Read Batak Karo KEJADIN 7 Bible Online

KEJADIN 7 - Batak Karo bible

KEJADIN 7

¹Nina TUHAN man Nuah, “Bengketlah kam ras kerina keluargandu ku bas kapal e. Sada kam nari ngenca i bas doni enda erbahan si mehuli Kuakap.

²Buat pitu pasang tep-tep erbage rubia-rubia si la ipantangken rikutken aturen agama. Tapi rubia-rubia si pantangen buat sepasang saja tep-tep erbage.

³Buat ka perik pitu pasang tep-tep erbage. Enda ibahan gelah tep-tep erbage rubia-rubia ras perik-perik la lesap, janah gelah ertambah-tambah ka ia pagin i doni enda.

⁴Pitu wari nari Kupesusur me udan empat puluh wari empat puluh berngi dekahna, gelah ikernepkenna kerina si nggeluh si enggo Kujadiken.”

⁵Kasa kai si iperentahken TUHAN, kerina ilakoken Nuah.

⁶Sanga banjir si mbelin e jadi i doni enda umur Nuah 600 tahun.

⁷E maka bengket me Nuah ras ndeharana, anak-anakna ras permainna ku bas kapal e, gelah ola ia mate ibahan banjir e. [26†]

⁸ [8-9] Bage pe tep-tep pasang rubia-rubia ras perik-perik subuk pantangen ras si la pantangen, kerina bengket ras Nuah ku bas kapal e, sue ras si iperentahken Dibata.

¹⁰Pitu wari kenca si e, jadi me banjir si mbelin e.

¹¹Asum umur Nuah 600 tahun, i bas wari sepuluh pitu bulan si peduaken, talang me kerina ulu lau si mbelang i teruh taneh, ras kerina pintu lau si mbelin i datas langit. [27†]

¹²E maka reh me udan meder empat puluh wari empat puluh berngi dekahna ku doni enda.

¹³I bas wari e me Nuah ras ndeharana bengket ku bas kapal e rikut pe ras telu kalak anakna dilaki, Sem, Ham, Japet, ras teluna permainna.

¹⁴Ikut pe ku bas kapal e, tep-tep erbage rubia-rubia si melemuk ras si meliar, kitik ras mbelin, bage pe tep-tep erbage perik-perik.

¹⁵Kasa kai si nggeluh, bengket kerina tep-tep pasang ku bas kapal e ras Nuah,

¹⁶bagi iperentahken Dibata. Kenca Nuah bengket, ipintu TUHAN pintun kapal ndai.

¹⁷Banjir si mbelin e enggo empat puluh wari dekahna, e maka enggo kenca cukup bagesna lau e, terangkat me kapal e seh bombang.

¹⁸Lau ndai terus erbagesna, e maka kapal ndai bombang-bombang i babo lau.

¹⁹Erkiteken lau e erbagesna, tampuk deleng si meganjangna pe gedap ibahanna.

²⁰Lau tambah denga terus seh pitu meter enggo ganjangen asa tampuk deleng-deleng.

²¹Kasa kai si nggeluh i bas doni mate; perik-perik, rubia-rubia, jelma, kerina mate.

²²Kasa kai si erkesah si lit i bas doni enda mate kerina.

²³Ikernepken TUHAN kerina si nggeluh i bas doni enda -- manusia, rubia-rubia bage pe perik-perik. Nuah ras si ikut i bas kapalna e ngenca tading.

²⁴Seratus lima puluh wari dekahna lau lalap la surut-surut.