Read Batak Karo KEJADIN 8 Bible Online

KEJADIN 8 - Batak Karo bible

KEJADIN 8

¹Dibata la lupa man Nuah ras kerina rubia-rubia si ikut rassa i bas kapal e; erkiteken si e ibahan Dibata angin rembus, e maka lau mulai erkurangna.

²Kerina pintun lau si lit i teruh taneh ras pintun lau i langit i tutupi, e maka ngadi me udan.

³Bage me lau e mulai erkurangna kenca 150 wari.

⁴I bas wari sepuluh pitu bulan si pepituken sampe kapal ndai i datas Deleng Ararat.

⁵Lau terus erkurangna, janah wari si pemena bulan si pesepuluhken, enggo mulai teridah tampuk deleng-deleng.

⁶Empat puluh wari kenca si e italangi Nuah sada jendela kapal e,

⁷janah ipulahina sada perik kak. Kak ndai lanai mulihken, tapi kabang-kabang saja ia seh lau enggo kerah tuhu-tuhu i babo taneh.

⁸E maka ipulahina ka sada nderapati guna meteh ntah enggo surut lau ndai,

⁹tapi erkiteken kerina taneh itutupi lau denga, la lit ingan nderapati e cinep. E maka mulihken ka ia ku kapal e, janah idudurken Nuah tanna ndarat nangkapsa.

¹⁰Itimaina ka pitu wari nari, kenca bage ipulahina ka nderapati ndai.

¹¹Karaben mulihken nderapati ndai, janah alu tubina ibabana bulung seton si meratah denga. E maka ieteh Nuah maka lau enggo surut.

¹²Kenca bage itimai Nuah ka pitu wari nari, e maka ipulahina ka nderapati ndai sekali nari; sekali enda lanai mulihken nderapati ndai.

¹³Asum umur Nuah 601 tahun, i bas wari si pemena bulan si pemena, lau lanai lit. Ibuka Nuah tutup kapal e, itatapna kelewet, janah idahna taneh enggo mulai kerah.

¹⁴I bas wari si pedua puluh pituken, bulan si peduaken, taneh enggo kerah tuhu-tuhu.

¹⁵Nina Dibata man Nuah,

¹⁶“Ndaratlah kam i bas kapal nari ras ndeharandu, anak-anakndu ras permainndu teluna.

¹⁷Baba kerina ndarat perik-perik ras rubia-rubia, gelah banci ia reh buena ka kerina, gelah serser ibahanna doni enda.”

¹⁸E maka ndarat Nuah i bas kapal e nari ras ndeharana, bage pe anak-anakna ras ndeharana.

¹⁹Kerina rubia-rubia ras perik-perik pe ndarat i bas kapal e nari erterpuk-terpuk rikutken biakna.

²⁰Ibahan Nuah sada batar-batar ingan persembahen man TUHAN. Ibuatna sada ibas tep-tep erbage rubia-rubia ras perik-perik si la pantangen rikutken aturen agama. Kenca bage itutungna bulat-bulat i datas batar-batar ndai, jadi persembahen.

²¹Meriah iakap TUHAN erkiteken bau persembahen si merim e, e maka nina i bas ukurNa, “Ndigan pe lanai Kusumpahi doni enda erkiteken perbahanen manusia. Enggo Kueteh maka mulai kin kitik-kitikna nari ukurna enggo jahat. Ndigan pe lanai Kukernepken kasa kai si nggeluh bagi si mbaru denga Kulakoken.

²²Kidekah doni enda lit denga, lalap lit paksa nuan ras paksa rani, paksa mbergeh ras paksa mokup, paksa perudan ras paksa perlego, lit suari ras berngi.”