Read Batak Karo KEJADIN 50 Bible Online

KEJADIN 50 - Batak Karo bible

KEJADIN 50

¹Idakepi Jusup bapana, itangisina, iemaina.

²Kenca bage iperentahken Jusup gelah itamaken rempah-rempah ku mait bapana.

³Bagi biasana empat puluh wari dekahna adi ngerempahi mait. Itangisi kalak Mesir Jakup pitu puluh wari dekahna.

⁴Kenca enggo lepas paksa erceda ate nina Jusup man pegawai-pegawai raja, “Peseh lah berita enda man raja,

⁵‘Nandangi bapa mate, isuruhna aku erpadan man bana gelah kukuburken ia i kuburen si enggo isikapken i Kanaan. Erkiteken si e lawes aku lebe ngkuburken bapangku, janah kenca dung mulih ka aku.’ ” [127†]

⁶Nina raja njabapsa, “To kuburken lah bapandu bagi si enggo ipadankenndu.”

⁷E maka lawes me Jusup ngkuburken bapana. Kerina pegawai raja, kalak si erpangkat, ras kalak si mbelin i Mesir ngikut ras Jusup.

⁸Keluargana, senina-seninana, kerina keluarga bapana ngikut ras ia. Si tading i daerah Gosen e me danak-danak si kitik denga, biri-biri, kambingna, lembuna.

⁹Ikut pe kalak si ergereta perang ras si ngersak kuda. Lanai tanggung teremna kalak enda naruhkenca.

¹⁰Kenca kalak enda seh ibas ingan ngerik i kuta Atat, arah matawari pultak Lau Jordan, ndekah ia i je tangis ngandung alu sora megang. Ibahan Jusup adat perngandungen pitu wari dekahna.

¹¹Kenca iidah rayat Kanaan kalak si erceda ate e i Atat nina, “Megogo kal ate ngidah adat perngandungen kalak Mesir e.” E me sabapna maka ibahan gelar ingan e Abel Misraim. Cibalna arah Timur Lau Jordan.

¹²Dage ilakoken anak-anak Jakup me bagi si iperentahken bapana man bana.

¹³Ibabana ia ku Kanaan, ikuburkenna i gua Mahpela, arah Timur Mamre i juma si itukur Abraham i bas Epron kalak Heti e man taneh kuburen. [128†]

¹⁴Kenca enggo ikuburken Jusup bapana, mulih ia ku Mesir radu ras senina-seninana ras kerina kalak si ngikut i bas penguburen e.

¹⁵Kenca bapana enggo mate nina senina-senina Jusup sapih-sapih ia, “Uga pagi jadina adi segat denga ate Jusup man banta, jenari erbalas ia man banta erkiteken kerina kejahaten si ibahan kita man bana?”

¹⁶E maka ipesehna sada tenah man Jusup nina, “Ope denga bapanta mate,

¹⁷isuruhna kami mindo man bandu bagenda, ‘Alemilah salah senina-seninandu asum ibahanna nai si la mehuli man bandu.’ erkiteken si e, mindo kami gelah ialemindu salah si enggo ibahan kami man bandu. Kami enda kap suruh-suruhen Dibata si isembah bapandu.” Tangis Jusup tupung ialokenna tenah enda.

¹⁸Dungna senina-seninana e jine reh, erjimpuh i adep-adepen Jusup nina, “Kami enda reh jadi budakndu.”

¹⁹Tapi nina Jusup man kalak enda, “Ola mbiar labo banci aku jadi gancih Dibata ngukum kalak.

²⁰Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari.

²¹E maka ola pada sitik pe kam mbiar. Aku pekena-kena kam ras anak-anakndu.” Dage alu kata si melias e, ipetetap Jusup mulihi ukur senina-seninana seh maka malem atena kerina.

²²Jusup ras keluarga bapana tetap denga tading i Mesir; sanga ia mate umurna seratus sepuluh tahun.

²³Sempat denga iidahna anak-anak ras kempu-kempu si Eperaim, janah sempat denga pe ialokenna anak-anak si Mahir kempu Manase jadi keluargana.

²⁴Nina man senina-seninana, “Aku lanai ndekah mate, tapi kuga pe ipekena-kena Dibata nge kam. ItaruhkenNa kam ndarat i jenda nari ku taneh si enggo ipadankenNa man Abraham, Isak ras Jakup.”

²⁵E maka isuruh Jusup kerina kesusuren Jakup ersumpah nina, “Erpadanlah man bangku, maka adi itaruhken Dibata kam ku taneh si ipadankenNa e, tulanku pe ibabandu ku jah.” [129†]

²⁶Dungna mate me Jusup i Mesir i bas umur seratus sepuluh tahun. Itama rempah-rempah ku badanna, jenari itamaken maitna ku bas peti.