Read Batak Karo 2 SAMUEL 13 Bible Online

2 SAMUEL 13 - Batak Karo bible

2 SAMUEL 13

¹Absalom anak Daud, lit sekalak turangna mejile, Tamar gelarna. Amnon anak Daud si deban pedauh nande ras Absalom erngena ate man Tamar.

²Seh kal ate Amnon ngenana turangna e seh maka sakit pe ia sabap iakapna pe la mungkin turangna e man bana. Selaku sekalak singuda-nguda Tamar ijaga gelah ola jumpa ras dilaki.

³Tapi lit sekalak teman Amnon seh kal cerdikna, gelarna Jonadap anak Sammah senina Daud.

⁴Nina Jonadap man Amnon, “Kam anak raja, tiap wari kuidah ndele atendu. Kai kal nge si jadi?” “Ngena ateku Tamar turang seninangku Absalom,” nina njabapsa.

⁵Nina Jonadap man Amnon, “Pekulah-kulah kam sakit medemken. Sanga bapandu reh ngenehen kam kataken man bana, ‘Suruhlah turangku Tamar mere nakan aku. Ateku ia min nikapken nakanku i jenda, gelah banci ia kuidah jenari ia jine ngelai aku.’ ”

⁶E maka ipekulah-kulah Amnon sakit jenari lawes ia medem. Raja Daud lawes ndahi ia e maka nina Amnon man bapana, “Suruh min Tamar ku jenda maka ibahanna sitik roti i lebe-lebengku jenari ia jine merekenca man bangku.”

⁷E maka itenahken Daud si Tamar ku istana nina, “To ku rumah Amnon janah sikapken sitik pangan man bana.”

⁸Lawes Tamar ku rumah Amnon janah idapetina i je turangna medem. Ibuat Tamar sitik cimpa isikapkenna, e maka ibahanna piga-piga roti i lebe-lebe Amnon. Jenari kenca enggo itasakken Tamar roti e

⁹maka ipedaratina i bas kudin nari gelah ipan turangna, tapi Amnon la nggit manca. Nina Amnon, “Pelawes lebe kalak kerina.” E maka lawes kalak ndai kerina.

¹⁰Jenari nina man Tamar, “Baba roti e ku ingan medemku janah sulangilah aku.” Ibuatna roti e janah ibabana man turangna.

¹¹Bage ibereken Tamar roti e man Amnon, itangkapna Tamar janah nina, “Mari ras kita medem!”

¹²“Lang! Ola paksa aku ngelakoken si e! Mejin bage!

¹³Ku ja denga pagi kubuniken ayongku? Janah kam denggo ikataken kalak si kemalina kal i Israel. Ercakaplah kam ras raja, ugapa pe iberena nge aku man bandu,” nina Tamar.

¹⁴Tapi la ibegiken Amnon kata turangna e. Perban gegehen ia asang turangna, talu ia ibahanna jenari iperkosana.

¹⁵Kenca bage lanai tanggung nembehna ate Amnon man Tamar. Belinen atena nembeh genduari asangken atena ngena ndube. Nina man bana, “Ndarat!”

¹⁶“Lang! Sabap adi ipelawesndu aku, belinen kap salah si bage asangken kai si mbaru ilakokenndu!” nina Tamar. Tapi la ibegiken Amnon katana;

¹⁷ilebuhna suruh-suruhenna, jenari nina, “Olanai kuidah diberu ena! Pedarat! Jenari eruk pintun!”

¹⁸Ipedarat suruh-suruhen e Tamar jenari ierukna pintun. Ipake Tamar baju panjang si nggedang tanna. I bas paksa si e putri raja si langa sereh biasa make paken si bage.

¹⁹Icaburi Tamar takalna alu abu, icaingkenna baju panjangna itutupina ayona alu tanna ngandung ia lawes.

²⁰Sanga idah Absalom ia isungkunna, “Enggo kin kam iganggu Amnon? Bagem Tamar, ola ndele kal atendu kerna si e. Turangndu kap ia, e maka ola turiken e man ise pe.” Jenari tading Tamar i rumah turangna Absalom ceda atena, melungen iakapna.

²¹Kenca ibegi Raja Daud kai si enggo jadi merawa kal ia.

²²Janah segat kal ate Absalom man Amnon sabap enggo iperkosana turangna Tamar. Lanai ia nggit mperkuanken Amnon.

²³Dua tahun kenca si e, Absalom nggunting mbulu biri-birina i Baal Hazor, deher kuta Eperaim. Kerina anak raja iundang ku je.

²⁴Idahina Raja Daud jenari nina, “O Raja, aku sangana nggunting mbulu biri-biringku. Banci kang kam ras pegawaindu reh ku pesta e?”

²⁵“Lang anakku,” adi kerina kami ku jah gulutsa nge pagi akapndu nina raja. Isekseki Absalom tapi la ibere raja pemindonna. Jenari isuruhna Absalom lawes.

²⁶Tapi nina Absalom, “Adi bage seninangku Amnonlah gia reh?” “Labo perlu e,” nina raja.

²⁷Tapi tetap isekseki Absalom seh dungna ibere Daud si Amnon ras kerina anak raja si dilaki lawes ras Absalom. Ibahan Absalom kerja man-man si meriah.

²⁸E maka iperentahkenna man suruh-suruhenna, “Perdiateken adi Amnon enggo melalasa minem anggur, janah kenca kuperentahken bunuh Amnon. Ola mbiar! Aku ertanggung jawab kerna si e. Tetaplah ukurndu ola kam sangsi!”

²⁹Ikutken suruh-suruhen e perentah Absalom ibunuhna Amnon. Kerina anak-anak Daud si deban lompat ngersak keledena.

³⁰Sanga kalak enda i tengah dalan denga enggo ikataken man Daud, “Enggo ibunuh Absalom kerina anakndu si dilaki la lit sekalak pe tading!”

³¹Tedis raja icaingkenna bajuna, idampeskenna bana ku taneh. Suruh-suruhen si lit i je ras ia pe ncaingken bajuna.

³²Tapi ngerana Jonadap, anak Sammah senina Daud nina, “O Raja, labo kerina anakndu ibunuhna. Amnon ngenca. Banci nendu i bas Absalom. Ilakokenna e nginget perbahanen Amnon nai tupung iperkosana turangna Tamar.

³³E maka ola kam tek berita maka kerina anakndu si dilaki enggo mate. Amnon ngenca enggo ibunuh.”

³⁴Sanga e Absalom enggo kiam. Rembang paksa si e tentera si sangana ertugas ngidah sada arak-araken si mbelin nusur i datas uruk nari arah dalan i Horonaim nari. Idahina raja janah ilaporkenna kai si enggo idahna.

³⁵Nina Jonadap man Daud, “Ah anakndu sangana reh, payo bagi si kukataken ndai.”

³⁶Kenca ia dung ngerana, reh anak-anak Daud jenari ngandung ia kerina, e maka Daud ras kerina pegawaina e ikut tangis erceda ate.

³⁷ [37-38] Absalom kiam ndahi raja Gesur Talmai anak Amihud. Telu tahun dekahna ia tading i jah. Ndekah kal Daud erceda ate erkiteken anakna Amnon. [23†]

³⁹Tapi kenca susur atena ceda tedeh atena nandangi anakna Absalom.