela arah Timur Mamre, i taneh Kanaan. Itukur Abraham gua ras juma e i bas si Epron kalak Heti nari man taneh kuburen. [124†]

³¹I je me Abraham ras ndeharana Sara ikuburken; i je ka pe Isak ras ndeharana Ribka ikuburken. I je ka me pe enggo kukuburken Lea. [125†]

³²Juma ras gua e itukur i bas kalak Heti e nari, e maka i je lah aku ikuburken.”

³³Kenca enggo dung Jakup mereken pedah-pedahna man anak-anakna, medem ia mulihken je mate ia. [126†]