Read Batak Karo KEJADIN 6 Bible Online

KEJADIN 6 - Batak Karo bible

KEJADIN 6

¹Sanga manusia reh teremna i doni, ipupusna pe nterem anak diberu.

²Si e kerina i idah anak-anak Dibata, janah mejile akapna, e maka iempoina siapai atena ngena.

³Nina TUHAN, “La Kupelepas manusia nggeluh rasa lalap, sabap ia biak si ermasap-masap. E maka mulai genduari nari ia nggeluh la lebih 120 tahun.”

⁴I bas jaman e ras jaman kenca si e pe lit jelma si seh kal gedang mbelinna, e me kesusuren manusia diberu, si erjabu ras anak-anak Dibata. Sinursur kalak enda me jadi kalak si terberita mbisa i bas paksa si e. [22†]

⁵Asum idah TUHAN kuga jahatna manusia ndai i doni, janah kuga macikna perukurenna katawari pe, [23†]

⁶e maka erkadiola Ia njadiken manusia ras namakenca i doni enda. Perbahan erkadiola kal Ia

⁷e maka nina TUHAN, “Kusasapkenlah manusia si enggo Kujadiken e, bage pe kerina rubia-rubia ras perik-perik, sabap erkadiola Aku njadikenca kerina.”

⁸Tapi Nuah ngena ate TUHAN.

⁹ [9-10] Enda me turin-turin kerna si Nuah. Lit telu anak dilaki ipupusna, e me: Sem, Ham, ras Japet. I bas jamanna Nuah ngenca si mehuli, janah la lit kesalahenna. Ia erdalan i bas dalan Dibata, [24†]

¹¹tapi kerina kalak si deban tuhu-tuhu jahat i lebe-lebe Dibata, janah i japa pe terjadi kejahaten.

¹²Itatap Dibata doni enda, janah idahNa kejahaten kerina i je, sabap manusia kerina enggo mbau lagu langkahna.

¹³Nina Dibata man Nuah, “Enggo Kutetapken maka Kusasapken me kerina manusia. Kukernepken ia kerina, erkiteken doni enda enggo dem alu kejahaten manusia.

¹⁴Bahanlah sada kapal man bandu i bas kayu si nteguh nari. Bahan kamar-kamarna janah lapisi alu ter arah bas ras arah darat.

¹⁵Bagenda bahan kam ukurenna: gedangna 150 meter, belangna 25 meter, ganjangna 15 meter.

¹⁶Bahanlah tarumna setengah meter ganjangna i babo dingdingna nari. Kapal e ertingkat telu i bas, janah tama sada pintunna i bas sada dingding.

¹⁷Kuban ateKu banjir si mbelin i doni enda, gelah kernep kerina si nggeluh. Kasa kai si lit enda la banci la mate kerina,

¹⁸tapi ateKu erbahan sada perpadanen ras kam. Bengketlah kam ku bas kapal ras ndeharandu, anak-anakndu, bage pe ras permainndu.

¹⁹[19-20] Tamaken ku bas kapal e sada pasang i bas tep-tep erbage rubia-rubia ras tep-tep erbage perik-perik gelah ola keri mate.

²¹Tamaken ku bas kapal e kerina erbage pangan man bandu ras man rubia-rubia ras man perik e.”

²²Ilakoken Nuah kerina kai si iperentahken Dibata man bana. [25†]